‏ Proverbs 2

Сэсэн мэргэнэй үлүү ашагынь

1Хүбүүмни, ши минии хэлэхые хүлеэн абажа,
минии заабари дотороо хадагалбал,
2сэсэн ухаанда анхаран шэхээ табижа,
ухаан соогоо шүүжэ үзэдэг,
3мэдэлгэеэ элсүүлэн, ухаан бодолдо түшэглэдэг,
4тэрээниие сагаан мүнгэ мэтэ эрижэ,
нюуса эрдэни мэтэ бэдэрдэг болобол,
5Эзэнһээ бэшэрхые ойлгохош ба
Бурхан тухай мэдэлгэ олохош.
6Юуб гэхэдэ, Эзэн сэсэн мэргэниие үршөөдэг,
Тэрэнэй аманһаа ухаан ба мэдэлгэ гарадаг.
7Тэрэ сэбэр сэхэ ябадалтай зондо илалта,
үнэн шударга ябагшын хубида халхабша болодог.
8Тэрэ шударга ёһын зам хамгаалдаг ба
Өөрын нангин гэгээнтэдэй зам һэргылдэг.

9Тиин ёһото шүтэлгэ болон үнэн шударга ябадалые,
һайхан замай сэхэ сэбэрые ойлгохош.
10Сэсэн ухаан сэдьхэлдэшни орожо,
ухаандаш мэдэлгэ таатай болоходонь,
11болгоомжол шамайе һэргылнэ ба
ухааншни шамайе хамгаална.

12Энэнь шамайе муу замһаа, худалшаһаа зайлуулхын,
13харанхын замаар ябаха гэжэ
сэхэ замһаа хадуурһан хүнүүдһээ,
14муу үйлэ хэхэдээ баярладаг,
һальхай һамуугаар бахархадаг,
15һарюу мурюу харгытай зонһоо ба
зам төөригшэдһөө,
16мүн хүнэй һамган аад, альбан үгөөрөө
ондоо эрые бэедээ татадаг эмэнүүдһээ һалгахын түлөө юм.
17Тэрэ эмэ эдир наһанайнгаа хани нүхэрые орхижо,
Бурхантай хэлсээе мартаа.
18Тэрэнэй үргөө – мүхэлгэ тээшэ,
замынь – үхэгшэдэй һүнэһэн тээшэ.
19Тиишээ ябаһан хүнүүдэй нэгэнииньшье эрьежэ ерэдэггүй ба
амидаралай замда ородоггүй.

20Тиимэһээ ши һайн һанаатанай замаар ябажа,
үнэн шударга хүнүүдэй зүргэ даха.
21Үнэн сэдьхэлтэй хүн газар дэлхэй дээрэ ажамидарха,
гэмгүй зон байһаараал байха.
22Харин хара һанаатан дэлхэй дээрэ усадхагдажа,
этигэл эбдэгшэ хүн газарай нюрууһаа һалгагдаха.