‏ Proverbs 6

Юрэ байдалай хэшээлнүүд

1Хүбүүмни, ши ондоо хүнэй үри шэриин түлөө
харюусалга бэедээ абажа бү бай.
Үрииень бусаахаб гэжэ гар даабал,
2амалһан үгынгөө зангада ороо гээшэш.
3Яанабши, тэрэ хүнэй гарта ороһон хойноо
ши ошожо өөрыгөө абара.
Тэрэ хүниие гуйжа, үриһөө сүлөөрхые оролдо.
4Үргэһэ нойрто диилдэн олойржо бү бай.
5Ангуушанай гарһаа зайлаһан гүрөөһэн мэтэ,
шубуу баригшын торһоо мултарһан жэгүүртэн мэтэ тэрьелжэ гара.
6Залхуу ши, шоргоолзоной хүдэлхые ажаглан хара,
тэрэ ехэ сэсэн амитан.
7Тэрээндэ ноён, ахалагша, ударидагша гэжэ байхагүй.
8Өөрынгөө хоол тэрэ зунай сагта бэлдэжэ,
ургаса хуряаха сагтаа нөөсэлэн хадагалдаг.
9Залхуу ши, хэды болотор хэбтэхэбши?
Нойрһоо хэзээ һэрихэ юмши?
10Залхуунь харюусана:
«Нэгэ жаахан унтаял даа, үргэһөө абаһуулби,
гараа хабсараад хэбтэд гэһүүлби».
11Тиигэһээр байтаршни хооһон ядуу байдал хажуудаш ерэхэ,
зайгуул хүндэ адли бии болохо,
зоболон дээрмэшэн мэтэ дээрэш бууха.
12– 13Муу, хорон һанаатай хүн нюдөөрөө эмнин,
хүлөөрөө дохёо үгэжэ,
хургаараа занган худалаар хэлэдэг.
14Хара һанаандаа үргэлжэ хорото муу хэрэг һэдэжэ,
хёморол үүсхэдэг.
15Гэбэшье хүлеэгдээгүй гай гасалан гэнтэ тэрээн дээрэ бууха.
16Эзэн зургаан мууе үзэн ядадаг,
долоодохиһоо мүн лэ зэбүүсэдэг. Тэдэ гэбэл:
17ехэрхүү хараса, худалша хэлэн,
гэмгүй хүнэй шуһа урадхуулдаг гарнууд,
18хара муухайе һэдэгшэ сэдьхэл,
хорон муу руу яарагша хүл,
19хуурмаг хэлэдэг гэршэлэгшэ,
аха дүүнэрэй хоорондо хэрүүл наншалдаа үүсхэгшэ болоно.

Дахяад һамуу ябадалһаа һэргылэлгэ

20Хүбүүмни эсэгынгээ заабари сахи,
эхынгээ захиһаниие бү мартаарай.
21Тэдэнэй үгэнүүдые сэдьхэлдээ хадуужа аба,
зүүдхэл мэтэ хүзүүндээ үлгэ.
22Ябаһан замдашни тэдэ ударидажа, унтахадаш хамгаалха,
һэрихэдэш шамтай ярилдаха.
23Эхэ эсэгыншни захяа заабари хадаа зүб харгы харуулһан дэн,
һургаал – гэрэл,
шанга заабари – амидаралай зам гээшэ.
24Тэдэнэй һургаал муу эмэһээ шамайе зайлуулха,
үбгэнтэй эхэнэрэй альбан үгэһөө холо байлгаха.
25Тэрэ эмын тансаг һайханиинь шинии дура буляаха ёһогүй,
харасань бэе тээшэ бү татаг.
26Ушарынь хадаа һамуун эмэ зүһэм талханһаа үнэгүй,
ондоо хүнэй забхайрһан һамган ами наһыеш абажа болохо.
27Хүн хубсаһаяа галдангүй гал үбэртэлжэ шадахагүй,
28хүлөө шатаангүй халуун нүүрһэн дээгүүр ябажа шадахагүй.
29Хүршынгөө һамганда харгылха гээшэ эгээл тиимэ байна.
Тэрэ эхэнэртэ дүтэлһэн хүн хэһээлтэ амасаха.
30– 31Үлэсхэлэн байһандаа эдеэ хоол хулгайлһан хүниие ехэ харшалдаггүй.
Гэбэшье баригдабал, тэрэ долоо дахин нугалжа түлэхэ,
хамаг эд зөөриеэ үгэхэ болоно.
32Харин эхэнэртэй забхайрһан хүн одоол тэнэг гээшэ,
тэнэгээрээ тархяа эдинэ ха юм.
33Зоной дунда тэрэ хүндэеэ буураха, сохюулха,
эшэгүүринь хэзээшье арилхагүй.
34Забхайрһан эмын үбгэнэй жүтөөрхэл уур хилэнгыень соробхилуулдаг,
үһөөгөө абахаяа һанабал, тэрэ хайрлаха гэжэ мэдэхэгүй.
35Тэрэ ямаршье түлөөһэ хүлеэн абахагүй,
бэлэг-сэлэг тэрэнэй сэдьхэл заһахагүй.