‏ Proverbs 20

Хоб үгэ тараажа бү бай

1Үзэмэй дараһан архи хүнэй ухаа балартуулдаг.
Үлүүсэ уудаг хүн хэзээдэшье ухаатай байхагүй.
2Хаанай уур хилэн арсаланай хэрхирээнтэй адли.
Тэрэниие уурлуулха гээшэ өөртөө муу һанаһантай адли.
3Хэрүүл арсалдаанһаа зайлагшые хүндэлхөөр,
харин тэнэгүүд хэрүүлдэ оролсоод лэ байдаг.
4Залхуу хүн газараа үбэлдөө хахалдаггүй,
хуряалгын үедэ юуншье тэрээндэ олдохогүй.
5Хүнэй сэдьхэл һанаан гүнзэгы булаг мэтэ,
ухаатай хүн тэрээнһээ удхажа абадаг.
6Олон зон өөһэдыгөө үнэн сэхэб гэжэ һайрхадаг,
теэд найдабаритай нэгэниие олохо аалши?
7Үнэн шударга хүн гэм зэмэгүй ябадаг.
Тиимэ хүнэй үри хүүгэд үреэлдэ хүртэнэ.
8Хэрэг шүүлгын шэрээдэ һууһан хаан
харасаараа хамаг муу зүйлые элирүүлдэг.
9Хэн «Би зүб мүрөөр үйлэ хэнэб,
нүгэл хилэнсэгһээ зайлааб» гэжэ хэлэжэ шадахаб?
10Буруу шэгнэдэг шэгнүүрһээ,
худалаар харуулдаг хэмжүүрһээ Эзэн зэбүүсэдэг.
11Өөрын үйлэ хэрэгүүдээр эдир залуушье һайн муугаа харуулдаг.
12Дуулаха шэхэн, хараха нюдэн – энээниие Эзэн бүтээгээ.
13Унтаха дуратай һаа, үгырхэш.
Сагаа ажалда гэжэ ашагла, тиигэбэл хоол хүнэһөөр элбэг байхаш.
14Худалдан абагша «Энэш муу, тэрэш муу» гэдэг,
абаад ябаһанай удаа тэрэнээ һайрхадаг.
15Алта мүнгэн болон эрдэни зүүдхэл байбашье,
ухаатай юумэ хэлэдэг аман бүришье үнэтэй.
16Хари хүнэй үри шэриин түлөө
харюусалга абаһан хүн самсаяа алдаха.
17Буруу замаар оложо абаһан талхан амтатай байжа болохо юм.
Гэбэшье эсэстээ аман соо хайр байжа болохо.
18Түсэб зохёоходоо, зүбшэхэ хэрэгтэй.
Мэргэн зүбшэлэй удаа дайлалда.
19Суу тараадаг хүн нюуса задалдаг.
Хоб шэрэдэг хүнтэй бү харилса.
20Эхэ эсэгэеэ хардаһан хүнэй амидаралай дэн унтарха.
21Эхиндээ бэлэн олдоһон угай зөөри
буян хэшэгтэй байхагүй.
22«Хорон муугай түлөө хэһээхэм» гэжэ бү хэлэ.
Эзэндэ найда, Тэрэ шамайе хамгаалха.
23Худал гиирнүүдһээ, зүб бэшэ шэгнүүрһээ
Эзэн зэбүүрхэдэг.
24Хүнэй алхамуудые Эзэн шэглүүлдэг.
Хүн өөрынгөө зам хэр мэдэжэ шадахаб?
25Тангариг түргэн үгөөд, удаань татагалзахань
хүнэй хубида хабха юм.
26Сэсэн хаан муу нүгэлтэниие үлеэн һалгаха,
дээрэнь тээрмын шулуу эрьюулхэ.
27Хүнэй һүнэһэ заяан хадаа
тэрэнэй досоохиие үзэдэг Эзэнэй дэн юм.
28Этигэл ба үнэн хааниие хамгаалдаг,
үнэн сэдьхэлээр хаан түрэ бэхижэдэг.
29Залуушуулые хүсэ шадалынь,
үбгэдые буурал үһэниинь шэмэглэдэг.
30Муу бодолһоо хэһээлтэ зайлуулдаг.
Хүнэй доторые сохилго сэбэрлэдэг.