‏ Proverbs 19

Эхэ, эсэгэеэ хүндэлэ

1Мэхэшэ хуурмаг, тэрээн соогоо тэнэг хүнһөө
үгытэй ядуу аад, үнэн шударга ябадаг хүниинь дээрэ.
2Мэдэлгэгүй байха гээшэ хүнэй хубида һайн бэшэ.
Яаруу хүн хии гэшхэдэг юм.
3Хүнэй тэнэг мунхагынь тэрэнэй замые балартуулдаг.
Харин тэрэ гэмээ Эзэндэ тохон хилэгнэдэг.
4Эд баялиг олон нүхэдые асардаг,
ядуу хүниие найза нүхэрыньшье орхидог.
5Хүниие хардагшада хэһээлтэ бууха.
Худалша хүн зугадажа шадахагүй.
6Изагууртантай нүхэсэхэ дуратайшуул олон.
Бэлэг сэлэг үгэдэгтэй хүн бүхэн ханилха дуратай.
7Ядуу хүниие аха дүүнэрыншье үзэн ядахадань,
хани нүхэдэйнь хүйтэрэн холодохонь гайхалгүй.
Үгэ хэлэн шарайшалхадань, тэдэнь олдохошьегүй.
8Сэдьхэлээ хайрладаг хүн оюуниие бэдэрдэг.
Сэсэн ухаае дээдэлдэг хүн һайниие олоно.
9Хуурмаг гэршэ хэһээлтэдэ ороно.
Худал хэлэдэг хүн мүхэхэ.
10Һүрөөтэй гоё байдал тэнэг хүндэ таарахагүй.
Тайжануудые богоол хүнэй зонхилходо бүришье зохидгүй.
11Ухаансар бодомжо хүниие тэсэбэритэй болгодог,
гэм зэмэ хүлисэхэ гээшэ ехэ аша габьяа мүн.
12Хаанай уур хилэн арсаланай хэрхирхэтэй адли,
тэрэнэй талархал ногоон дээрэ унаһан шүүдэр мэтэ.
13Тэнэг хүбүүн эсэгын ядарал зоболон.
Яршаг хэрүүлшэ эхэнэр оройн хушалтада гараһан нүхэндэ адли.
14Гэр бууса ба эд хүрэнгэ эхэ эсэгэһээ хүртэдэг,
ухаатай эхэнэр Эзэнһээ ерэдэг.
15Залхуу хүн унтаанаг,
нобшо хүн үлэсхэлэндэ нэрбэгдэнэ.
16Зарлиг хуули сахидаг хүн сэдьхэлээ хамгаална.
Харин өөрын зам тухай һанаа зободоггүй хүн үхэхэ болоно.
17Үгытэй хүндэ харамнангүй үгэхэнь
Эзэндэ зээлеэр үгэһэнтэй адли.
Тэрэ хүнэй һайн үйлын түлөө Эзэн бусаажа түлэнэ.
18Хүбүүгээ хэһээн хүмүүжүүлхэдээ, тэрээндэ һайниие хүсэнэ гээшэш.
Тиигээгүй һаа, муу эсэстэ хүрэхыень хүсэнэ гээшэш.
19Ууртай хүн хэһээлтэ амасаха зэргэтэй.
Тэрэниие хэһээлтэһээ зайлуулбал, үшөө ехээр хэһээхэ хэрэг гараха.
20Заабари дуулажа, зэмэлэл хүлеэжэ абаха гээшэ
хожомоо сэсэн бодолтой болохын шэнжэ.
21Хүнэй зосоо олон һанаан байбашье,
Эзэнэй түсэбөөр лэ болохо.
22Үгэдөө найдамтай байха гээшэ сэгнэгдэдэг.
Худалша хуурмагһаа үгытэй ядуу байһаниинь дээрэ.
23Эзэнһээ бэшэрэл ами наһа үршөөдэг:
хүн муу юумэнһээ айнгүй амгалан унтадаг.
24Залхуу хүн табагта хэһэн гараа
амандаа хүргэтэрөө залхууржа үрдинэ.
25Убайгүй баһамжалагшые хэһээбэл, гэнэн нэгэн ухаа орохо.
Ухаатайе зэмэлбэл, тэрэ һургаал абадаг.
26Эсэгэдээ хэрзэгыгээр аашалжа, эхэеэ үлдэдэг хүн
нэрэ хүндэеэ алдаһан, эшэгүүритэй зүдэг амитан мүн.
27Хүбүүмни, сахилгата һургаал шагнаагүй һаа,
мэдэлгын үгэһөө холодохош.
28Худалаар гэршэлэгшэ үнэн шударгые доромжолдог.
Хара нүгэлтэнэй хэлэһэниинь муу юумэ олошоруулдаг.
29Убайгүйдэ хэһээлтэ байха,
мунхагай нюрга сохихо арга олдохо.