Pro 30 | BxrBBL2024 | STEP | Якээгэй хүбүүн Агуурай айлдаһан үгэнүүд. Энэ хүн Итиээлдэ ба Ухаалда иигэжэ хэлэһэн байна:

‏ Proverbs 30

Нэмэн хэлэгдэһэн һургаал

Агуурай үгэнүүд

1 Якээгэй хүбүүн Агуурай айлдаһан үгэнүүд. Энэ хүн Итиээлдэ ба Ухаалда иигэжэ хэлэһэн байна:
2 – Хүнүүдһээ эгээл мунхаг гэбэл би таараха байнаб. Хүнэй ухаан намда байхагүй.
3 Би мэргэн ухаанда һураагүйб. Нангин зүйлэй мэдэлгэ намда байхагүй.
4 Хэн тэнгэри өөдэ ошоод, буужа ерээб? Хэн һалхиие гартаа адхажа байгааб? Хэн уһа хубсаһандаа суглуулааб? Хэн дэлхэйн хамаг хизаарые тогтоогооб? Тэрэнэй нэрэ болон хүбүүнэйнь нэрэ хэн бэ? Та үнэхөөр мэдэнэ ёһотойт.
5 Бурханай бүхы үгэнүүд арюун, Тэрээндэ найдагшадта Тэрэ халхабша юм.
6 Тэрэнэй үгэдэ бү нэмэ. Тиигэбэлшни, Тэрэ шамайе буруудхажа, ши худалша болохош.

Тоодо үндэһэлһэн һургаал

7 Хоёр зүйлые би Танһаа гуйжа байнаб. Минии амиды байһан дээрэ бү арсыт.
8 Хооһон ба худал үгэ намһаа холо байлгыт. Намайе хооһон ядуушье бэшэ, баян шадалтайшье бэшэ байлгаарайт. Минии хуби болохо хоол хүнэһэ үгэжэ хайрлаарайт.
9 Ушарынь тэрэ хубиһаа үлүүдэ хүртэжэ, гэдэһээ садаад, «Эзэн гэжэ хэн юм бэ?» гэжэ хэлэн Танһаа арсахагүйн тулада, үгышье һаа, ядуу болоод, хулгай хэжэ, Бурханай нэрые бузарлахагүйн тулада бэлэй.
10 Эзэнэйнь нюур дээрэ зарсые бү харда. Тэрэнэй хараал шамда буужа, буруутан болохош.
11 Эсэгэдээ хараал хэлэжэ, эхэеэ үреэхэгүй хүнүүд байдаг.
12 Өөрын нюдэндэ сэбэр хэмээхэ, үнэндөө хирэ богто баригдашаһан хүнүүд баһа байха.
13 Баһамжалһан нюдэтэй ба дээгүүр харасатайшье нэгэн байха.
14 Зобоһон зониие дэлхэйһээ арилгахаар, ядуу хүнүүдые залгихаар бэлэн шүдэниинь илдэ шэнги, үргэниинь хутага шэнги хүнүүд байха.
15 Хомхой сэдьхэл хоёр басагатай, тэдэнь «Үгэ» гэжэл байдаг. Ханажа сададаггүй гурбан зүйл, «одоо хүрөө» гэжэ хэлэдэггүй дүрбэдэхи зүйл бии.
16 Эдэ хадаа Үхэлэй орон, үрэ хүүгэдгүй хэбэл, уһа уужа ханадаггүй газар ба «хүрөө» гэжэ хэзээдэшье хэлэдэггүй гал мүн.
17 Эсэгэеэ баһажа, эхэеэ тоодоггүй хүнэй нюдые хара хирээ тоншожо, харсага шубуун эдихэ.
18 Минии ойлгохогүй гурбан зүйл байха. Дүрбэдэхииень бүришье ойлгохогүй юм.
19 Эдэ хадаа тэнгэридэ ниидэһэн бүргэдэй зам, хабсагай дээрэ муралзаһан могойн зам, далайн дунда онгосын зам ба басагантай ханилһан эрын зам болоно.
20 Эрэеэ мэхэлдэг һадар эмын замынь эли: тэрэ эдижэ, амаа аршаад, «Би буруу юумэ хээгүйб» гэжэ хэлэхэ.
21 Гурбан зүйлһөө газар шэшэрдэг, дүрбэдэхииень даадаггүй гэбэл:
22 хаан шэрээдэ заларһан зарасые, садатараа эдеэлдэг тэнэгые,
23 хадамда гараһан һалихай эхэнэрые, эзэн эхэнэрэйнгээ орондо эзэн болоһон зараса эхэнэрые.
24 Дэлхэй дээрэ бага аад, ёһото мэргэн дүрбэн зүйл бии:
25 шоргоолжон харахада хүсөөр багашье һаа, нажар зундаа эсэн сусангүй эдихэ хоолоо нөөсэлдэг,
26 хадын хулганаан ахирханшье һаа, хабсагайн дундуур үүрээ түхеэрдэг,
27 таршаанууд хаан үгышье һаа, нэгэ жагсаалаар алхалдаг,
28 гүрбэл һабараараа арайхан аһалдаашье һаа, хаанай ордондо байжа болодог.
29 Жэрбэгэр тэгшэ бэетэй гурбан, һүрлэг алхадалтай дүрбэдэхинь:
30 хэнһээшье түбэгшөөдэггүй амитадай хаан арсалан хүшэрхэг,
31 удамарша эрэ тахяа, тэхэ болон баатарнуудтайгаа хамта ябаһан хаан бэлэй.
32 Өөрыгөө үргэжэ, мунхаг зан гаргаһан, үгы гэбэл, муу юумэ һэдэһэн байбал – гараа аман дэрээ таби.
33 Һүнһөө сүсэгы, удаань тоһон гарадаг, хамар сохиходо, шуһан гоожодог. Тэрээн шэнги уурта абтаха ябадал хёморол үүдхэдэг.