‏ Proverbs 29

Магталга ба зэмэлэл

1Хүжүүндээ найраад, зэмэлэл шагнадаггүй хүн нэгэ үдэр гэнтэ бусалтагүй унана.
2Зүб шударга хүнүүдэй дэбжэхэдэ, арад түмэн баяртай байдаг. Харин нүгэлтэнэй засагта байхада, арад зон халагладаг.
3Сэсэн мэргэндэ дуратай хүн эсэгэеэ баярлуулдаг. Янхан эмэнүүдтэ харгылагша эд зөөриеэ баража дууһана.
4Хаанай шударга ёһо улас орониие бэхижүүлнэ. Харин эдилгэ абадаг ёһо тэрэниие доройтуулдаг.
5Нүхэртөө билдагуушалдаг хүн урьха тэрээндэ түхеэрнэ.
6Хуулигүй хүн нүгэл хилэнсэгтээ урьхадуулдаг. Харин үнэн шударга хүн хүхюутэй байдаг.
7Үнэн шударга хүн ядуугай эрхын түлөө һанаагаа табидаг. Харин хуулигүй хүн энээниие ойлгодоггүй.
8Убайгүй һамуун хүнүүд хотодо үймөө үүсхэдэг. Харин сэсэшүүл уур хилэн номгоруулдаг.
9Сэсэн тэнэг хоёрой хэрэг шиидхэлгэдэ уур сухал, энеэдэн таһархагүй.
10Алууршад гэмгүй хүниие үзэн ядадаг, сэхэ сэбэр хүнүүд ами наһан тухайнь һанаагаа табидаг.
11Тэнэг мунхаг уураа барижа шададаггүй, харин сэсэн хүн бэеэ баридаг.
12Удамарша хүн хуурмаг үгэ шагнадаг һаань, тэрэнэй түшэмэл туһалагшад нүгэлтэн боложо хубирна.
13Ядуу хүн ба дарлагша хоёрой адли зүйл гэхэдэ тэдэнэй нюдэндэ гэрэл Эзэнһээ носодог.
14Хэрбээ хаан үгытэй ядуушуулые шударгаар шүүн шиидхэдэг һаань, хаан шэрээнь мүнхэ байха.
15Һабаа бургааһан, зэмэлэл хоёр сэсэ мэргэниие үгэдэг. Зоргон соонь орхигдоһон хүүгэд эхэеэ эшэбэритэй байдалда оруулха.
16Нүгэлтэнэй олошорхо тума нүгэл нэмэнэ. Гэбэшье үнэн шударга хүнүүд тэдэнэй уналга үзэхэ.
17Хүбүүгээ хэһээдэг бай. Тиигэбэл тэрэнэй түлөө һанаагаа зобохоёо болихош, сэдьхэлыш тэрэ баярлуулха.
18Дээрэһээ зүн мэдэлгэ үгы байхадаа, арад түмэн журамгүй байна. Харин Хуули сахигша жаргалтай.
19Зарасада үгөөрөө заабарилжа болохогүй. Ойлгоһоншье һаа, хэбэрээ мэдүүлхэгүй.
20Урид аматай хүниие хараа һэн гүш? Тиимэ хүндэ найданхаар тэнэг нэгэнэй заһаралгада найдаһан дээрэ.
21Хэрбээ зарсые багаһаань эрхэлүүлбэл, хожомынь эзэнэйнгээ мэдэлһээ гарааб гэхэ жэшээтэй.
22Ууртай хүн хэрэлдээ үүдхэнэ, түргэн сухалтай хүн гэм нүгэлдэ абтана.
23Бардам зан хүниие дарана, харин гудагар номгон хүн хүндэдэ хүртэнэ.
24Хулгайшантай хамтарагша бэедээ дайсан болоно. Хараал дуулаашье һаа, тэрэ абяагүй һуудаг.
25Хүнһөө айха гээшэ занга юм. Харин Эзэндэ этигэдэг хүн аюулда орохогүй.
26Олон хүнүүд засаг баригшын талархал бэдэрдэг. Үнэн шударга ёһо Эзэнһээ гэжэ тэдэ мартадаг.
27Үнэн шударга хүнүүд хуулигүй нүгэлтэһөө зэбүүсэдэг. Сэхэ замаар ябагшадһаа нүгэлтэн зэбүүсэдэг.