‏ Proverbs 9

Сэсэн мэргэн, үгы гэбэл, ухаан дутуу

1Сэсэн мэргэн байшангаа бодхоожо,
долоон бахана дээрэ бариба.
2Мяха бэлдэжэ, үзэмэй дараһан архи худхажа,
шэрээгээ түхеэрбэ.
3Тэрэ зараса эхэнэрнүүдые ябуулан,
хотын хамагай үндэр газарһаа дуудаба:
4«Гэнэн хонгорнууд, наашаа эрьегты».
Ухаа муутайнуудые тэрэ баһа уриба:
5«Ерэгты наашаа, минии талха эдигты,
минии үзэмэй дараһан архи уугты.
6Мунхаг ябадалаа орхин амидарагты,
оюун ухаанай замаар ябагты».
7Убайгүйдэ заабарилһан хүн өөрөө доромжолуулдаг,
муу хүниие зэмэлхэдэ нэрэ түрөө гутаахаһаа ондоо юумэн байхагүй.
8Һэнгэргүй хүниие бү зэмэлэ, тэрэш шамайе үзэн ядаха.
Харин сэсэн хүн зэмэлэлгые үнэтэйдэ тоолохо.
9Мэргэн хүндэ заабари үгэхэдэш, бүришье мэргэн болохо.
Шударга үнэн хүниие һургахадаш, тэрэ мэдэлгэеэ арьбажуулна.
10Эзэнһээ бэшэрхэ гээшэ мэргэн ухаанай эхин юм.
Гэгээн шанарыень танин мэдэжэ абаха гээшэ оюун ухаан мүн.
11Үдэр хоногшни минии ашаар утадаха,
амидаралай он жэлнүүд шамда нэмэгдэхэ.
12Хэрбээ ши мэргэн һаа, өөрынгөөл түлөө мэргэн байхаш,
харин дээрэлхэн хүниие баһадаг һаа,
өөрөөл тэрээнһээ хохидохо болонош.
13Уймар тэнэг – дуутай шуутай эмэ
14гэрэйнгээ үүдэндэ болон
хотын үндэрлиг газарта ендэр дээрэ һуун,
15өөрынгөө харгыгаар ябажа ябаһан зониие дуудадаг юм.
16Тэрэ эмэ «гэнэн нэгэн, наашаа эрьежэ хара» гэжэ хэлэдэг.
17Тэнэг хүндэ «хулууһан уһан шэхэрлиг,
нюусаар эдиһэн талхан амтатай» гэдэг.
18Харин тэндэнь үхэгшэдэй һүүдэрнүүд байдаг,
тэрэ эмые зохидшоодогууд
Үхэлэй орон руу дуудаһыень мэдэхэгүй.