‏ Proverbs 22

Ядуушуулые бү хаша

1Һайн нэрэ соло баялиг зөөриһөө дээрэ.
Зоной хүндэ алта мүнгэнһөө үлүү.
2Үгытэй ядуу хоёр зэргэ ябаха табилантай.
Ядуу хүнииешье, баянииешье Эзэн бүтээгээ.
3Бодолтой хүн гай бэрхэшээл урид хаража, тэрээнһээ зайладаг.
Гэнэн хүн тэрээн руу сэхэ ошожо хохидолдо ородог.
4Эзэнһээ бэшэрэлгын ба даруу зангай шагнал хадаа
амидарал, алдар хүндэ, зөөри баялиг юм.
5Худалша хуурмаг хүнэй замда үүргэнэ ба занга байха.
Ами наһаа сэгнэдэг хүн тэрэ бүгэдэһөө зайлаха гэжэ оролдодог.
6Эдир залууе замайнь эхиндэ зүб ябахыень һурга,
үтэлхэдөөшье тэрэ харгыһаа хадуурхагүй.
7Баян хүн үгытэй ядууе зонхилдог,
үритэй хүн үгэгшын зараса болодог.
8Үнэн шударга бэшэ ябадал таригша
өөртөө зоболон хуряаха.
Тиигэжэ уур хилэнгэйнь һабаа үгы болохо.
9Гар бардам хүн үреэлтэй,
тиимэ хүн ядуу хүндэ талханһаа хубаалдан үгэдэг.
10Хуулигүй баһан доромжологшые үлдэхэ хэрэгтэй.
Тэрэнэй ошоходо хёморол үгы болохо, хэрүүл хараал замхаха.
11Сэбэр һайхан сэдьхэлтэй, үгэ яряандаа зөөлэн хүн
хаандашье анда нүхэр болодог.
12Эзэнэй мэлмы үнэниие хамгаалдаг.
Хуули эбдэгшын үгэ Тэрэ буруушаадаг.
13Залхуу хүн «Газаа арсалан байна.
Би гудамжада гарабал, алуулхаб» гэжэ хэлэдэг.
14Һадар эмын аман занга мэтэ.
Эзэнэй хараалда хүртэгшэ тэрэ зангада унажа ородог.
15Хүбүүнэй толгойдо тэнэглэл халдажа болодог,
һургаалай һабаа тэрээнһээ холодуулдаг.
16Өөртөө үлүүе олохын тулада ядаһан зониие хашадаг
баяшуулда билдагуушалан үгэдэг хүн үгырэн хооһорхо.

Сэсэшүүлэй һургаалнууд

17Шэхээ табин, сэсэшүүлэй үгэ шагнадаг бай,
минии һургаалда анхаралаа хандуула.
18Эдэ үгэнүүдые сээжэдээ хадагалжа байбалшни урматай,
хододоо хэлэн дээрэшни бэлэн байг.
19Тиин Эзэндэ этигээрэй гэһэндээ би мүнөө энээниие заанаб.
20Би шамда зорюулжа, заабари ба мэдэлгэ болохо
гушан тобшо һургаал бэшээб.
21Үнэнэй үгэ шамда мэдүүлжэ, шамайе эльгээһэн хүндэ
зүб харюу үгэжэ шадахыншни тулада юм.
22Ядуу хүниие ядуу гэжэ зөөрииень буляажа бү бай.
Зобожо зүдэрһэн хүниие хаалгын хажууда бү дарла.
23Эзэн ядуу хүнүүдэй гомдол шүүн шиидхэжэ,
тэдэниие зобооһон хүнүүдэй амииень абана.
24Уур хилэндэ баригдаһан хүндэ бү дүтэлэ ба
түргэн сухалтай хүнтэй бү ханила.
25Тиигэбэл ши тэдэнэй замаар ябажа,
өөртөө занга түхеэрхэш.
26Бусадай түлөө үгэеэ үгэжэ,
үритэй хүнэй гар даахые бү оролдо.
27Түлэжэ шадахагүй байгаад,
унтажа байһан оро дэбисхэрээ абхуулха туйлдаа хүргөөд яахашниб?
28Эсэгэнэрэй табиһан мужаа бү хүдэлгэ.
29Ажалдаа шадамар хүниие хараа гүш?
Тэрэ хаанай урда зогсохо.
Нэрэ түрэгүй юрын хүнүүдтэ алба хэхэгүй.