‏ Proverbs 21

Даруу зан ба оролдолго хэшээл

1Хаанай зүрхэн Эзэнэй мутарта адхаатай байһан уһанай урасхал мэтэ.
Тэрэ хүсэһэн тээшээ шэглүүлдэг.
2Хүн бүхэнэй зам өөртэнь сэхэ шэнгеэр үзэгдэдэг.
Харин Эзэн хүнэй зүрхые сэгнэдэг.
3Үнэн сэхэ ба шударга үйлэ
Эзэндэ үргэһэн үргэлһөө үлүүгээр сэгнэгдэдэг.
4Хуулигүй зониие илгаруулдаг ехэрхүү хараса болон
бардам сэдьхэл хадаа тэдэнэй нүгэл болоно.
5Хэшээл оролдолготой хүнэй түсэбүүд аша дэмбэрэлтэй байдаг.
Яаралтай хүн хохидолдо орохо ушартай.
6Худалша хэлээр баялиг олохо ябадал
хооһон һалхи намналга, үхэлэй занга бэдэрэлгэ мүн.
7Нүгэлтэн шударга һайн үйлэһөө арсадаг һэн тула
тэдэнэй хара һанаата хэрэгүүдынь өөһэдыень үгы хэнэ.
8Нүгэлтэй хүнэй харгынь гажуу байдаг.
Нүгэлгүй хүнэй хэһэн үйлэ хэрэгүүд сэхэ сэбэр.
9Хэрүүлшэ эхэнэртэй томо байшан соо һуунхаар
гэрэй хушалтын буланда амидарһан дээрэ.
10Хара нүгэлтын сэдьхэл мууе маша ехээр хүсэнэ.
Ямаршье хүн тэрэнэй нюдэндэ энэрэл хайра олохогүй.
11Убайгүй баһамжалагшын хэһээгдэхэдэ, гэнэн нэгэн ухаа ородог.
Сэсэн бодолтойе һургахада, тэрэ мэдэлгэ абадаг.
12Бурхан хуули ёһо эбдэгшын хэрэгүүдые мэдэжэ байдаг ба
тэрэ замһаань мүхэлтэ руу унагаадаг.
13Ядуу хүнэй хашхархада дуулаагүй хүн
нэгэ сагта өөрөө хашхархадаа, харюу дуулахагүй.
14Хүнэй сухал дарахын тулада һэмээхэн бэлэг үгэдэг.
Нюусаар үгэһэн бэлэг ехэ уур номгоруулжа болодог.
15Үнэн шударга шиидхэл гэмгүй хүндэ баяр болодог,
гэм хэгшэдэ айдаһа асардаг.
16Ухаантанай замһаа төөриһэн хүн
үхэгшэдэй суглаанда һуури эзэлнэ.
17Зугаа сэнгэлдэ дуратай хүн үгырдэг.
Үзэмэй дараһан архинда ба хангал тоһондо дурлаһан хүн хэзээшье баяжахагүй.
18Үнэн шударга хүндэ хүргэһэн хоро муугай түлөө
нүгэлтэн түлэхэ ушартай.
Сэхэ сэбэр хүндэ хүргэһэн хоро муугай түлөө
мэхэшэ хуурмаг хүн харюусаха ёһотой.
19Түргэн сухалтай, хэрүүлшэ эхэнэртэй һуунхаар
сүл губида амидарһан дээрэ.
20Сэсэн хүнэй гэртэ үнэтэ нөөсэ таһархагүй.
Мунхаг хүн тэрэнээ дары залгин һалгадаг.
21Үнэн шударгада ба энэрэл хайрада эрмэлзэдэг хүн
ажана амидарал, зүб байдал ба нэрэ хүндэ олохо.
22Сэсэн мэргэн хүн хүсэтэнэй хото дайлан абадаг,
тэдэнэй найдаһан бата хэрэмые һандаргажа шададаг.
23Ама хэлээ татадаг хүн сэдьхэлээ аюулһаа хамгаална.
24Хадхуу шэрүүнээр, бардамаар аашалагша хүн
хэрзэгыдээ дашууран үлүү гарадаг.
25Залхуугай хомхой хүсэлэн тэрэниие үхэлдэ хүргэхэ ушартай,
тэрэнэй гарнууд ажалһаа тэрьелдэг ха юм.
26Үдэрһөө үдэртэ тэрэ шунахай хүсэлдөө тамалагдана,
харин буянта хүн татагалзангүй үгэхэ соогоо үгырдэггүй.
27Нүгэлтэнэй үргэһэн үргэлыншье бузартай,
илангаяа хорон муу һанаагаар үргэһэн үргэл бүришье муухай.
28Хуурмаг гэршэлэгшэ мүхэдэг,
харин үнэниие байһан соонь хэлэдэг хүнэй үгэ эгээл найдамтай.
29Нүгэлтэ хүн дошхон нюуртай,
үнэн шударга хүнэй замынь сэхэ.
30Эзэнэй һанаагүйдэ мэргэн сэсэн, оюун ухаан,
хүнэй түсэб түлэблэл юуншье бэшэ.
31Хүлэг моридые байлдаанда бэлдэбэшье гэлэй,
илалтань Эзэнэй гарта байдаг.