‏ Proverbs 12

Үнэн зүб – амидаралай ундан

1Һургаалаар байха дуратай хүн мэдэлгэ абаха гэжэ оролдодог.
Харин зэмэлэл үзэн ядадаг хүн хадаа мунхаг болоно.
2Һайн хүн Эзэнэй талархалда хүртэнэ.
Муу һанаатай хүниие Тэрэ буруушаана.
3Хара һанаан хүнэй түшэг тулгуури болоогүй юм.
Харин шударга хүнэй үндэһэн хэзээдэ хүдэлдэггүй.
4Һайн эхэнэр нүхэртөө титим болохо,
харин нүхэрөө эшэгүүридэ оруулдаг эхэнэр тэрэнэй яһан соо бии болоһон эдеэрэ мэтэ.
5Шударга үнэн хүнэй бодол һанаан сэхэ байдаг,
харин хара һанаатын хүсэлдэ хара мэхэ.
6Хара нүгэлтэнэй үгын саана шуһа жүрөөдэлгэ нюугаатай,
харин үнэн сэдьхэлтэй хүнэй аман аюулһаа абарха хэшэгтэй.
7Хара һанаата һүйдхэлдэ ороходоо, һүнэн ошодог,
харин үнэн шударга хүнэй гэр бүтэн үлэдэг.
8Хүн ухаан бэлигээрээ хүндэлүүлдэг,
харин тэнэгые зон тоодоггүй.
9Эдихэ эдеэгүй аад, үзүүр угтайб гэгшэһээ
нэрэгүй аад, зарасань дээрэ.
10Зүб шударга хүн малайнгаа түлөө һанаа зободог.
Хара һанаатын хайрлаха сэдьхэлыньшье нимгэн бэшэ.
11Өөрын газарта хүдэлһэн хүн талха таряагаар элбэг байха.
Харин удхагүй юумые намнагша ухаагаар дутуу болоно.
12Хуулигүй хүн хара мэхээр олзо омог хэнэ.
Харин үнэн шударга хүнэй үндэһэн үрэ жэмэс ургуулна.
13Хара нүгэлтэ үгынгөө тэнэгтэ урьхадуулдаг,
үнэн шударга хүн зоболонһоо зайладаг.
14Хэлэһэн үгынгөө үрэ жэмэсэй һайханһаа хүн садана,
хүнэй хэһэн хэрэгээр харюунь бууха.
15Тэнэгэй зам өөрынь нюдэндэ зүб харагдадаг.
Сэсэн хүн заабари шагнадаг.
16Тэнэгэй уур сухал тэрэ дары харагдадаг,
ухаатай хүн доромжолгошье тэбшэдэг.
17Мэдэхэеэ хэлэдэг хүн үнэниие хэлэдэг,
хуурмаг хүнэй гэршэнь мэхэ байдаг.
18Бодолгүй яридаг хүн эритэ мэсээр дайраһандал,
сэсэнэй үгэ эмтэй адли.
19Үнэншын үгэ мүнхэ наһатай,
худалшын үгэ агшан зуура үгы болодог.
20Хорото муу юумэ һэдэгшын хара һанааниинь зүрхэндэнь үлэдэг,
харин амар тайбаниие сэдьхэгшэдэ баяр баясхалан байдаг.
21Үнэн шударга хүндэ хоро тохёолдохогүй,
харин хара нүгэлтэдэ гай тодхор ушарха.
22Эзэн худалшаһаа зэбүүсэдэг,
үнэниие хэлэгшэ Тэрэнэй талархалда хүртэдэг.
23Бодолтой хүн мэдэсэеэ түргэн элирүүлдэггүй,
мунхагай үгэнүүд мунхагынь харуулдаг.
24Ажалша хүн ондоо хүниие ударидан дахуулдаг.
Залхуу хүн богоол болодог.
25Шаналал хүниие дарадаг,
эелдэр зулгы үгэ тэрээндэ баяр асардаг.
26Үнэн шударга хүн хажуудахидаа газаршан болодог.
Нүгэлтэнэй зам өөрыень төөрюулдэг.
27Залхуу хүн хүсэһэндөө хүрэхэгүй,
ажалша хүндэ амжалта ерэдэг.
28Үнэн шударга хүнэй зам дээрэ амидарал байха,
тэрэнэй замда үхэл байхагүй.