‏ Proverbs 25

Дайсантай яажа харилсахаб

1Иудын хаан Хэзэкияагай зарасанарай суглуулан нэгэдхэһэн Соломооной бусад һургаалнууд.

2Хэрэг ябадал нюухань Бурханай алдар суу. Тэдээниие оложо элирүүлхэнь хаашуулай алдар суу.
3Тэнгэриин үндэр, газарай намдуу гүн мэтэ хаашуулай зүрхэ сэдьхэл хүртэшэгүй холо.
4Сагаан мүнгые холисоһоонь илган сэбэрлэ, мүнгэшэ дарханай саб амһарта бүтэхэ.
5Хаанай хажууһаа хуулигүй нүгэлтэниие һалган холодуула, хаан шэрээ үнэн шударгада тулан бэхижэхэ.
6Хаанай урда өөрыгөө бү үргэмжэлэ, амбан ехэшүүлэй зэргэдэ бү зогсо.
7Ехэ ноёдой үмэнэ доромжодо оронхаар доохонуур зогсоод, «Дээшээ морилогты» гэжэ хэлүүлэгшэнь дээрэ бэшэ юм гү? Хараһан юумэндэ
8заргалдахаяа бү яара. Хажуудахи хүншни шамайе аягүй байдалда оруулхадань юу хэхэ болонош?
9Хажуудахи хүнтэй заргалдахадаа, өөрын хэрэгһээ гадуур бү гара. Бусадай нюуса бү соносхо.
10Тэрээниие дуулаһан хүн нэхэн зэмэлжэ болохо. Тиигэбэл буруутан боложо нэрээ гутахаш.
11Саг соогоо хэлэгдэһэн зүб үгэ гээшэ мүнгэн хээ угалзада шэрэгдэһэн алтан алим шэнги.
12Зэмэлэлгын мэргэн үгэ гээшэ шэхээ табин соносогшодо алтан һиихэ ба шэжэр алтан зүүдхэл мэтэ.
13Найдалтай элшэн тэрэниие эльгээгшэдэ таряа хадалгын халуун үедэ саһанай ороһон һэрюун мэтэ. Тэрэ эзэнэйнгээ сэдьхэл тэнхэрүүлнэ.
14Үгэхэ бэшэ аад, бэлэгүүдээ һайрхагша бороогүй үүлэн ба һалхин мэтэ.
15Засаг баригшыешье тэсэбэреэр идхажа болоно. Уян эелдэр үгөөр яһашье хухалжа болоно.
16Зүгын бал олобол, садатараа эди. Хэтэрүүлээд, бөөлжэжэ бү бай.
17Хүршынгөө гэртэ үсөөхэн ошо. Тиигээгүй һааш, шамһаа залхууржа үзэн ядадаг болохо.
18Хажуудахидаа эсэргүү худал гэршэ болодог хүн һэлмэ, хурса үзүүртэй һурша болон шиидам мэтэ.
19Хэсүү сагта этигэлгүй хүндэ найдаха гээшэ үмхирһэн шүдэн, дохолон хүл мэтэ.
20Зобоһон сэдьхэлдэ дуу дуулаха гээшэ шарха дээрэ дабһа адхаһантай адли, хүйтэн үдэртэ хубсаһаа тайлаад ябаһан хүн мэтэ.
21Үлэсхэлэн дайсанда эдеэ үгэ, ангаа һаань, уһа уулга.
22Иихэдээ ши тэрэнэй толгой дээрэ шатажа байһан нүүрһэ обоолно гээшэш, Эзэн шамда харюулха.
23Хойноһоо үлеэһэн һалхин хура бороо асардаг, хоб жэбтэй хэлэн нюурнуудые ууртай болгодог.
24Хэрүүлшэ эхэнэртэй хамта һуунхаар хушалта дээрэхи буланда амидарһаниинь дээрэ.
25Ангажа тулиһан хоолойдо хүйтэн уһан ямар байдаг шэнги холын оронһоо ерэһэн һайн мэдээн сэдьхэлдэ тиимэ байдаг.
26Үнэн шударга хүнэй хуулигүй нүгэлтын урда һалаганан унаха гээшэ булагай уһанай булангиртаһантай, худагай бузарлагдаһантай адли.
27Зүгын бал хомхойрон эдихэ һайн бэшэ, нэрэ алдарай хойноһоо үрдилдэн тэмсэхэ алдар бэшэ.
28Бэеэ баридаггүй хүн ханагүй һандарһан хото мэтэ.