‏ Proverbs 8

Сэсэн мэргэнэй магтаал

1Сэсэн мэргэн дуудана бэшэ аал?
Оюун ухаан дууниинь дуулдана бэшэ аал?
2Тэрэ харгын хажуудахи үндэртэ,
замай уулзуурта зогсожо байдаг.
3Хотын хашаагай дэргэдэ,
хотын үүдэнһээ хандана:
4– Хүнүүд, би таанадые дуудажа байнаб.
Минии хандалга хүнэй хүбүүдтэ зорюулагдана.
5Гэнэн хүнүүд, болгоомжотой ябахые анхаран ойлгогты.
Тэнэгүүд, ухаандаа солоохой орогты.
6Соносогты, би шухала зүйл хэлэхэм гээшэ.
Минии аманһаа үнэниие дуулахат.
7Би үнэниие үгүүлдэгби.
Харин худалһаа минии урал аман зэбүүсэдэг.
8Хамаг хэлэһэмни зүб мүрэй үгэнүүд гээшэ,
хара мэхэ, нюуса бодол гэжэ минии хэлэһэн соо огтошье байхагүй.
9Тэдэ хадаа ухаатай хүндэ тодорхой ойлгосотой,
мэдэхэеэ һанаһан зондо зүйтэй һабагшатай.
10Салин сагаан мүнгэнһөө үлүүгээр минии заабари сэгнэжэ абагты.
Шэжэр алта шэлэнхаар мэдэлгэ абахые шэлэһэниинь дээрэ.
11Сэсэ мэргэн субад эрдэниһээ үлүү үнэтэй.
Хүсэжэ болохо ямаршье зүйлые тэрээнтэй жэшэхын аргагүй.
12Би – сэсэн мэргэн, намтай болгоомжол ба һонор ухаан хамта оршодог,
мэдэлгэ ба үлэмжэ соо харадаг шанар байха.
13Эзэнһээ бэшэрэл хадаа хорото мууе үзэн ядаха ябадал юм.
Бардамлал, ехэрхүү зан, хорото зам ба худалша амые би үзэн яданаб.
14Амжалта, һонор ухаан, хүсэ шадал намтай оршодог.
Би хадаа оюун ухаан мүн. Хүсэн намтай байха.
15Хаадууд минии ашаар хаан болодог.
Засаг түрэ баригшад минии ашаар үнэн шударга байдалые тогтоодог.
16Тайжанар болон изагууртан,
хэрэг шүүгшэ бүхы зон минии ашаар ударидаг.
17Дура һаналтай хүндэ дура һаналаа харюудань мэдүүлхэб,
намайе бэдэрдэг хүн намайе олохо.
18Дундаршагүй зөөри баялиг ба алдар суу,
хүгжэл һалбарал ба шударга үнэн намда байха.
19Минии үрэ хэшээл шэжэр алтанһаа үлүү,
минии ашаг үрэ сагаан мүнгэнһөө үлүү.
20Би зүб ёһын харгыгаар,
үнэн шударгын зүргөөр ябанаб.
21Энэ хадаа намайе хайрлагшадта баялиг үгэхын,
эрдэниин сангыень дүүргэхын тулада юм.
22Эртэ сагай ажалһаа урид, замайнгаа эхиндэ
Эзэн намайе эзэмшэһэн юм.
23Би эхинэй эхинһээ, газар дэлхэйн һаяхан бии боложо байхада тогтоогдоо һэм.
24Оёоргүй гүнзэгы уһанһаа урид ба
уһаар салгидаһан булагуудай үгы сагта бии болоо һэмби.
25Би уула хабсагайһаа урид,
хада гүбээгэй үгы байхада мүндэлөө һэмби.
26Газар дэлхэйе болон тала дайдые, юртэмсын анха түрүүшын тооһые
Тэрэнэй тогтоогоогүй байхада бии болоо һэмби.
27Тэрэнэй огторгой тогтоохо ба гүнэй гадарта хүреэ һиилэхэдэ,
28дээрэнь үүлэдые бии болгохо үедэ,
мүн оёоргүй гүниие бэхижүүлхэдэ,
29Тэрэнэй зааһанһаа уһанай дээшэ болохогүйн тула
тэнгис далайда хилэ хизаарыень тогтоожо үгэхэдэ,
газарай үндэһэ һуури тэмдэглэн тогтоохо үедэ би тэндэ байгаа һэм.
30Тиихэдэ би Тэрэнэй хажууда уран дархан мэтэ байгаа һэм.
Би Тэрэнэй үдэр тутамай баяр бахархал боложо,
Тэрэнэй урда үргэлжэ баярлан урмашажа байгааб.
31Газар дэлхэйдэ баярлан, хүнэй хүбүүдээр омогорхон байгааб.
32Тиимэһээ, хүбүүдни, намайе шагнагты.
Минии зам сахигшад үреэлтэй.
33Һургаалыем шагнажа, мэргэн ухаатай бологты,
тэрэниие тоонгүй бү байгты.
34Хаалгымни дэргэдэ үдэр бүри харуул хаража,
үүдэнэйм дэргэдэ хүлеэжэ намайе шагнадаг хүн үреэлдэ хүртэхэ.
35Намайе ологшо хүн амидарал оложо,
Эзэнэй талархалда хүртэхэ.
36Харин намда эсэргүү болодог,
нүгэл үйлэдэдэг хүн өөрыгөө гэмтээдэг.
Намайе үзэн ядагша бүхэн үхэлдэ дура һаналаа мэдүүлнэ.