‏ Proverbs 13

Оюун ухаан – амидаралай эрилтэ

1Хүбүүнэй сэсэн эсэгын һургаалһаа гарадаг,
харин һэнгэргүй хүн зэмэлэл шагнадаггүй.
2Хэлэһэн үгынгөө үрэ жэмэсһээ һайханииень хүн амасадаг.
Харин хуули эбдэгшэд хүсэрхэлөөр амидардаг.
3Хэлэ амандаа болгоомжотой хүн амяа хамгаалдаг.
Харин шашаг хүниие гай тодхор хүлеэхэ.
4Залхуу хүнэй хүсэхэ һанаха юумэн биишье һаа, хүртэхэ гэжэ байхагүй.
Харин ажалша хүнэй хүсэл бэелдэг.
5Зүб ябадалтай хүн худал хуурмагые үзэн ядадаг.
Харин хуулигүй хүн эшэгүүритэй гутамшаг зүйл хэдэг.
6Зүб ябадал гэмгүй хүниие үмэглэн хамгаалдаг.
Нүгэлтэнэй хара ябадал өөрыень нэрбэн сохидог.
7Зөөригүй аад, баян хэбэртэй болодог хүнүүд байдаг.
Баян аад, өөрыгөө ядуу болгодог хүн байха.
8Баялигынь хүнэй ами наһа аршалдаг.
Харин ядуу хүн тиимэ аюул ойлгохогүй.
9Зүб шударга хүнэй дэн хурсаар гэрэлтэдэг,
харин хуулигүй зоной гэрэл мүхэдэг.
10Бэеэ дээгүүр абхуулдаг зан гансал хэрэлдээндэ асардаг.
Заабари шагнадагынь сэсэн байна.
11Хуурмагаар олоһон эд зөөри түргэн хородог.
Хүсэлжэ олоһон баялиг арбижадаг.
12Удаан хүлеэгдэһэн этигэл найдабари гуниг түрүүлдэг.
Бэелһэн хүсэл амидаралай модон мэтэ.
13Зарлиг шагнадаггүй хүн өөртөө хохидол асардаг.
Зарлигһаа айдаг хүн шагналда хүртэнэ.
14Сэсэн хүнэй һургаал ами оруулдаг,
үхэлэй зангаһаа холодуулдаг.
15Ухаатай хүниие зон хүндэлдэг.
Харин этигэл найдабари эбдэгшын зам хүндэ.
16Сэсэн хүн юумэ хэхын урда бодожо үзэдэг.
Тэнэг хүн тэнэг мунхагаа һайрхадаг.
17Муу элшэн зоболондо унана,
этигэлтэй элшэ илалта асарна.
18Һургаал сахидаггүй хүн ядарал гутамшагта ороно,
зэмэлэл шагнаһан хүн аша туһа абана.
19Бэелһэн хүсэл баяр асардаг.
Харин тэнэг хүн мууһаа холодохоһоо жэгшэн айдаг.
20Сэсэнтэй ябагша сэсэн болоно.
Харин тэнэгтэй нүхэсэгшэ зоболон амсана.
21Гай тодхор нүгэлтэниие дахадаг.
Үнэн шударга хүнэй шагнал дэбжэлтэ мүн.
22Һайн хүн үри хүүгэдтээ зөөри үлөөдэг.
Нүгэлтэнэй эд баялиг үнэн шударга хүнэй түлөө хуряагдадаг.
23Ядуу хүнэй таряаланда ехэ ургаса гаражашье болодог.
Хуулигүй байдал тэрэниие хосороохо.
24Һабаагаар шэрбэхэеэ дүмэдэг хүн үнэн дээрээ хүбүүгээ хайрланагүй.
Дуратай хүн багаһаань хэһээн хүмүүжүүлдэг.
25Үнэн шударга хүн эдеэндэ садаһан байдаг.
Хуулигүй хүнэй гэдэһэн ходол хооһон.