‏ Proverbs 28

Баянһаа үнэн шударгань дээрэ

1Муу хүн хүнэй мүрдөө мүшхөөгүй байхада зугадажа ябадаг, үнэн шударга хүн арсалан шэнги доро зүрхэтэй.
2Улас орондо һамуурал үймөөнэй болоходо удамаршад олон. Харин ухаалиг, мэдэлгэ ехэтэй хүнэй ударидал доро орон нютаг бүтэн үлэдэг.
3Ядуушуулые зобоодог үгытэй хүн таряалангые урыда урадхуулха аадар бороотой адли.
4Хуули тоодоггүй зон нүгэлтэниие магтадаг. Харин хуули сахидаг зон тэдээнтэй тэмсэдэг.
5Хара һанаатан шударга ёһые ойлгодоггүй, харин Эзэниие бэдэрэгшэд тэрээниие ойлгохо.
6Худал харгытай баянһаа үнэн шударга үгытэйнь дээрэ.
7Ухаатай хүбүүн Эзэнэй Хуули сахидаг, харин мүргүй зонтой нүхэсэдэг хүн эсэгынгээ нэрэ гутаадаг.
8Мүнгэ зээлилэн баялигаа арбижуулагша ядуушуулда энэрхыгээр хандадаг хүнэй түлөө мүнгэ нөөсэлдэг.
9Эзэнэй Хуули тоодоггүй хүнэй зальбаралшье зэбүүрхэмээр.
10Сэхэ харгытай зониие хорон муугай замда хүтэлэгшэ этэгээд өөрын малтаһан нүхэндэ унана. Харин гэмгүй хүн ашаг туһада залгамжалан хүртэхэ.
11Баян хүн өөрыгөө сэсэнби гэжэ тоолодог. Үгытэйшье һаа, ухаатай хүн тэрэниие дары ойлгодог.
12Үнэн шударга хүнүүдэй баярлахада олон зон омогорхон хүхидэг. Харин хара һанаатанай үргэмжэлэгдэхэдэ, зон нюураа хоргодуулдаг.
13Нүгэлөө нюун далдалагша амжалтада хүрэхэгүй. Харин гэмээ мэдэрэн наманшалагша хайрада хүртэдэг.
14Эзэнһээ бэшэрдэг хүндэ үреэл оршоно. Харин сэдьхэл хатуу хүн гай гасаланда ородог.
15Хуулигүй нүгэлтэй засаг баригша ядуушуулда хандахадаа, хэрхирһэн арсалан, үлэн баабгай мэтэ.
16Ухаагаар дутуу удамаршын дарлалга бүришье ехэ. Хомхой сэдьхэлээр олдоһониие үзэн ядадаг хүнэй үдэр хоногуудынь ута болохо.
17Хүнэй шуһа урадхуулһан хэрэгтэ хамаатай хүн үхэтэрөө бодхуул ябаха. Тиимэ хүниие бү дэмжэ.
18Гэм нүгэлгүй хүн абарагдаха болоно. Харин буруу харгыгаар ябадаг хүн нэгэтэ унажа магадгүй.
19Газараа элдүүрилдэг хүн талха таряагаар элбэг байха. Харин хии бодол намнан миин байһан хүндэ ядарал элбэг байха.
20Үнэн этигэлтэй хүн үреэлөөр баян һууха. Баяжаха гэжэ яарадаг хүндэ хэһээлтэ байха.
21Нэгэнэй тала бариха гээшэ һайтай бэшэ хэрэг: тиимэ хүн зүһэм хилээмэнэй түлөө нүгэл үйлэдэдэг.
22Хомхой хобдог хүн зөөри баялиг намна намнаһаар, тэрэнэй хойноһоо ядаралай ерэхые анхаржа ойлгодоггүй.
23Үлүүдэ магтагшада орходоо зэмэлэгшэ хүниинь эсэстээ һайн.
24Эхэ эсэгынгээ зөөри буляахадаа, «Энэ нүгэл бэшэ» гэжэ хэлэдэг хүн дээрмэшэнтэй адли.
25Бардам хүн хэрэлдээ үүсхэдэг, харин Эзэндэ этигэдэг хүн хүгжэн дэбжэдэг.
26Гансал өөртөө найдадаг хүн тэнэг гээшэ. Сэсэнэй харгыгаар ябадаг хүн аюулһаа зайладаг.
27Ядуушуулда үгэдэг хүн юугээршье дутахагүй. Ядуушуулһаа нюдөө далтируулдаг хүндэ хүртэхэ хараалынь олошорхо.
28Хуулигүй нүгэлтэнэй үргэмжэлэгдэхэдэ, хүнүүд бэеэ нюудаг. Харин тэдэнэй унахада, үнэн шударга зон олошорно.