‏ Proverbs 3

1Хүбүүмни! Минии һургаалые бү марта, зүрхэншни минии заабари сахиха болтогой.
2Үдэрнүүдые ба амиды ябаха олон жэлнүүдые, амар тайбаниие тэдэ шамда нэмэхэ болоно.
3Этигэл ба үнэн сэхэ шамайе бү орхиг. Эдэниие зүрхэнэйнгөө хабтаһан дээрэ бэшэ, хүзүүндээ орёо.
4Тиин Бурханай болон хүнүүдэй нюдэндэ талархал ба хүндэтхэл олохош.
5Үнэн зүрхэнһөө Эзэндэ этигэ. Өөрын ойлголтодо бү түшэглэ.
6Өөрын бүхы замда Тэрэниие танижа мэдэ. Тэрэ шинии замые шууд сэхэ болгоно.
7Өөрыгөө мэргэн гэжэ бү тооло, Эзэнһээ түбэгшөөн бэшэрэ, мууһаа зайла.
8Энэ хадаа бэедэшни эм болохо, яһышни бэхи болгохо.
9Эд зөөриһөө ба бүхы бүтээгдэһэнэй дээжэһээ Эзэндэ үргэн хүндэлэ.
10Амбааршни таряагаар дүүрэхэ, үзэмэй архинайш амһарта шэнэ үзэмэй дараһан архяар салгидаха.
11Эзэнэй заһабариие бү буруушаа, Тэрэнэй зэмэлэлдэ бү дурагүйлхэ.
12Юуб гэхэдэ, хүбүүндээ дуратай эсэгэ шэнги Эзэн зэмэлэн хэһээдэг ба энхэрдэг.

Сэсэн ухаанай баялиг

13Сэсэн ухаа бэдэрэн олоһон, ухаа нэмэһэн хүн тэнюун жаргалантай.
14Ушарынь хадаа сэсэн мэргэниие олобол, сагаан мүнгэнһөө үлүү, ашаг олзонь шэжэр алтанһаа үлүү.
15Энэнь эрдэни шулуунһаа сэнтэй. Шинии хүсэһэн ямаршье зүйлтэй жэшэмээр бэшэ.
16Тэрэнэй баруун гарта ута удаан амидарал заларха, зүүн гартань алдар суу болон баялиг байха.
17Сэсэн мэргэнэй харгынууд – баяр баясхаланай ба энхэ тайбанай харгынууд юм.
18Оложо шадаһан зондо тэрэ амидаралай модон болодог, тэрээнтэй хахасадаггүй хүн жаргалтай.

19Эзэн сэсэн ухаагаар газарые бии болгожо, оюун мэдэлгээр огторгой тогтоогоо.
20Тэрэнэй мэдэлгээр гүн нээгдэжэ, үүлэнһээ шүүдэр унана.
21Харааһааш эдэ бү хоргодог, оюун ухаан, холын бодол бүрин гамнаарай.
22Тэрэ хадаа сэдьхэлыш тэдхэхэ, зоной талархал хүзүүнэйш зүүлтэ болохо.
23Ши аян замдаа аюулгүй ябахаш, хүлшни бүдэрхэгүй.
24Ши унтаха-хэбтэхэ үедөө айхагүйш, үргэһэ нойршни амгалан байха.
25– 26Гэнтын аймшагһаа бү сошо, хара һанаатын хорото һэдэлгэһээ бү ай, юуб гэхэдэ, Эзэн хажуудашни байха, хүлыншни зангаһаа зайлуулха.

Үнэн шударга ябадал

27Шинии хүсэн хүрэхэ һаань, зондо туһа хэхэеэ бү марга.
28Туһалха боломжотой һаа, эриһэн хүндэ «үглөө ерээрэй» гэжэ бү хэлэ.
29Шамда этигэдэг, хажуудаш байгааша хүндэ эсэргүү юумэ бү үүдхэ.
30Хүнэй шамда хорото мууе ушаруулаагүй һаань, тэрээнтэй бү заргалда.
31Хүсэрхэдэг хүнтэй адли бү боло, тэрэнэй зам бү шэлэ.
32Муу залитай хүнһөө Эзэн зэбүүрхэдэг, үнэн сэдьхэлтэй хүндэ Тэрэ найдадаг.
33Эзэнэй хараал муу хүнэй гэр дээрэ буудаг, харин шударга зүб байгшын орон гэрые Тэрэ үреэдэг.
34Шог шашаг зониие Эзэн наада баридаг, номгон хүндэ Тэрэ нигүүлсэлээ үгэдэг.
35Сэсэн мэргэн хүнүүд алдар солодо хүртэдэг, тэнэгүүд муу суутай болодог.