‏

Павел энэ хандалгые түрмэдэ һуухадаа бэшээ. Онисим гэжэ бодхуул богоолтой Павел Римдэ танилсаһан түүхэтэй. Павелһаа Һайн мэдээ дуулахадаа, Онисим Христоосто мүргэдэг болоо. Оносимдо шэрүүн хэһээлтын аюул занажа байбашье, тэрэ өөрын эзэн Филимондо бусаха ёһотой гэжэ Павел тоолобо. Онисимой эзэн Филимон христиан һүзэглэгшэ, Колоссы хотын хажууда (мүнөө Турциин баруун зүг) ажаһуугаа. Павел тэрэниие һайн мэдэхэ һэн.

Онисимые хүлисэхыень, нэгэ мүргэлтэй аха-дүү мэтээр бэе бэедээ хандахыень Павел Филимониие гуйна; тэрэ Онисимые Рим руу бусаахыень хүсэнэ, гэбэшье һүүлшын шиидхэбэри Филимон өөрөө гаргаха ёһотой. Павел богоолшолго тухай Римэй тогтоолнуудые буруушаанагүй, харин христиан һүзэглэгшэдтэ аха-дүүгэй хайра дуран иимэ тогтоолнуудһаа бүри шухала гэжэ ойлгуулна.

‏ Philemon

Амаршалга

1– 2– 3Бидэнтэй хамта хүдэлдэг эрхим хүндэтэ Филимон, Иисүүс Христоосой түлөө түрмэдэ һууһан Павел ба һүзэглэгшэ Тимофей хоёр шамда бэшэнэ. Манай Бурхан Эсэгэһээ болон Эзэн Иисүүс Христоосһоо үршөөл хайра ба амгалан тайбаниие айладханабди. Гэртэшни суглардаг һүзэглэгшэдэй бүлгэмдэ, хүндэтэ Апфии дүүдэмнай, бидэнтэй хамта алба хэдэг Архипта мэндые хүргөөрэй.

Филимоной хайра дуран ба һүзэг этигэл

4Зальбаралга бүхэндөө шамайе дурдажа, Бурхандаа баясхалан хүргэжэ байдагби. 5Бурханай бүхы зондо эльгэтэй байһан тухайшни, Эзэн Иисүүс Христоосто һүзэглэжэ байһан тухайшни дуулажа байдагби. 6Бидэ хоёр һүзэглэгшэдэй хани нүхэсэл Иисүүс Христоостой нэгэдэһэн манай амидаралда үршөөл бүхэнэй гүнзэгы удхые мэдэрхэдэшни туһалха тухай зальбаржа байдаг хүнби. 7Хүндэтэ дүүмни, хайра дураншни намайе ехэтэ баясуулаа, аргагүй урмашуулаа. Ши бүхы һүзэглэгшэдэй сэдьхэлыень амаруулааш.

Онисимай түлөө гуйлта

8Тиимэһээ би Христоосоор ахашни болоһон ушараар хэхэ ёһотой юумэеэ хэ гэжэ захирха эрхэтэйшье һаа, 9шамда эльгэтэй ушарһаа шамайе зүбхэн гуйнаб. Мүнөө Иисүүс Христоосой түлөө түрмэдэ һууһан би Павел гуйжа байнаб. 10Христоосто этигээд, намаар заалгажа хүбүүмни болоһон Онисимай түлөө би шамайе гуйнаб. Түрмэдэ һууха үедөө би тэрээндэ ухаа заадаг эсэгэнь болооб. 11Урдань Онисим шамда ямаршье аша туһагүй байгаа, харин мүнөө сагта тэрэ шамдашье, намдашье хэрэгтэй юм.

12Мүнөө би тэрэниие шамда гэдэргэнь ябуулнаб. Би тэрээндэ аргагүй дуратайб, ши тэрэниие һайнаар угтажа абаарай. 13Һайн Мэдээсэлые номноһонойнгоо түлөө түрмэдэ һуухадаа, шинии орондо намда туһалжа байхаарнь тэрэниие хажуудаа байлгаха дуратайл байгааб. 14Гэхэдээ би шинии зүбшөөлгүйгөөр юумэ шиидэхэеэ хүсөөгүйб. Баалалтагүйгөөр, харин өөрынгөө һайн дураар һайн хэрэг бүтээбэлшни намда һайшаагдаха һэн.

15Шамтай ходо байхын тула Онисим саг зуура шамһаа ондоо тээшээ ошоһон байжа магадгүй. 16Мүнөө тэрэ ганса барлаг бэшэ, харин барлагһаа үлүү ехэ: тэрэ хайрата дүү гээшэ. Мүнөө би тэрээниие ехэл һайшаанаб. Харин хүн байһан хубидаа, Эзэнээр дүүшни гэжэ нэрлэгдэһэн хубидаа тэрэ шамда бүришье хайратай байхал.

17Ши намайе нүхэрни гэжэ һанажа байбал, намайе угтажа байһантай адляар лэ тэрэниие угтажа абаарай. 18Хэрбээ тэрэ шамда ямар нэгэ муу юумэ хэжэ, юумэ үритэй байбалнь, үриень намда тоогоорой. 19Тэрэ үриень түлэхэб гэжэ би, Павел, өөрынгөө гараар бэшэжэ байнаб. Ши өөрөө ами наһаараа намда үритэй һэнши гэжэ би шамда һануулнагүйб. 20Хайрата дүүмни, Христоосоор дүүмни гэжэ нэрлэгдэһэн хадаа Эзэнэй түлөө энэ үлзытэй һайн хэрэг бүтээжэ, тэрээгээрээ намайе баярлуулаарай, һаналыемни тэгшэлүүлээрэй даа.

21Хэлэһэн юумыемни хэхэш гэһэн этигэлтэйгээр эдэ бүхэниие шамда бэшэнэб. Хэлэһэнһээмни үлүүшье юумэ хэжэ болохош гэжэ би мэдэнэб. 22Тиихэ зуураа намда нэгэ таһалга бэлдэжэ байгаарай. Та бүхэнэй зальбаралые Бурхан дуулажа, намайе таанадта эльгээхэ гэжэ би найданаб.

Һүүлшын амаршалга

23Иисүүс Христоосой түлөө намтай суг түрмэдэ һуужа байһан Эпапраас, намтай хамта хүдэлжэ байһан 24Марк, Аристарх, Дэмаас, Луканар шамда мэндые хүргэжэ байна.

Эзэн Иисүүс Христоосой үршөөл хайра та бүхэнтэй оршожо байхань болтогой.25