‏ Proverbs 1

Һургаалай үнэ сэн

1Израилиин хаан, Давидай хүбүүн Соломооной һургаал.

2Энэ хадаа зондо мэргэн ухаа ба сахилта һургаал мэдэжэ абахыень,
ухаатанай хэлэһэн гүнзэгы бодолтой үгэнүүдые ойлгохынь тулада,
3болгоомжотой нарин, үнэн ёһоной, шударга,
сэхэ сэбэр ябадалай ёһо гуримда орохынь тулада;
4гэнэн хүндэ ухаансар долонгирые,
эдир залууда эрдэм, бодолготой холын хараа олгохын тулада үгтөө юм.
5Сэсэн мэргэн хүн шагнажа, мэдэлгэеэ арьбажуулха,
ухаатайшье зон зүбшэл заабари тэрээнһээ олохо.
6Хүнүүд үгүүлэлэй далда удхые, һургаал үгэ,
сэсэшүүлэй уран үгэ ба тэдэнэй таабаринуудые ойлгодог болохо.

Муу зонһоо һэргылэлгэ

7Эзэнһээ бэшэрхэ гээшэ сэсэн мэргэн ухаанай эхин юм.
Харин мунхаг тэнэгүүд лэ сэсэн ухаае, һургаал заабариие үзэн ядадаг.

8Хүбүүмни, эсэгынгээ һургаал шагнажа бай,
эхынгээ заабари тоонгүй бү бай.
9Үнэн дээрэ энэшнил үзэсхэлэнтэ сэсэгэй титим,
хүзүүнэйшни шэмэг бололтой.
10Хүбүүмни, нүгэлтэнэй шинии толгойе эрьюулхэдэнь,
үгэдэнь орожо бү байгаарай.
11Тэдэнэй шамда: «Бидэнтэй яба,
гэмгүй нэгэниие отожо һүнөөе.
12Үхэлэй орон мэтэ амидыгаар ба
доогуур нүхэн мэтэ бүхэлеэрнь залгин һалгая,
13үнэтэй зөөрииень сүм хуряажа,
гэрээ баялигаар дүүргэе.
14Бидэнтэй хамта жээрэб хаяарай,
хүрэнгэ зөөриеэ хамта эдлэхэбди», – гэжэ хэлэбэл,
15хүбүүмни, тэдэнтэй суг бү ябаарай,
нүгэлтэй зоной харгыһаа дары зайлаарай.
16Тэдэ зоной хүлнүүд муу тээшэ зоридог,
тэдэнэр шуһа урдахуулха гэжэ яарадаг.
17Шубуунай хараһаар байтар урдань
урьха табиһантай адли хэрэг бэзэ.
18Харин тэдэ өөһэдын шуһа урадхуулха,
өөһэдын ами хороохо урьха тодхоно гээшэ.
19Хүсэрхэн оложо абаха юумэнэй түлөө ябагшадай замынь тиимэ.
Тэрэ эд зөөриинь эзэрхэн абагшын ами наһые эсэстээ абажа һаладаг.

Сэсэн мэргэнэй уряа

20Сэсэн мэргэн гудамжа талмайнуудта зарлан дуулгажа,
21олон зоной үмэнэ,
хотын хашаагай үүдэнэй хажууда үгэеэ тунхаглана:
22«Гэнэн мунхаг таанар, хэды болотор гэнэнээ энхэрэн хайрлахабта?
Хэды болотор убайгүй зон убайгүйгөө урдаа барихаб?
Хэды болотор тэнэгүүд мэдэлгэ үзэн ядахаб?
23Анхарагты, минии зэмэлэл шагнагты,
би таанарта сэсэн ухаанай һүр һүлдэһөө дуһаан хүртөөхэм,
тиин хэлэхэ үгэеэ хэлэхэм.
24Минии дуудахада, таанар буруу хараат,
гараа һарбайхадам, хэншье анхараагүй.
25Бүхы заабаринуудһаамни арсаат,
шүүмжэлгэнүүдыемни шагнаагүйт.
26Харюудань таанарай гай тодхорто баярлахам гээшэ;
дээрэтнай бууһан аймшаг зоболон харан эльгэ хатахаб.
27Таанар руу аймшаг зоболон аадар шэнги адхарха,
гай тодхор шуурган мэтэ сохижо бууха.
Үзэгдөөгүй гашуудал, ядарал тархи дээрэтнай бууха.
28Тэрэ үедэ намайе дуудахада, харюу байхагүй.
Тэдэ намайе бэдэрхэдээ, олохогүй.
29Тэдэнэр мэдэлгэ үзэн ядажа,
Эзэнһээ бэшэрхэ гэжэ байгаагүй.
30Минии заабари тоогоогүй,
минии зэмэлэл хайхараагүй.
31Тиин тэдэ өөрын үйлэһөө хэһээлтэ амсаха болоно.
32Гэнэн мунхагууд өөрын үсэдһөө хосорхо табилантай.
Тэнэгүүдэй алмайрал тэдэниие һүнөөхэ.
33Харин намайе шагнадаг хүн аюулгүй байжа,
гай тодхорһоо айнгүй амгалан тайбан һууха».