‏ Proverbs 18

Үгэ хүсэтэй

1Үсэд хүн өөрынгөө дуратай юумэ хэдэг.
Ухаатай заабари шагнахадаа, сухалдадаг.
2Тэнэг хүн мэдэлгэ ухаанһаа сэдьхэлээ ханадаггүй.
Ухаатайб гэжэ өөрыгөө харуулхань тэрээндэ үлүү шухала.
3Муу хүнэй ерэхэдэ зэбүүрхэл баһал бии болодог.
Нэрээ хухалалгатай хамта эшэгүүри ерэнэ.
4Хүнэй аманһаа гараһан үгэ гүнзэгыһөө гараһан уһантай адли.
Сэсэн ухаанай ундан шолшогоноһон уһа горхон мэтэ.
5Нүгэлтэнэй тала бариха гээшэ
хэрэг шүүлгэ дээрэ гэмгүй хүниие хардаһантай адли муухай хэрэг.
6Тэнэгэй аман һүйд асарна.
Тэрэнэй үгэнүүд һандарал үүсхэдэг.
7Тэнэгэй аманиинь өөрыень һүйдхэдэг.
Тэрэнэй үгэнүүд өөртэнь занга болодог.
8Хоб тараагшын үгэнүүд хото руу ороһон амтатай эдеэн мэтэ.
9Ажалдаа оролдодоггүй хүн зөөриеэ үрин һалгаагшада адли.
10Эзэнэй нэрэ бата бэхи хэрэм.
Үнэн шударга хүн тиишээ тэрьелээд, абаралта олоно.
11Баян хүнэй эд зөөри тэрээндэ бэхи хото,
үндэр хана мэтээр һанагдадаг.
12Бардам сэдьхэл һүйдхэлэй урда ехэлиг.
Хүндэлэлэй урда хүнэй сэдьхэл даруу байдаг.
13Хүниие хүсэд шагнангүй харюу хэлэхэнь
тэнэгэй хэрэг ба эшэгүүритэй.
14Хүнэй урма зориг үбшэниие тэсэхэдэ туһалдаг.
Сүхэрһэн зоригһоо найдал талиидаг.
15Бэрхэ хүн мэдэлгэ эзэмшэдэг.
Сэсэн ухаатын шэхэн мэдэлгэ бэдэржэ шагнадаг.
16Бэлэг үгэһэн хүнэй урда бүхы үүдэнүүд нээгдэжэ,
дээдэ түшэмэлтэй ушаруулна.
17Ондоо хүнэй ерэжэ шалгахаһаа урид
түрүүлжэ хэлэһэн хүн лэ зүб шэнги байдаг.
18Жээрэб хаялга арсалдаа тогтоодог ба
хүсэ ехэтэйшүүлые хоёр тээшэнь һалгадаг.
19Гомдоһон ахаяа бусаахань
бүхэ ханатай хото эзэлэгшэһээ хэсүү.
Хэрүүл арсалдаан томо суургатай хаалга мэтэ.
20Өөрынь үгэ хүүрээр хүнэй зосоо садхалан болохо:
хэлээрээ олоһон юумээрээ садаха.
21Хэлэнэй үзүүртэ амин ба үхэл байдаг.
Хэлэндээ болгоомжотой хүн һайн үрэ үзэдэг.
22Эхэнэрые олобол, һайниие олонош.
Эзэнэй талархалда хүртэһэнэйш тэмдэг мүн.
23Ядуу хүнэй туһа эрижэ гуйхада,
баян хүн бүдүүлиг харюу үгэдэг ушар олон.
24Дан олон нүхэд һүйдхэлдэ асаржа магад.
Зарим ушарта анда нүхэр аха дүүһээ үлүү байдаг.