‏ Proverbs 27

Нүхэдтөө үнэн сэхэ бай

1Үглөөдэрые бү һайрха, юун болохыень өөрөөшье мэдэнэгүйш.
2Шамайе ши өөрөө бэшэ, ондоо хүн; шинии бэшэ, хари хүнэй ама хэлэн магтаг.
3Шулуун хүндэ, элһэн хүнгэн бэшээр татаха, харин тэнэгэй ааша эдэ хоёрһоо бүришье хүндэ.
4Хилэгнэл хэрзэгы, уур сухал диилдэшэгүй, харин хэн атаархалай урда тэсэжэ зогсохоб?
5Абяагүй нүхэрэй хайраһаа сэхэ руунь зэмэлэгшэ дээрэ.
6Хайрлаха нүхэр ойлгомторгүй шархатуулжа болохо, үзэн ядагша һаймһаран таалажа болохо.
7Садхалан хүн зүгын балай һархинагшье гэшхэжэ болохо, үлдэһэн хүндэ гашуун юумэншье амтатай.
8Гэр нютагһаа холодоһон хүн уурхайһаа ниидэн гараһан шубуун мэтэ.
9Һайхан тоһон болон анхилма үнэртэй бодос зосоо баясуулха, нүхэрэй зүбшэл заабари сэдьхэлдэ аятай.
10Өөрын нүхэдые ба эсэгын нүхэдые бү марта. Гай гашуудал болоходонь аха дүүгэй гэр тээшэ бү зори. Холо һуудаг аха дүүһээ ойро һуудаг хүршэ дээрэ.
11Хүбүүмни, сэсэн байжа, зүрхыемни баярлуула. Намайе муушалагшада харюу барижа шадахымни тулада юм.
12Ухаатай һонор хүн мууе хараад, зайлажа шададаг, тэнэг хүн сэхэ ябаад, хэһээлтэдэ хүртэдэг.
13Ондоо хүнэй түлөө гар даагша хубсаһаяа үгэхэ. Хүнэй һамганай түлөө иимэл түлөөһэ түлэхэ.
14Эртэ үглөөгүүр шангаар найза нүхэртөө үреэдэг хүн хараал хэлэжэ байһантай адли.
15Гэмэргэн эмэ бороотой үдэртэ залхуутай болоһон бороогой уһантай адли.
16Тэрэниие номгоруулха гээшэ һалхи зогсоохотой гү, али гараараа тоһо адхажа абаһантай адли.
17Түмэр түмэрые эрилдэг, хүн хүниие хурсалдаг.
18Архиин жэмэсэй модо харууһалагша үрэ жэмэсынь эдихэ, эзэндээ һанаагаа табигша хүндэдэ хүртэхэ.
19Уһанай нюрууда хүнэй шарай харагдадагтал хүнэй зүрхэн тэрэнэй шэнжэ харуулна.
20Үхэлэй орон ба Хосорол хэзээшье сададаггүй шэнги хүнэй нюдэн хэзээдэшье ханадаггүй.
21Мүнгэ хайлуулдаг амһарта ба алта сэбэрлэдэг гал дүлэн мэтэ магтаалай үгэнүүд хүниие туршан шалгана.
22Тэнэг хүниие орооһо таряантай хамта уур соо хээд, нюдүүрээр нюдөөшье һаа, тэнэгынь һалахагүй.
23Хонидойнгоо тоое сээжээр мэдэ, мал һүрэгтөө анхаралаа таби.
24Энэ баялиг мүнхэ бэшэ, хаанайшье титим уг дамжан үгтэхэгүй ушар байха.
25Ногоон хагдараа гэхэдэ хэнзэ бултайжа, хадын ногоон хуряагдаба.
26Хурьганай арһан шинии хубсаһан боложо, эшэгэдшни газарай түлөөһэн болоно.
27Шамайе ба гэр бүлыешни, тэрээнһээ гадна зараса басагадыешниш тэжээхээр ямаанай һүн шамда элбэг байгуужаг.