‏ Proverbs 4

Сэсэн мэргэн – эгээл үнэтэй эрдэни шулуун

1Хүбүүдни, эсэгынгээ һургаал шагнагты.
Оюун ухаанда һурахын тулада анхаралтай байгты.
2Юуб гэхэдэ, һайн һургаал, шухала заабари таанарта үгэнэб.
Минии һургаал захяа бү орхёоройгты.
3Бишье эхэ эсэгын эрхэ тангил байгааб.
4Эсэгэм намайе һургажа хэлэгшэ һэн:
«Зүрхэ сэдьхэлдээ минии үгэ хадуужа аба,
минии захяа заабари сахибал, һайн һуухаш.
5Сэсэн ухаа ба оюун мэдэлгэ оложо аба.
Минии хэлэһэн үгэ бү буруушаа, бү марта.
6Сэсэн ухаанһаа бү зайса, тэрэ шамайе хамгаалха, һэргылхэ,
тэрээндэ дуратай бай.
7Сэсэн ухаан тэрэниие оложо абахам гэһэн хүсэлһөөш эхилнэ,
оложо абахын түлөө бүхыгөөрөө оролдо.
8Сэсэн ухаае үнэлжэ сэгнэ, тэрэ шамайе үргэмжэлхэ,
тэрэниие эгээн шухала гэжэ тэбэрин абаа һааш, шамайе алдаршуулха.
9Сэсэн ухаан гээшэ шинии эгээл ехэ баялиг боложо,
толгой дээрэш һайхан сэсэгэй титим табиха».

Сэсэн мэргэн – эгээл найдамтай зам

10Хүбүүмни, соносо, хэлэгшыем хүлеэн абабал,
амидаралайш он жэлнүүд нэмэгдэхэ болоно.
11Би шамайе сэсэн ухаанай замаар хүтэлхэб,
сэхэ харгыгаар ябуулхаб.
12Энэ харгыгаар ябабал, алхамшни буруу болохогүй,
гүйхэдөө бүдэржэ унахагүйш.
13Эсэгын һургаалые алдангүй һанажа яба.
Эсэгын һургаал хүбүүнэйнь амин гол мүн.
14Хара нүгэлтэнэй харгыда хүлөө бү таби.
Муу зоной замаар ябажа болохогүй.
15Тэрэ харгыһаа зайла,
буруу хараад хажуугаарнь үнгэрэ.
16Тэдэ хорото муу юумэ үйлэдөөгүйдөө амар унтахагүй юм.
Хэн нэгэниие бүдэрүүлжэ унагаагаагүй сагтаа тэдэнэй нойр хүрэдэггүй.
17Тэдэ талха эдиһэн шэнги муу үйлөөр хооллодог,
хүсэрхэлгын хорото үзэмэй дараһан архинһаа уудаг.
18Харин үнэн шударга хүнүүдэй зам хадаа үүрэй толон мэтэ
үдэрэй ерэхэдэ улам һаруул болодог.
19Хара бодолтоной замынь харанхы мэтэ.
Тэдэ хаана бүдэрхэ байһанаа мэдэдэггүй.

Сэсэн мэргэн – ажабайдал хүтэлэгшэ

20Хүбүүмни, минии үгэ соносо,
үгэ хүүрыем анхаралтайгаар шагна.
21Минии үгэ харааһаа алдажа болохогүй.
Зүрхэндөө хадагалжа яба.
22Минии үгэ хадаа тэрэниие шагнаһан хүндэ ами үгэдэг,
бэеынь элүүр болгодог.
23Хамагай түрүүн зүрхөө хамгаала.
Тэрээнһээ аминай булагууд гарадаг юм.
24Мэхэлэгшэ үгэнүүдые буруушаан зайлуулдаг бай.
Мэхэтэй амые өөрһөө холодуула.
25Нюдэншни урдаа байһаниие сэхэ хараг,
урдашни байһан һайн хэрэгүүдһээ зайлажа бү яба.
26Урдахи замаа сэхээр таби,
тиигэбэл, замшни аюулгүй байха.
27Зүүн, баруун тээшээ годиронгүй яба,
хорон мууһаа зайлажа яба.