‏ Proverbs 7

Забхай эмэ тухай һануулга

1Хүбүүн, үгыемни сахи.
Захяануудыем дотороо хадагалжа яба.
2Минии заабари сахижа амидара.
Минии һургаал нюдэнэй сэсэгы мэтэ сахи.
3Тэрэниие хургандаа орёожо аба,
зүрхэнэйнгөө хабтаһан дээрэ бэшэ.
4Оюун ухааниие амараг гансадаа адли болгогты.
Бэлиг мэдэсэдэ «ши минии эгэшэш» гэжэ хэлэгты.
5Энэ хадаа забхай эмэһээ,
нүгэлдэ түлхихэ альбан үгэнүүдһээ абархал.
6Нэгэтэ гэрэйнгээ сонхоор,
сонхын забһараар харахадам,
7гэнэн залуушуулай дунда
нэгэ ухаа муутай хүбүүн нюдэндэм торолдобо.
8Тэрэ залуугай ойро байдаг гудамжые хүндэлэн гаража,
эмэгтэйн гэр тээшэ шэглэхые харабаб.
9Наран һуужа, үдэшын боро хараан тунажа,
һүни боложо байгаа.
10Тэрэ эхэнэр угтажа гараба.
Янхан мэтэ хубсалһан, һабяаһаа таһарһан эмэ бэлэй.
11Аляа хошон, убайгүй шууяатай, гэртээ тогтодоггүй,
12гудамжа талмайгаар, зоной хүлгөөн соо ябагша бэлэй.
13Тэрэ эхэнэр залууе тэбэрин таалаад, эшэхэ нюургүй хэлэбэ:
14«Би мүнөөдэр үргэл үргөөб. Эдихэ юумэн үлэнхэй.
15Шамайе угтажа, шинии хажууда байхые эрмэлзэн хүсэжэ,
гаража ерээд шамтай ушарба гээшэб.
16Алаг үнгэтэй Египедэй маалинга бүд оро дэрэдээ дэбдеэб.
17Орондоо миро тоһоной, зуу наһатын,
халуун үбһэнэй хангал һайхан үнэр оруулааб.
18Ошоё, үглөө болотор хайра дурлал дүүрэн эдлэе.
19Минии нүхэр гэртээ үгы,
тэрэ холын аянда мордонхой.
20Тэрэ туламтай мүнгэ абажа ошоо,
хахад һара гэртээ байхагүй».
21Иигэжэ үгөөрөө үнөөхи залуу хүниие бэедээ татаха гэжэ оролдобо.
Тэрэнь мэхэдэнь ороо.
22Тэрэ залуу эрэ нядалагдахаа байһан бухадал адли,
урьхада ороһон зээрэн мэтэ хойноһоонь дахажа ошобо.
23Һуршын зэбын эльгыень нэбтэ сохихоор бэлэн байһые мэдэхэгүй,
урьхада орохо жэгүүртэ мэтэ аюулда орохоёо ойлгохогүй байба.
24Тиимэһээ, хүбүүдни, намайе шагнагты.
Аманһаам гараһан үгэ анхарагты.
25Зүрхэ сэдьхэлтнай тэрэ эмэ тээшэ бү эрьег,
замынь дахажа бү ябагты.
26Ушарынь хадаа тэрэ эмэһээ хохидогшод,
тэрээндэ алуулһан зон олон.
27Тэрэнэй гэр – Үхэлэй орондо хүргэхэ харгы,
үхэлэй танхимууд руу уруудаһан харгы болоно.