‏ Proverbs 15

Сэсэн хүн заабари шагнаха дуратай

1Эелдэр зөөлэн харюу уур хилэн зайлуулна.
Дээрэлхүү хүйтэн үгэ уур хилэн хүдэлгэнэ.
2Сэсэн хүнэй хэлэхые шагнаха дуратай зон олон.
Тэнэгэй аманһаа тэнэглэл гарадаг.
3Эзэнэй нюдэн хаа-хаанагүй харадаг,
һайн муу хүнүүдые адли харадаг.
4Һайн үгэ амидаралай модондо адли.
Хуурмаг үгэ һүнэһэ заяа һандаргадаг.
5Тэнэг хүн эсэгын һургаал тоодоггүй.
Харин зэмэлэл анхаралтайгаар шагнадаг хүн ухаатай.
6Үнэн шударга хүнэй гэртэ үлэмжэ баялиг оршодог.
Хорон нүгэлтэнэй оролго туһа хэдэггүй.
7Сэсэн хүнэй уралһаа мэдэлгэ дэлгэрдэг.
Харин тэнэгүүдэй сэдьхэл тиимэ бэшэ.
8Хара нүгэлтэнэй үргэлһөө Эзэн жэрхэдэг.
Үнэн сэдьхэлтэй хүнэй зальбарал
Тэрэнэй талархалда хүртэдэг.
9Нүгэлтын зам Эзэнэй зэбүүсэл түрүүлдэг.
Үнэн шударга замаар ябагшадые Тэрэ хайрладаг.
10Харгыһаа хадуурагшада хатуу хэһээлгэ буудаг.
Зэмэлэл үзэн ядагша үхэнэ.
11Эзэнэй үмэнэ бүгэдэ эли,
Үхэлэй орондо байһан бүхы юумэншье.
12Тэнэг хүн өөрыень зэмэлэгшые үзэн ядадаг.
Тиимэһээ мэргэн хүн тээшэ шэглэхэгүй.
13Жаргалтай хүнэй нюурта баяр хүгжэл бии.
Зүрхэнэй гутараан зориг мүхөөдэг.
14Бэрхэ хүн мэдэсэеэ ехэ болгохые эрмэлзэдэг.
Тэнэгүүд тэнэг мунхагаар лэ хоол хэдэг.
15Үгытэй хүнэй бүхы үдэрнүүд муухай.
Сэдьхэлдээ жаргалтай хүндэ зугаа сэнгэл таһардаггүй.
16Үгытэй байгаад, Эзэнһээ бэшэрһэниинь
зөөри баялигтай аад, зобожо һуугшаһаа дээрэ.
17Үзэн ядалгаар борлуулһан сарай мяханһаа
хайра дуранай газарай ногоон хоол дээрэ.
18Түргэн сухалтай хүн хэрүүл үүсхэдэг,
тэсэбэритэй хүн хёморол намдуу болгодог.
19Залхуугай зам үүргэнэтэй хашаа мэтэ.
Шударга хүнэй зам шулуун сэхэ.
20Ухаатай хүбүүн эсэгэеэ баярлуулдаг,
мунхаг хүн эхэеэ баһадаг.
21Ухаагаар ээлтэй хүндэ мунхаг үйлэ үйлэдэхэнь баяр болодог.
Ухаатай хүн сэхэ замтай.
22Заабари абаагүйһөө хэрэг бүтэшэгүй,
олон зүбшэлэгшэтэй һаа, бүтэсэтэй.
23Онобшотой харюу хүниие баяртай болгодог,
саг соогоо хэлэгдэһэн үгэ һайхан байдаг.
24Мэргэн хүнэй зам дээшээ байдаг,
энэнь Үхэлэй оронһоо холодуулхын тулада юм.
25Эзэн бардамай гэр һандаргаадаг.
Харин бэлбэһэн эхэнэрэй мужаа хубилгадаггүй.
26Хорото үүсхэл Эзэн үзэн ядадаг,
зүб үгэ Тэрээндэ таатай.
27Хуули бусаар ашаг олодог хүн гэр бүлэдөө зоболон асардаг.
Эдилгэ абадаггүй хүн амидаран һууха.
28Үнэн шударга хүн ямар харюу үгэхэеэ сэгнэдэг,
хара һанаатай хүнэй аманһаа муу юумэн гарадаг.
29Эзэн нүгэлтэһөө холо байдаг,
зүб ябадалтын зальбарал соносодог.
30Дулаахан хараса сэдьхэл баярлуулдаг.
Һайн мэдээн яһанда эм болодог.
31Сэсэн һургаалда анхаралтай шэхэн
мэргэдэй дунда амидардаг.
32Һургаал шагнаагүй хүн өөртөө хохидол асарна.
Зэмэлэл соносодог хүн ухаа оложо абана.
33Эзэнһээ бэшэрэл сэсэндэ һургадаг.
Даруу зан нэрэ хүндын урда ерэнэ.