‏ Proverbs 11

Ниитын журамшаһан ёһо

1Алдуутай шэгнүүр Эзэнэй зэбүүсэл түрүүлдэг,
зүбөөр шэгнэлгэ Тэрэнэй һанаанда таараха.
2Дээрэлхүү зантай хүн нэрээ хухална,
даруу зантай хүн сэсэн ухаатай болодог.
3Сэхэ сэбэр хүнүүдые үнэн шударга байдал хүтэлдэг,
хара һанаатай зониие хуурмаг байдалынь һүнөөдэг.
4Эзэнэй шүүн хараха үдэртэ баялиг ямаршье туһа болохогүй.
Харин үнэн шударга хэрэгүүд үхэлһөө абарха.
5Сэхэ сэбэр хүниие зүб байдалынь тэгшэрүүлдэг,
харин хара һанаатан өөрын муу һанаанһаа һандардаг.
6Сэхэ хүниие үнэн шударга байдалынь абарна.
Харин этигэлгүй хара һанаатан үйлэдэһэн муу хэрэгтээ баригдаха.
7Нүгэлтэ хүнэй үхэлтэй сугтаа этигэл найдабаринь мүхэдэг,
тэрэнэй зөөридэ найдалгань таһаран хосордог.
8Үнэн шударга хүн тодхорһоо мултардаг,
нүгэлтэй муу тэрэнэй орондонь ородог.
9Һүзэггүй хүн амаараа хүршэдөө хоро хүргэдэг,
харин үнэн хүниие мэдэлгэнь абарна.
10Үнэн хүнэй дэбжэлтэдэ хотын зон булта баясана,
хорон һанаатын мүхэхэ сагта баяр хүүр баһал болодог.
11Үнэн шударга хүнэй үреэлөөр хото суурхадаг,
нүгэлтэнэй хэлэһэниинь хотые доройтуулжа болодог.
12Ухаа муутай хүн хүршэдөө үзэн ядаһанаа мэдүүлдэг,
мэргэн хүн дуугай байдаг.
13Задагай аматай хүндэ нюуса юумэ хэлэжэ болохогүй,
харин этигэхээр үнэн хүн нюуса барижа шададаг.
14Ударидалга муутай арад түмэн унадаг,
харин олон бэрхэ зүбшэлэгшэдтэй зон абарагдадаг.
15Хари хүнэй түлөө гар даагша хүн үнэхөөрөө зобоно,
харин даалга абаагүй хүн аюулгүй байна.
16Нигүүлэсхы сэдьхэлтэй эхэнэр зоной хүндэдэ хүртэдэг.
Удамаршад баялиг олоно.
17Буянтай хүн сэдьхэлээ тэдхэдэг.
Хэрзэгы шэрүүн хүн сэдьхэлдээ зоболон асардаг.
18Нүгэлтэй хүн хуурмаг шагнал олоно,
харин үнэн шударга хүн ёһотой шагналда хүртэнэ.
19Шударга үнэниие дахагша амидаралда хүрэнэ.
Хорото мууе дахагша өөрын үхэл тээшээ яарана.
20Забхайрһан сэдьхэлтэй хүн Эзэнэй зэбүүсэл түрүүлдэг.
Гэмгүй хүн Тэрэнэй талархалда хүртэдэг.
21Хара һанаатан зайлашагүй хэһээлтэдэ орохо.
Харин үнэн шударга хүнэй үрэ удамынь сүлөөлэгдэхэ.
22Уймар эхэнэрэй сэбэр гоёнь
гахайн хоншоорто зүүһэн алтан гарьха мэтэ.
23Үнэн шударга хүнэй хүсэлэй бэелэл үргэлжэ һайхан,
харин хоротой хүнэй хүсэл Эзэнэй хилэнсэдэ асардаг.
24Зөөриеэ хубаан тараажа байдаг хүнэй зөөри нэмэжэ байха,
тиихэдэнь харамнадаг хүн үгырхэ ушар байха.
25Элбэг гартай, харуу бэшэ хүн зөөритэй байха,
бусадые тэнхэрүүлэгшэ өөрөө тэнхээ орохо.
26Таряагаа нюужа нөөсэлэгшэ зоной хараалда хүртэнэ.
Харин тэрэнээ худалдаһан хүн үреэл абана.
27Һайниие үйлэдэхэ гэжэ оролдоһон хүн аша хайрада хүртэхэ,
мууе бэдэрэгшэдэ тэрэнь олдоод байха.
28Гансал баяндаа найдагша хүн унаха.
Үнэн шударга хүн ургажа байһан ногоон набша мэтэ һалбарха.
29Өөрын гэртэ гай тодхор ушаруулдаг хүн хооһон үлэдэг.
Тэнэгынь сэсэ мэргэнэй зараса болохо.
30Үнэн шударга хүнэй үрэ жэмэс хадаа
амидаралай модон болоно.
Сэсэн хүн зоной сэдьхэл өөр тээшээ татана.
31Үнэн шударга хүн хүртэхэ ёһотойгоо энэ дэлхэй дээрэ хүртэдэг һаань,
хара һанаатан ба нүгэлтэн хэды дахин үлүү харюуда хүртэхэ ушартай.