‏

Энэ хуряангы лүндэн манай ээрын урдахи 586 ондо Вавилооной сэрэгэй Иерусалимые һандаргаһанай удаа бэшэгдэһэн ха гээд таамагламаар. Шэлэн абаһан арад түмэнэйнь урдаһаа Эдоомой арад нүгэл хэхэдэнь, Бурхан тэдэниие хэһээхэ гэжэ Авдии тунхаглажа байгаа. Эдоомшууд хадаа израильшуудта түрэл арад, израильшуудай элинсэг Яковай аха Эсаавһаа уг гарбалтай мүн. Хоёр арад хүршэ һуудаг байгаа. Израильшуудтай гай тодхорой тохёолдоходо, эдоомшууд баярлажа, израильшуудай газар уһа, зөөри хогшолые буляан абахаар һэдээ бэлэй.

Үнэхөөрөө тон тиимээр үйлэ хэрэгүүд эрьеэ. Израильшууд орон нютагаа бусаа, эдоомшууд Шэнэ Хэлсээнэй үе хүрэтэр үгы боложо, гансал орон нютагайнь нэрэ үлэнхэй юм. Эдоомшууд бусад арадуудай дунда тунажа, шэнгэжэ, холилдожо үгы болоо, иигээд тусгаар арад мэтээр үлэжэ шадаагүй.

‏ Obadiah

Бурханай Эдоомые шүүн хэһээлгэ

1Эзэн Бурханай Эдоом тухай иигэжэ айладхаһые лүндэншэ Авдии үзэгдэл соогоо иигэжэ дуулаһан-хараһан байна:

Бидэ Эзэнһээ иимэ мэдээ дуулаабди –
үндэһэ яһатадта Эзэн элшэн эльгээнхэй,
«Бодогты! Эдоомой урдаһаа
байлдаа үүдхэе!», – гэжэ соносхоо.

2Үзөөрэй, Эдоом, Би шамайе
арадуудай дунда тоогдохоор бэшэ
ахир бага болгохоб.
Шамайе булта шоо үзэхэ.
3Бардам заншни шамда һаад, тушаан болоо.
Хабсагайн хабшуул нүхэндэ хорожо,
хадын үндэртэ байра байдал түхеэрээд,
«Намайе хэншье газарта буулгажа
шадахагүй» гэжэ бодонош.

4Бүргэд шэнги үндэртэ,
одо мүшэдэй дунда уурхайгаа түхеэрээшье һааш,
тэндэһээш Би шамайе доошонь унагаахаб! –
гэжэ Эзэн Бурхан айладана.

5Һүниндөө хулгай хэгшэд, дээрмэшэд
шамда орожо ерэбэл,
хэрэгтэйл юумэеэ дураараа
шамһаа абан ошохо бэшэ гү?
Уһан жэмэс суглуулагшад шамда ерэбэл,
нэгэ хэдышье жэмэс түүнгүй үлөөхэ бэшэ гү?
Харин дайсадшни шамайе
дууһан аршаад ошохол!
6Эсаавай зөөри нэгжэгдээ,
нюуса дарасань буляагдаа!

7Шамтай холбоотой хамаг зон
хилэ руу шамайе шахажа,
эбтэй нүхэдшни мэхэлжэ,
хүсөөрөө шамайе диилэхэ.
Шамда хүндэлүүлдэг зон
урьха шамда табиха,
Тэрээниие ши ойлгохошгүйш!

8Эзэн айладажа байна:
«Тэрэ үдэр Би мэргэдые Эдоомдо,
ухаатаниие Эсаавай уулада усадхахаб.
9Тэмаанай эрэлхэгүүд зоригоо алдаха,
Эсаавай хадада хамаг зон хюдагдаха.
10Ши Яков дүүгээ харшалһанай түлөө
муу сууда гарахаш, хэтэ мүнхэдөө хосорхош.
11Хариин сэрэгшэдэй баялигыень тоножо,
хариин зоной хаалгаарнь орожо,
Иерусалим тухай жээрэб хаяжа байхадань,
хажуу тээһээ хабаагүй хаража зогсоходоо,
ши тэдэнэй нэгэн болоо гээшэш!
12Өөрын дүүгэй золгүй тэрэ үдэр бардамлаха бэшэ,
Иудын зоной һүйдхэлтэ үдэр баясаха бэшэ,
тэдэнэй зоболонгой үдэр энеэжэ байха бэшэ байгааш.
13Минии арад түмэнэй гай гамшагай үдэр
тэрэнэй хаалгаарнь орожо,
зоболонгыень хоролхон хараха,
хогшол зөөридэнь гар хүрэхэ,
14тэрьелэгшэдые харгын уулзуурта отожо алаха,
үлэгшэдыень тэрэ зоболонто үдэр
дайсанай гарта барижа үгэхэ ёһогүй һэнши».

Эзэнэй үдэр

15Ушарынь хадаа Эзэнэй үдэр
бүхы үндэһэ яһатанда ойртожо байна:
«Шинии үйлэдэһэн үйлэ шам дээрэ үйлэдэгдэхэ.
Шинии хэһэн хэрэг тархи дээрэш бууха.

16Минии арюун хадада шуһа адхаһантайш адли
бусад арадууд шинии шуһа адхахал.
Тэдэ уужа залгяад,
урдань оршожо байгаагүй мэтэ үгы болохол.

17Гэбэшье Сион уулада зондо абарал ерэжэ,
тэрэ уула арюун болохо.
Яковай удам өөрын зөөри эзэмшэхэ.

18Удаань Яковай удам гал боложо,
Иосифой удам дүлэн болохо,
Эсаавай удам һолоомо шэнгеэр соробхилхо.
Эсаавай уг удамһаа нэгэшье хүнэй
амиды үлэхэгүй болотор
тэдэниие галда шатааха», –
гэжэ Эзэн айладаа.

19Урда зүгэй зон Эсаавай уулануудые эзэмшэхэ, далайн нюрууда ажаһуудаг зон Пилиштые эзэмдэхэ. Тэдэ Эпрааимай ба Самариин газар нютаг эзэмшэхэ. Бэньямиинэй обог Галаадые эзэмшэхэ. 20Халаахада ажаһуудаг израильшууд Зарэпаат хүрэтэр Ханаһаанай газар эзэлхэ. Иерусалимһаа гаража, Сэпараадта һууха баатай болоһон зон Нээгэбэй хотонуудые эзэмшэн абаха. 21Илагшад Сион уула ерэжэ, Эсаавай уулын зониие шүүбэрилхэ, хан түрэ Эзэнэй болохо.