‏ Proverbs 26

Занга бү таби

1Тэнэг хүнэй соло сууда гаралга хадаа зундаа саһа орохо ба ургаса хуряаха үеэр бороо ороһонтой адли.
2Борбилоогой буршагад гээд үгы болоһонтой, хараасгайн шуумар ниидэжэ арилһантай адли шалтагаангүй хараал хүсэдэггүй.
3Ташуур мориндо, хазаар элжэгэндэ, харин һабаа модон тэнэгэй нюрганда.
4Тэнэг хүндэ тэнэгээрынь харюулжа, тэрээнтэй адли болоно гээшэш.
5Тэнэг хүнэй өөрыгөө сэсэн гэжэ тоолохогүйн тулада тэрээндэ тэнэг соонь харюусаха болоно.
6Тэнэг хүндэ хэрэг ажалаа даалгаһан хүн хүлөө тайруулһандал хохидол амсаха.
7Тэнэгэй аманда һургаалай сэсэн үгэ дохолон хүнэй хэрэгсээдэггүй хүлдэ адли.
8Тэнэг хүниие үргэмжэлхэ гээшэ һэнгүүртэ харбаха шулуугаа уяһантай адли.
9Тэнэгэй һургаалай сэсэн үгэ хэлэхэнь һогтуу хүнэй адаалхай үүргэнэдэ шагтагалдаһантай адли.
10Дайралдаһан тэнэгые дары албанда хүлһэлэгшэ хадаа хараһан бүхы хүнүүдые шархатуулдаг һур харбагшада адли.
11Нохой бөөлжэһэндөө бусадаг, тэрээндэл тэнэг хүн тэнэг мунхагтаа найран үсэрхэ.
12Өөрыгөө сэсэн гэжэ тоолодог хүниие хараа һэн гүт? Тэнэг хүндэ тэрээнһээ үлүү найдахаар.
13Залхуу хүн «Харгы дээрэм арсалан һууна. Талмай дээгүүр дошхон арсалан зайжа ябана» гэдэг.
14Үүдэнэй сүйдөө һэнжэлзэдэгтэл залхуу унтаридаа тэршэлдэг.
15Залхуу хүн аягаһаа амандаа гараа хүргэтэрөө эсэхэ.
16Залхуу хүн боломжотой харюу үгэдэг долоон ухаатанһаа сэсэнби гэжэ өөрыгөө тоолохо.
17Өөртэнь хамаагүй хэрүүлдэ оролсохонь нохойе шэхэнһээнь угзарагшатай адли.
18Галтай һурша болон үхэл шэдэгшэ галзуу хүндэ
19нүхэрөө мэхэлээд, «Би шоглоном» гэдэг хүн адли.
20Түлеэнэй дууһахада гал унтараа, хоб зөөгшын үгы болоходо хёморол замхаа.
21Нүүрһэнһээ халуун, түлеэнһээ гал, хоб шэрэгшын үгэһөө хёморол.
22Хоб шэрэгшын үгэ амтан эдеэн мэтэ, хүнэй мухар гэдэһэн хүрэтэр орохо.
23Хэбрэг шабараар хэһэн һуулгые хэдышье мүнгөөр үнгэлхэдэ, үнэ орохогүй. Муу сэдьхэлһээ хэлэһэн альбан үгэнүүд тэрээндэл адли.
24Муу һанаатан альбан үгөөр муугаа далдалжа болодог, муу мэхэеэ тэрэ зосоогоо баридаг.
25Тэрэ хүнэй зөөлэн үгэдэ бү этигэ. Зосоогоо долоон жэгшүүритэ зүйл тэрэ хадагалдаг.
26Тэрэнэй хуурмагайнь саана үзэн ядалгань нюугдаашье һаа, нүгэлынь зоной урда гаража ерэхэ.
27Нүхэ малтаһан хүн өөрөө тэрээн руу унана. Шулуу түлхихэдөө өөрөө тэрээндэ даруулха.
28Хуурмаг хүн хуурагдагшые үзэн ядадаг, билдагууша аман һүйдхэл түхеэрдэг.