‏ Numbers 36

Хадамтай эхэнэрэй угайнь зөөри тухай

1Иосифой үри һадаһан, Мэнашшээгэй аша, Махиирай хүбүүн Галаадһаа гарбалтай угай удамаршад Моисейдэ болон израильшуудай ударидагшадта, урагуудай толгойлогшонорто ерээд, 2иигэжэ хэлэбэд:

– Эзэн израильшуудта жээрэбээр хубита газарыень хубаарила гэжэ манай эзэн ноёндо захиралта үгөө һэн. Манай аха Цэлопэһаадай басагадта хубита газар үгтэхэ ёһотой гэжэ Эзэн манай эзэн ноёндо айладаа һэн. 3Хэрбэеэ ондоо обогой хүбүүн Цэлопэһаадай басагадай нэгыень һамга абаг лэ даа, тиихэдэнь бидэ яахабибди? Басагадайнь хадамда гарабалынь, манай уг удам хубита газараа алдаха. Тиихэдэнь жээрэбээр абтаһан манай газарай хэмжээн бага болохол. 4Ойн баярай жэлдэ юун болохоб? Тиихэдэнь Цэлопэһаадай басагадай мэдэлдэ байһан газарые хэн абахаб? Манай обог тэрэ газараа алдаха болоно аал?

5Моисей Эзэнэй зарлигые израильшуудта дамжуулан, иигэжэ хэлэбэ:

– Иосифой обогой эдэ зон зүб хэлэнэ! 6Эзэн Цэлопэһаадай басагадта иигэжэ захяа: «Хэрбэеэ хадамда гараха гэбэл, өөһэдынгөө обогой хүбүүдтэ хадамда гарагты. 7Тиигэбэлтнай, израильшуудай хубита газар обогһоо обогто үгтэнгүй, угайтнай үенүүдэй гэр бүлэ бүхэндэ үлэхэ. 8Хэрбэеэ басаган эсэгынгээ хубита газарые абаа һаа, өөрынгөө обогой хүндэ хадамда гараг. Израилиин хүбүүн бүхэн угайнгаа газар залгамжалан байг. 9Тиихэдэнь таанадай хубита газарнууд обогһоо обогто орохогүй. Тиигэжэ Израилиин хүн бүхэн уг гарбалайнгаа хубита газарнуудые үлөөг».

10Цэлопэһаадай басагад Моисейдэ Эзэнэй зарлигтаһые дүүрэн бэелүүлбэ. 11Цэлопэһаадай басагад Маһлаа, Тирцаа, Хоглаа, Милкаа болон Ноһаа өөһэдынгөө аха дүүнэртэ хадамда гарабад. 12Тэдэнэй үбгэд ба өөһэдөөшье Иосифой хүбүүн Мэнашшээгэй обогой байжа, хубита газарнуудынь тэдэнэй урагта, тэдэнэй эсэгын зондо үлэбэ.

13Ерихоон тушаа сэхэ урда, Иордан мүрэнэй хажуудахи Моһаабай тэгшэ нюруу газарта Эзэн израильшуудта Моисейгээр дамжуулан, эдэ зарлиг ба тогтоолнуудые айладаа юм.
Copyright information for BxrBBL2024