‏ Psalms 134

1Эзэниие магтагты!
Эзэнэй нэрэ магтагты!
Эзэнэй зарасанар, магтагты!
2Эзэнэй үргөө соо,
маанадай Бурханай үргөөгэй хашаа дотор зогсогшод,

3Эзэниие магтагты. Юуб гэбэл, Эзэн һайн.
Нэрыень магтан дуулахада хэды һайхан бэ!
4Юуб гэхэдэ, Эзэн Өөртөө гэжэ Яковые,
Өөрын үмсэ болгон Израилиие шэлээ бэлэйл.

5Эзэн хадаа агууехэ ба
бидэнэй Эзэн болбол бүхы бурхадһаа дээгүүр гээшые мэдэнэм.
6Эзэн һанаһан бүхы хэрэгээ
тэнгэридэ болон газар дээрэ үйлэдөөд,
далайнуудаар болон гүн уһанда хэдэг юм.
7Тэрэ дэлхэйн захаһаа уур манан дээшэнь хөөрүүлдэг,
бороогой үедэ сахилгаа бүтээжэ,
хадагалагша газарһаа һалхи гаргадаг.
8Тэрэ Египедтэ бүхы уугануудые –
хүнэй хүүгэдые, амитанай түлые хюдаа.
9Египет, Тэрэ шинии дунда
дүлгэ тэмдэгүүдые ба гайхалтай хэрэгүүдые
фараон ба түшэмэлнүүд дээрэнь хээ бэлэйл.
10Тэрэ олон үндэһэ яһатаниие бута сохижо,
хүсэ шадалтай хаашуулые алаа:
11Эмоор арадай Сиһоон хааниие,
Башаанай Оог хааниие,
Ханаһаанай бүхы хаан түрэ бута сохиһон юм.
12Газар уһыень үмсын болгон
Өөрын арад Израильда үгөө бэлэй.

13Эзэн! Нэрэтнай хэтэ мүнхэдөө оршохо!
Эзэн! Тан тухай дурасхал үеһөө үедэ дамжана.
14Эзэн арад түмэнөө шүүхэ,
Өөрын зарасанарые хайрлаха.

15Бусад арадуудай онгонууд хадаа мүнгэн ба алтан,
хүнэй гарай бүтээлнүүд юм.
16Аматай аад, дуугардаггүй,
нюдэтэй аад, харадаггүй.
17Шэхэтэй аад, дууладаггүй,
амандань ямаршье амисхал байхагүй.
18Тэдэниие бүтээгшэд, тэдээндэ этигэгшэд бултадаа
тэдээн шэнги болог лэ!

19Израилиин түрэл түтим, Эзэниие магтагты!
Аһарооной түрэл гарал, Эзэниие магтагты!
20Левиин түрэл гарал, Эзэниие магтагты!
Эзэнһээ түбэгшөөдэг зон, Эзэниие магтагты!
21Иерусалимда оршон һуудаг
Эзэн Сионһоо магтагдаха болтогой!

Эзэниие магтагты!