‏ Proverbs 5

Һамуу ябадалһаа һэргылэлгэ

1Хүбүүмни, минии мэргэн һургаалые анхара.
Бодолыем ойлго.
2Бодомжотой даруугаар хамаг юумэ ажаглажа,
аманһаашни сэсэн үгэнүүд гарахын тулада юм.
3Ондоо хүнэй һамганай урал зүгын бал шэнги амтатай,
тэрэнэй үгэнүүд тоһонһоо үлүү зөөлэн байдаг.
4Харин түгэсхэлдэнь шаралжа мэтэ гашуун,
хоёр таладаа эритэй элдэ мэтэ голхорол асардаг.
5Тэрэ эмын хүлнүүд үхэл руу ябадаг,
тэрэнэй алхаса Үхэлэй орон тээшэ шэглэлтэй.
6Зүб харгыһаа тэрэ хадууранхай,
замайнгаа буруутаһые өөрөөшье мэдэхэеэ болинхой.
7Ушар иимэһээ, хүбүүдни, намайе шагнагты,
үгыем мартажа бү байгты.
8Һалихай тэрэ эхэнэрһээ холо бай,
үүдэнэйнь богоһын ойрошье гаража болохогүй.
9Тиигэбэл, хүсэ тэнхээгээ бусадта үгэхэш,
хайрлаха сэдьхэлгүй зондо он жэлнүүдээ үрихэш.
10Шинии хүсые ондоо хүнүүд ашаглаха,
зөөришни ондоо зондо хүртэхэ.
11Наһанайнгаа эсэстэ тамир тэнхээгээ алдаад байхадаа,
үзэхын ехэ зоболон үзэхэш.
12– 13Тиихэдээ хэлэхэш: «Юундэшье һургаал заабари тоодоггүй,
зэмэлхэдэ үсэрдэг байгаа гээшэбиб.
14Мүнөө иигээд олоной үмэнэ
нэрэ түрэеэ гутааха туйлдаа хүрөөд байнаб».
15Өөрын сөөрэмһөө уһа уу
ба өөрын худагһаа удха.
16Уһаншни гудамжа руу халижа,
урасхалынь талмай дээгүүр урдажа байха юм гү?
17Энэ гансахан шинии байг,
хүнүүдтэй бү хубаалда.
18Булагһааш гараһан уһан буян хэшэгтэй байг,
залуудаа гэрлэһэн эхэнэртээ энхэрэн баяса.
19Энхэргэн марал болон һайхан
һогоонтой адли эхэнэрэйшни хүхэнүүд
ямаршье үедэ шамайе хангаха болтогой,
инагай хайрада үргэлжэ хүртэжэ һэргэ.
20Яахадаа ондоо хүнэй эхэнэртэй бэеын жаргал эдлэжэ,
хүнэй һамганай бэе тэбэрихэ болообши, хүбүүмни?
21Ушарынь гэхэдэ, Эзэнэй нюдэнэй урда
хүнэй наһан элихэн харагдажа байдаг юм,
хүнэй замые Тэрэ анхаран шэртэжэ байдаг.
22Хара нүгэлтын хуулигүй ябадал өөрыень барижа байдаг,
өөрын нүгэл хилэнсэгэй уяанда тэрэ хүлеэтэй байдаг.
23Һургаал заабари дутаһанһаа боложо тэрэ үхэхэ,
өөрын мунхагһаа замаа төөрихэ.