‏ Psalms 138

1[Дуунай бүлэгэй хүтэлбэрилэгшэдэ. Давидай магтаал дуун.]
Эзэн, Та намайе туршаат, намайе мэдэнэт.
2Минии һууха, бодохыешье Та мэдэнэт.
Хаана холоһоо минии һанаан бодолые ойлгонот.
3Ябана гүб, хэбтэнэ гүб – Та нарибшалан шэнжэлнэт.
Минии бүхы харгы зам Танда мэдээжэ.
4Минии ганса үгэ үгүүлхымнишье урда тээ
Та, Эзэн, тэрэниием гүйсэд мэдээд байнат.
5Намайе тойроод дууһан байнат,
Өөрын гараар намайе аршалнат.
6Иимэ мэдэлгэ намда угаа гайхамшагтай,
би тэрэнэй үндэртэ хүрэжэ шадахагүйб.
7Танай Һүлдэһөө би хайшаа ошожо шадахабиб?
Танай нюурһаа хайшаа зугадажа шадахабиб?
8Минии тэнгэри руу ошоходо, Та тэндэ байнат.
Минии Үхэлэй орон соо ороо заһабал, Та мүн лэ тэндэ байнат.
9Үүрэй толоноор жэгүүрлэн,
тэнгисэй захадашье байрлаа һаам,
10тэндэшье гартнай намайе хүтэлхэ,
баруун гартнай намайе барин байха.
11Хэрбээ би «харанхы үнэхөөр намайе тойрог,
намайе хүреэлһэн гэрэл һүни болог» гээшье һаам,
12харанхышье Танда харанхы бэшэ,
һүнишье үдэр мэтэ гэрэлтэй бэлэй.
Гэрэл харанхы хоёр хоюулаа адлихан юм.

13Ушар юуб гэбэл, минии досоо эрхэтэнүүдые Та бии болгоот.
Эхымни хэбэл соо намайе бүрилдүүлээт.
14Би аймшагтай болон гайхамшагтай бүтээгдэһэн тула
Танда магтаал соло дууданаб.
Үйлэ хэрэгүүдтнай гайхалтай,
би энээниие һайн мэдэнэб.

15Нюусаар минии бүрилдэжэ,
газарай гүн соо хээлэн бүтээгдэжэ байхадашье
бэеымни яһанууд Танһаа нюугаатай бэшэ бэлэй.

16Түхэлөө оложо үрдеэгүй үрэ байхадам нюдэдтнай хараһан гээшэ.
Намда тодорхойлогдоһон үдэрнүүдэй нэгэньшье болоогүй байхада
тэдэ бултадаа Танай ном соо бэшэгдэнхэй байгаа.
17Бурхан, Танай бодолнуудые ойлгохом хэды хүндэ гээшэб!
Тиигээд тэдэ хэды олон гээшэб!
18Хэрбээ тэдэниие тоолоо һаам,
элһэнэй тооһоо хэды олон гээшэб!

Һэрихэдээшье Тантай хамтаб!

19Ай, Бурхан! Хорото муу хүниие Та хюдаһайт!
Алууршад, намһаа холодогты!
20Тэдэ Тан тухай худал хэлэнэ,
нэрыетнай дэмы дурдана.

21Эзэн, Таниие үзэн ядагшадые би ямараар үзэн ядадаг гээшэбиб,
Танай урдаһаа һөөргэдэгшэд намда хэды ехэ жэгшүүритэйб!
22Туйлдаа хүрэтэрөө тэдэниие үзэн яданаб,
тэдэ – минии дайсад мүн.
23Бурхан, намайе туршажа, бодолым мэдыт.
Туршаад намайе ухаан соом байгаашые ойлгыт.
24Би зүб харгы замаар ябана гүб? Харыт даа!

Элинсэг хулинсагайм зүб замаар намайе залан ябуулыт!