‏ Proverbs 31

Лэмүһээл хаанай үгэ

1Лэмүһээл хаанай эхын хүбүүндээ хэлэһэн һургаал:
2Зай юун бэ, хүбүүмни? Юун бэ, хэбэл сооһоом гараһан үримни? Юун бэ, минии тангаригуудай хүбүүн?
3Эмэгтэй хүндэ хүсөө баража бү бай, хаадые һүйдхэдэг эхэнэрнүүдтэ хүсэл зоригоо эзэмдүүлжэ болохогүй.
4Лэмүһээл, хаан хүнэй үзэмэй дараһан архи уухань зохидгүй зүйл гээшэ. Уг изагууртанай уухаяа үзэмэй дараһан архи бэдэржэ ябахань таагүй.
5Тэдэ уужа һогтоод, хуули тогтоолнуудаа мартажа, зобоһон зоной эрхэ ашаг ула дороо гэшхэжэ магадгүй.
6Үхэлдэ дүтэлһэн хүнүүдтэ үзэмэй дараһан архи бари, амидаралынь гашуун хүнүүдтэ үзэмэй дараһан архи аягала.
7Тэрэ уухадаа ядуу байдалаа мартан, зоболон тухайгаа бү һанаг.
8Хэлэхэ аргагүй хүнүүдэй түлөө, золгүй бүхы хүнүүдэй түлөө амаа нээ.
9Үгэ амалжа, зүб шударгаар шүүжэ, ядуу гуйраншын болон гай тодхорто орогшын эрхэ хамгаала.

Һамганай магтаал

א Алээп
10Хэн арбан тэгшэ һайхан эхэнэрые оложо шадахаб? Тиимэ эхэнэр эрдэниһээ үлүү үнэтэй.
ב Бээт
11Нүхэрынь тэрээндэ бүрин этигэн юугээршье дутахагүй.
ג Гиимэл
12Тэрэ ами наһанайнгаа бүхы үдэрнүүдтэ һайн ашыень харюулдаг.
ד Даалэт
13маалинга ажаллана гү, юрэдөө гарынь сүлөө байдаггүй.
ה Һээ
14Худалдаанай онгосо мэтэ хоол хүнэһөө холоһоо асардаг.
ו Ваав
15Үүр сайхаһаа урид бодожо, гэр бүлэдөө эдеэ бэлдэжэ, шэбэгшэнүүдтээ хэхэ юумынь хубаадаг.
ז Заайин
16Тэрэ газар үзөөд, худалдан абадаг, өөрын оролдолгоор уһан үзэмэй һөөг тарижа, жэмэс ехээр ургуулдаг.
ח Хээт
17Гуя ташааниинь хүдэр бэхи, гарынь хүсэ оронхой.
ט Тээт
18Наймаань урагшатай ябахадань урмашан, бүхэли һүниндөө тоһон дэнгынь унтарнагүй.
י Ёд
19Гартаа ээрүүл барижа, хургадынь онгосоһоо һаланагүй.
כ Каап
20Үгытэй ядууда тэрэ үгэдэг, зобоһондо туһалха гараа һарбайдаг.
ל Лаамэд
21Саһанай ороходонь һанаагаа зобохо ушар байхагүй, гэр бүлэнь дулаан хубсаһатай.
מ Мээм
22Өөртөөшье гоё хубсаһа уралан оёдог, маалинга болон улаан хилгааһан хубсаһатай ябадаг.
נ Нүүн
23Үбгэниинь орон нютагтаа хүндэтэй, хотын хашаагай үүдэнэй хажууда нютагай ахамад зоной дунда һуудаг.
ס Саамэх
24Тэрэ самса оёжо худалдадаг, Кенаанай хүпеэсүүдтэ бүһэ абаашадаг.
ע Аайин
25Хүсэ шадал ба нэрэ хүндэ тэрэнэй хубсаһан болонхой, энеэбхилэлээр үдэрөө угтана.
פ Пээ
26Хэлэн дээрэнь – сэсэн үгэ, амаа нээхэдээ, һайн һургаал хэлэдэг.
צ Цадээ
27Тэрэ гэртэхи хэрэгүүдтээ жэншэдгүй анхардаг ба миин һуухые мэдэдэггүй.
ק Кооп
28Хүүгэдынь үглөөгүүр һэрихэһээ үреэлтэ үгэнүүдые хэлэнэ, нүхэрынь тэрэниие магтана:
ר Рээш
29«Олон эмэгтэйшүүл һайн үйлэ хэдэг, харин ши тэдэнһээ үлүү байнаш».
ש Шиин
30Дура буляама байдал хуурмаг, гоё үзэсхэлэн хооһон шанартай. Харин Эзэнһээ түбэгшөөн бэшэрдэг эхэнэр магтаал абаха ушартай.
ת Таав
31Ажал үйлынь ашаг үрэ тэрээндэ хүртүүлэ. Хотын хашаагай үүдэнэй хажууда тэрээниие хүндэлэн магтагты!