‏ Numbers 8

Зула дэн

1Эзэн Моисейдэ иигэжэ айладаба:

2– Минии заажа үгэһэн һуурида долоон зула багтаа. Тэдэш зула дэнгүүдэй табюурай урдахи дайдые гэрэлтүүлэг гэжэ ши Аһароондо хэлэ.

3Эгээл тиигэжэ, зула дэнгүүдэй һууриин табюурай урдахи дайдые гэрэлтүүлхын тула Аһароон зула дэнгүүдые хэрэгтэй газартань тааруулан багтаажа, Эзэнэй Моисейдэ үгэһэн захиралтые дүүргэбэ. 4Зула дэнгүүдэй голто эшэнүүд болон һууриин табюурай байгуулга иимэ: Эзэнэй Моисейдэ харуулһан дүрсөөр тэрэ дэн, дэнгэй һуури болон табюурһаа эхилээд тэрэнэй һалаа болон сэсэгүүд булта хэбтэ шудхагдажа, сэбэр алтаар хэгдэбэ.

Левидүүдтэ зорюулга

5Эзэн Моисейдэ иигэжэ айладаба:

6– Израильшуудһаа левидүүдые илгаад, тэдэниие нүгэлһөө арюудхан сэбэрлэ. 7Тэдэниие нүгэлһөө арюудхан сэбэрлэхын тула иимэ юумэ хэхэ хэрэгтэй: онсо тусгаар уһаар тэдэниие сүршэжэ сэбэрлэ. Тэдэнэр үһэ абадаг хутагын эреэр өөһэдынгөө бүхы бэе хюһаг, хубсаһаа угааг. Тиихэдээ тэдэнэр арюудхагдаха. 8Левидүүд эрэ тугал, оливын тоһо шэниисын гурилтай холижо болгоһон хилээмэн үргэл, мүн тиихэдэ нүгэл сагааруулгын үргэлдэ нүгөөдэ эрэ тугал абаг. 9Тиихэдэнь левидүүдые майхан һүмын дэргэдэ асара. Тиигээд тэндэ израильшуудые суглуулжа, 10левидүүдые Эзэнэй урда асара. Израильшууд альгануудаа левидүүдэй толгой дээрэ табиг. 11Израильшуудай дундаһаа левидүүдые майхан һүмэдэ алба хэхыень эльгээхын тула Аһароон тэдээндэ Эзэнэй урда һахил хүртөөг. 12Левидүүд альгануудаа тугалнуудай толгой дээрэ табиг. Тиигээд эдэ тугалай нэгэн нүгэл сагааруулгын үргэл, нүгөөдэнь түгэс шатаалта үргэл болон үргэгдэхэ. Энэ бол левидүүдые арюудхалгын ёһолол мүн.

13Левидүүдые Аһарооной ба тэрэнэй хүбүүдэй урда зогсоожо, Эзэндэ зорюулан, тэдээндэ һахил хүртөө. 14Тиигэжэ левидүүдые бусад израильшуудһаа илгахадаш, тэдэнэр Минии албатад болохо. 15Тиигэжэ тэдэниие арюудхажа, Намда зорюулһан хойношни тэдэнэр майхан һүмын дэргэдэхи албанда алба хэхэеэ ошог. 16Тэдэ израильшуудһаа илгагдан, Намда үгтэһэн мүн. Израильшуудай умайһаа унаһан түрүүшын хүбүүнэйнь орондо левидүүдые Би Өөртөө абанаб. 17Израильшуудай бүхы ууган хүбүүд, үхэр малайнь түрүүшын бүхы түл бултадаа Минии юм. Юуб гэхэдэ, тэрэ үдэр Би Египедэй бүхы ууган хүбүүдые болон үхэр малайнь түрүүшын түл хюдахадаа, израильшуудай түрүүшын бүхы хүбүүдые, малайнь түрүүшын түлые абараа һэм. 18Мүнөө Би израильшуудай бүхы ууган хүбүүдэй орондо левидүүдые абанаб. 19Бүхы израильшуудай дундаһаа левидүүдые шэлэжэ абаад, тэдэниие Аһароондо ба тэрэнэй хүбүүдтэ үгэбэб. Тэдэнэр майхан һүмын дэргэдэхи алба гүйсэдхэжэ, бүхы израильшуудай энхэ амгалан байхын түлөө алба хэхэ. Усадхалда орохогүйн тула израильшууд нангин газарта дүтэлхэ ёһогүй.

20Моисей, Аһароон ба израильшууд левидүүдтэй хамта Эзэнэй Моисейдэ айладаһан зарлигые түгэс дүүргэбэ. 21Левидүүд бэеэ арюудхаба, хубсаһаа угааба. Аһароон тэдэниие нүгэлһөөнь арюудхахын тула Эзэнэй урда абаашаад, арюудхаба, Эзэндэ тэдэниие зорюулан, ёһолол хэбэ. 22Энээнэй удаа левидүүд Аһарооной болон тэрэнэй удамай харгалзалга доро майхан һүмын ажал хэдэг болоо. Аһароон болон тэрэнэй хүбүүд Моисейдэ Эзэнэй үгэһэн бүхы зарлигые бэелүүлэн гүйсэдхэбэ.

23Эзэн Моисейдэ иигэжэ айладаба:

24– Левидүүд тухай онсо тусгаар хуули иимэ: хорин табанһаа дээшэ наһатай тэдэнэр майхан һүмын дэргэдэхи албанай ажал хэхэ ёһотой. 25Тэдэнэр табитай болоходоо энэ албанһаа сүлөөлэгдэжэ, тэндэ ажаллаха ёһогүй болохо. 26Табитай бологшод, мүн үшөөшье дээшэ наһатайшуул майхан һүмын дэргэдэхи харуул харадаг аха дүүнэртээ хамһалсаг. Гэбэшье хамһалсана гү, али үгы гү, – тэдэнэй дуран.

Левидүүдэй албан тухай иимэл захиралта үгэхэ ёһотойш.