Pro 24 | BxrBBL2024 | STEP | Муу зондо бү атаарха, тэдэнэй нэгэн болохые бү хүсэ.

‏ Proverbs 24

1 Муу зондо бү атаарха, тэдэнэй нэгэн болохые бү хүсэ.
2 Тэдэ хүсэрхэл һэдэжэ ябадаг, ама хэлэниинь гай зоболон түхеэржэ байдаг.
3 Гэр орониие сэсэн мэргэн зохёодог, оюун ухаагаар тэрэ бэхижэдэг.
4 Мэдэлгын ашаар ордон үргөөнүүд эрхим баялигаар дүүрэнэ.
5 Сэсэн хүн шадалтай, ухаатай хүн хүсөө батадхана.
6 Дай хэхэдээ заабари шагна. Олон зүбшэлэгшэдтэй байхада илалта туйлагдаха.
7 Сэсэн мэргэн хадаа тэнэг мунхагта хүртэшэгүй үндэр. Хотын хаалгын дэргэдэ тэрэ амаашье нээхэгүй.
8 Мууе хэхээр түсэблэдэг хүниие муу мэхэтэй гэжэ нэрлэдэг.
9 Тэнэгэй һэдэлгэнүүд нүгэл гээшэ. Эшэхэ гайхахаяа мэдэхэгүй, һэнгэргүй хүндэ зон дурагүй.
10 Хэрбээ ши хүндэ сагта доройтохо һаа, тэнхээ шадалшни һула байна.
11 Алагдаха газар руугаа туулгажа ябаһан хүнүүдые абара. Үхэлэй һабарта орогшодто туһалхаһаа арсаха юм аалши?
12 «Бидэ энээн тухай мэдээгүйлби» гэжэ ши хэлэхэш. Зүрхые Туршагша энээниие анхаралдаа абана, һүнэһыеш Хамгаалагша энэ бүхэниие мэдэнэ. Хэһэн үйлын харюу Тэрэ хүнүүдтэ үгэхэ.
13 Зүгын бал эди, тэрэ ехэ һайн, балтай һархинаг шинии хоолойдо аятай байха.
14 Сэдьхэлдэшни сэсэ мэргэн тэрээндэл адли гэжэ мэдэ. Сэсэниие оложо абабалшни, шамда ерээдүй байха, этигэл найдабариш мүхэхэгүй.
15 Хара нүгэлтэ этэгээд, үнэн шударга хүнэй гэрэй хажууда тэрэниие отожо бү хэбтэ. Ажаһуудаг газарынь бү һандарга.
16 Юундэб гэхэдэ, үнэн шударга хүн долоо бүдэрөөшье һаа, бодохо, харин нүгэлтэд нэгэ бүдэрбэл, өөдэлхэгүй.
17 Дайсанайнгаа унахада хүхихэ хэрэггүй, бүдэрхэдэнь сэдьхэлээ баярлуулжа бү бай.
18 Мууда баярлаха гээшэ Эзэнэй нюдэндэ һайхашаагдахагүй, дайсанһааш уур хилэнгээ зайлуулжа магад.
19 Хорон һанаатанда бү сухалда, муу нүгэл үйлэдэгшэдтэ атаархажа бү бай.
20 Юундэб гэхэдэ, хорото хэрэгүүдтэ ерээдүй гэжэ байхагүй, хара нүгэлтэнэй дэн бүхэдэг.
21 Хүбүүмни, Эзэнһээ болон хаанһаа түбэгшөөдэг бай. Урбагшадһаа холо бай.
22 Юундэб гэхэдэ, гай гамшаг тэрээнһээ гэнтэ ерэхэ. Хэды ехэ эбдэрэл асархыень мэдэхэгүйш.

Сэсэшүүлэй үшөө хэдэн һургаал

23 Сэсэшүүл иигэжэ хэлэдэг. Хэрэг шүүлгэдэ али нэгэнэй тала бариха гээшэ һайн хэрэг бэшэ.
24 Хуулигүй нүгэлтэниие зүб гэжэ хэлэгшэдтэ арад зоной хараал хүртэдэг, хамаг обог угсаатан тэдэниие үзэн ядадаг.
25 Харин нүгэлтэниие хэһээгшэдтэ аша туһатай, тэдээндэ һайн үреэл хүртэхэ.
26 Зүб харюу үгэлгэ урал руу таалаһантай адли.
27 Гэр барихын урда газаахи ажалаа дүүргэжэ, хээрэ талада байһан юумэеэ суглуулан бэлэн болго. Тииһэн хойноол гэрээ бари.
28 Шалтаггүй дүтын хүндэ эсэргүү гэршэлжэ болохогүй. Шинии аманда мэхэ бү байг.
29 «Тэрэ намда яажа ханданаб, тиимээр лэ би ханданаб, харюуень тэнсүүгээр хүргэнэб» гэжэ бү хэлэ.
30 Нэгэтэ би залхуугай таряалангай хажуугаар, ухаагүй хүнэй уһан үзэмэй сэсэрлигэй хажуугаар үнгэрбэб.
31 Бүхы талмайнь бог үбһэндэ дарагданхай, хаа хаанагүй үүргэнэ ургашанхай, шулуун хашаань унанхай байба.
32 Энээниие би өөр дээрээ түйжэ үзөөд, иимэ юумэ ойлгобоб:
33 «Нэгэ жаахан унтая, бага зэргэ зали абая, гараа жаахан амараае» гэһээр байтар,
34 үгытэй байдал зольбо мэтэ ерэжэ, ядарал дээрмэшэн мэтэ бууха.