‏ Psalms 104

(1 Уг 16:8-22)

1Эзэниие магтан дуулагты, нэрыень дурдан дуудагты.
Арадуудта хэрэгүүд тушаань дуулгагты.
2Эзэн тушаа дуулагты, магтаал үргэгты,
гайхамшагта үзэгдэлнүүд тушаань зар тунхаг тараагты.
3Нангин нэрыень магтан дуулагты.
Эзэндэ эрмэлзэгшэ зоной зүрхэ сэдьхэл баясан байг лэ!
4Эзэниие болон хүсыень бэдэрэгты,
Тэрээн руу хододоо шармайгты.
5Тэрэнэй хэһэн гайхамшагта хэрэгүүдые, бэлгэ тэмдэгүүдые,
айладхаһан шиидхэбэринүүдыень һаныт.
6Абраһаамай үри һадаһад, Тэрэнэй зарасанар,
Тэрэнэй шэлэн һунгаһан Яковай үхибүүд таанар!

7Тэрэ бол манай Эзэн Бурхан,
бүхы дэлхэйгээр Тэрэнэй зарга шүүлгэн.
8Мянгаад үеын туршада үргэлжэлэгшэ
Өөрын хэлсээе Тэрэ һанадаг.
9Энэ хадаа Абраһаамтай баталһан хэлсээниинь,
Исаагта үгэһэн тангаригынь юм.
10Тэрэниие Яковта хуули болгон,
Израильда хэтэ мүнхын хэлсээн гэжэ баталһан юм.
11«Таанадай уг залгамжалан дамжуулха зүйл болгон
Ханаһаанай газар дайда үгэхэб» гэжэ Тэрэ айладхаһан бэлэй.
12Тиихэдэ тэдэ тоогоор үсөөн,
угаа үсөөн болон хариин газарта ерүүл зон байгаа.
13Тэдэ үндэһэтэнһээ нүгөө үндэһэтэн руу,
элдэб хан түрэһөө нүгөөдэ руу тэнэжэ-түншэжэ ябаа.
14Тэрэ тэдэниие харшалхые хэндэшье зүбшөөгөөгүй,
тэдээн тушаа хаашуулдашье зарлиг үгөө:
15«Тоһолон шэлэһэн зондомни гар бү хүрэгты,
лүндэншэдтэмни муу юумэ бү хэгты!»

16Тэрэ нютаг руу үлэсэхэлэн хооһон байдал дуудаба,
эдеэ хоолой бүхы зүйл үгы болобо.
17Тэдэнэй урда нэгэ хүниие эльгээбэ,
иигэжэ Иосиф богоол боложо худалдагдаа бэлэй.
18Хүлыень гэнжээр гэнжэлбэ,
хоолойень түмэрөөр бахалуурдаба.
19Харин саг ерэжэ, айладхалынь бэелбэ!
Иигэжэ Эзэнэй үгэ тэрэниие туршаба.
20Хаан зониие эльгэжэ, тэрэниие сүлөөлбэ,
үндэһэтэдэй захирагша тэрэниие табиба;
21Тэрэ тэрэниие гэрэйнгээ эзэн,
бүхы зөөриингөө захирагша болгобо.
22Энэ хадаа ноёдые зонхилон байхын,
аха захатанда сэсэн мэргэн ухаа заахын тула бэлэй.
23Израиль Египет руу ерэбэ,
Яков Хаамай газар нютагта нүүбэ.
24Бурхан арад түмэнөө угаа үнэр болгобо,
дайсадһаань хүсэтэй болгобо.
25Тиихэдэнь тэдэ арад түмэнииень үзэн ядадаг болобо,
зарасанарайнь урдаһаа муу юумэ түсэблэжэ эхилбэ.
26Харин Тэрэ Өөрын зараса Моисей гэгшые,
шэлэн һунгаһан Аһароониие эльгэбэ.
27Тэдэ бэлгэ тэмдэгыень харуулба,
Хаамай газар нютагта гайхамшагта үйлэнүүдые харуулба.
28Тэрэ харанхые эльгэбэ, тойроод харанхы болобо,
тэдэ үгыень дуулаба.

29Бүхы орон нютагаар уһые шуһан болгобо,
голой загаһа усадхаба.
30Газарынь бахаар дүүрэшэбэ,
хаанай унталгын таһаг руушье тэдэ нэбтэрэн ороол.
31Тэрэ захирба, элдэб аляаһан бии болобо,
орон нютагай бүхы булангаар бөөһэн дүүрэшэбэ.
32Бороогой орондо Тэрэ тэдээн руу мүндэр эльгэбэ,
газар уһандань дүлэлзэһэн гал шэглүүлбэ.
33Уһан үзэмэйнь модо болон инжирые хуха сохибо,
орон нютагтань модо унагааба.
34Тэрэ айладхаба, таршаа шумуул ерэбэ,
тоо томшогүй олон таршаа шумуул бии болобо.
35Тиигээд тэдэнэй бүхы ногооень,
таряалангайнь бүхы ургасые эдин һалгааба.
36Тэрэ орон нютагта ууган хүбүүдые,
эрэ хүсэ шадалай түрүүшын үрэнүүдые сохижо унагааба.
37Удаань Тэрэ Израилиин арад түмэниие алта, мүнгэтэй тэндэһээ гаргаа,
обогуудайнь дунда үбдэһэн хэншье байгаагүй.
38Тэдэнэй гаража ошоходо Египет баярлаа.
Юуб гэбэл, тэдээнһээ ехэ айһан байгаа бшуу.
39Тэрэ үүлые хүшэгэ болгобо,
һүниндөө гэрэлтүүлхын тула гал эльгэбэ.
40Тэдэнэй гуйхада, Тэрэ бүднэ шубуу эльгээгээ,
тэдэниие тэнгэриин хилээмээр хангаа.
41Хабсагай хахалхадань, уһан гараба,
сүл губяар гол мүрэн болон урдаба.
42Юуб гэбэл, Тэрэ Өөрын нангин үгые,
Өөрын зараса Абраһаамые һанаа бшуу.
43Иигэжэ Тэрэ арад түмэнөө баяр баясхалантайгаар,
шэлэгшэ зоноо хүхюутэйгөөр гаргаба.
44Тэрэ тэдээндэ бусад арадуудай газар уһа үгэбэ,
тэдэ тус арадуудай ажалай үрэ дүн өөрын болгобо.
45Энэ хадаа юундэб гэбэл, хуулинуудаа тэдэнээр сахюулхын,
һургаалнуудаа тэдэнээр даган сахюулхын тула бэлэй.
Эзэниие магтагты!