‏ Proverbs 10

Соломоон хаанай нэгэдэхи соморлиг

1Соломооной һургаалта үгэ.

Сэсэн хүбүүн эсэгэеэ баярлуулдаг,
мунхаг хүбүүн эхэдээ сэдьхэлэй зоболон болодог.
2Үнэн шударга бэшээр оложо абаһан зөөри ашагүй,
харин шударга зүб байдал үхэлһөө зайлуулдаг юм.
3Үнэн шударга хүнэй гэдэһээ үлдэхые Эзэн тэбшэдэггүй,
харин нүгэлтэнэй хүсэлэнгые саашань түлхидэг.
4Залхуугай гар ядуу байдалда асардаг,
оролдосотой хананхатайн гар баян болгодог.
5Ухаантай хүн ургасаяа зунай сагта хуряана,
харин хуряалгын үедэ унтажа байһан хүн нэрээ хухараг.
6Үнэн ёһото хүнүүд үреэлдэ хүртэдэг,
харин хара һанаатанай аманда – хүсэрхэл.
7Үнэн ёһото ябадалтай хүн һайн дурасхаал үлөөнэ,
нүгэлтэ хүнэй нэрэ үгы болодог.
8Сэсэн хүн ондоо хүнэй заабари хүлеэжэ абадаг,
салшаатай мунхагынь һүйдхэлдэ орохо.
9Үнэн шударга замаар алхагша аюулһаа зайладаг,
гажуу харгыда гараһан хүн эсэстээ элишэлэгдэдэг.
10Нюдөөрөө эмнигшэ хүн гомодхоодог.
Салшаатай мунхаг хүн һүйдхэлдэ орохо.
11Үнэн шударга хүнэй аман амидаралай унда олохо.
Хуулигүй зоной амандань хүсэрхэл нюугдадаг.
12Үзэн ядалга арсалдаа түрүүлдэг,
дуран нүгэл хилэнсые дабадаг.
13Ухаатай хүнэй аманһаа сэсэн мэргэн олдоно.
Харин ухаагаар дутаһан нэгэндэ нюрга шабхадаха һабаа олдоно.
14Сэсэшүүл мэдэлгые бүрин хадагалдаг,
харин тэнэгэй аман һүйдхэл асардаг.
15Баян хүнэй баялиг бэхижүүлһэн хэрэм мэтэ,
үгытэй хүнэй дуталга һандархай үлэгдэл мэтэ.
16Үнэн шударга хүнэй ажалынь амидарал болодог,
хара һанаатын амжалтанууд нүгэлдэ түлхидэг.
17Һургаал сахидаг хүн амидаралай замаар ябадаг,
харин зэмэлэл тоодоггүй хүн төөрихын замда ошодог.
18Худалшын аман үзэн ядалга нюудаг.
Хоб тараадаг хүн мунхаг мүн.
19Үгын олошорходо нүгэл зайлашагүй,
харин амаа захирдаг хүн ухаатай болоно.
20Үнэн шударга хүнэй хэлэн салин сагаан мүнгэн мэтэ,
муу нүгэлтын сэдьхэлэй сэн хэдыхэн гээшэб?
21Үнэн шударга хүнэй үгэ олон хүниие хамгаалдаг,
мунхагууд ухаанай дутууһаа үхэдэг.
22Эзэнэй үреэл баян болгодог,
тэрээнтэй гашуудал мэдэхэгүйш.
23Муу хэрэгүүдынь мунхагта зугаа болодог,
ухаатай хүн сэсэ мэргэндэ баясадаг.
24Муу нүгэлтэ айдаг зүйлтэйгээ ушарха,
шударга хүнэй хүсэл бэелхэ.
25Хуй һалхинай үнгэрхэдэ муу хүн алга болодог,
харин үнэн шударга хүндэ мүнхын һуури байдаг.
26Залхуу хүн ажалда тэрэниие эльгээгшын аман соонь ороһон гашуун үбһэндэл,
нюдынь хордохооһон утаандал адли.
27Эзэнһээ бэшэрэлгэ ами наһа утадхадаг,
хара һанаатанай он жэлнүүд богони болодог.
28Зүб хүнэй этигэл найдабаринь баяр баясхалан болодог,
хара һанаатанай найдабари мүхэдэг.
29Эзэнэй зам шударга хүндэ түшэг,
хуули бусые үйлэдэгшэдэ һүйдхэл.
30Үнэн шударга хүн хэзээшье ганхадаггүй,
харин нүгэлтэ хүн дэлхэйдэ тогтохогүй.
31Һайн хүнэй аманһаа мэргэн ухаагаар анхилха,
харин хорлогшын хэлэн отологдохо.
32Үнэн шударга хүнэй аман зүб тээшэнь заабари үгэдэг,
хорото нэгэнэй аманһаа буруу юумэн гараха.