‏ Psalms 34

1[Давидай зохёоһон.]
Эзэн, намтай заргалдагшадые шүүгыт,
намтай тулалдагшадтай тулалдыт.
2Бамбай, хуяг абаад,
минии түлөө оролсыт.
3Жада, һүхэ абаад,
намайе намнагшадые угтаарайт.
«Би шинии абарал мүн!»
гэжэ намда хэлыт.

4Намайе алахаяа һанагша зонтой
эшхэбтэр байдал, аягүй ушар тохёолдог лэ.
Намда муу һанаашархагшад
эшэн һөөргөө бусаг лэ.
5Һалхинда хиидэгшэ мэхиинэ мэтэ болог,
Эзэнэй Эльгээмэл тэдэниие хиидүүлэг.
6Замынь харанхы, халтирхай байг,
Эзэнэй Эльгээмэл тэдэниие тууг.
7Юуб гэбэл, ямаршье шалтагаангүйгөөр тэдэ намда урьха табина,
ямаршье шалтагаангүйгөөр тэдэ намда нүхэ малтана.
8Мэдээгүй байтарнь хосорол тэдээндэ ерэг лэ,
өөһэдын табиһан урьхада тэдэ өөһэдөө орог!
Тиимэл һүйдхэлдэ тэдэниие унагаагыт!
9Минии сэдьхэл Эзэндэ баярлажа,
абарһандань баясан байнал!
10Минии бүхы бэе иигэжэ хэлэнэ:
«Эзэн! Хэн Тантай адлиб?
Хүсэгүйе хүсэтэйһөө,
үгытэйе, ядууе дээрмэшэдһээ абараат!»

11Намайе худалаар хардагшад урдаһаам тулана,
минии мэдэхэгүй юумые мүшхэн байна.
12Тэдэ туһые уһаар харюулна,
намайе хооһоруулна.
13Харин би тэдэнэй үбдэжэ байхада
гашуудалай хубсаһа үмдэжэ,
масаг баридаг бэлэйб.
Тэдээн тушаа зальбарални
Танаар анхарагдангүй, намдаа эрьег лэ!
14Тэдэнэй анда нүхэр, аха дүү шэнги байгааб,
эхынгээ хойноһоо гашуудажа байһандал
толгойгоо гунхылган бархиран ябааб.
15Харин минии бүдэрхэдэ, тэдэ баярлан суглараа,
урдаһаамни тулажа суглараа.
Зогсоо зайгүй тэдэ намайе гүжэрдээ,
яаһандам тиигээб – мэдэнэгүйб.
16Намайе баһан-доромжолон,
нам руу шүдөө хабиран байна.

17Ай, Эзэн! Та хэды болотор хаража байхабта?
Минии ами наһые хорото хэрэгүүдһээнь,
ори ганса амиием арсалангуудһаа абарыт!
18Би үргэн олон зоной дунда Танда талархал үргэхэб,
үй түмэн арад зоной дунда Танда магтаал дуулахаб.
19Ямаршье шалтагаангүй аад,
намайе үзэн ядагша зониие бү баясуулыт,
ямаршье шалтаггүй аад,
намда дайсан бологшодые нюдөөрөө эмнилдүүлэн бү байлгыт!
20Юуб гэхэдэ, тэдэ амгалан тайбан тухай ярина бэшэ,
дэлхэйн түбшэн зоной урдаһаа хуурмаг хэрэгүүдые ябуулна.
21Тэдэ нам руу амаа ангайлгажа,
«Тиимэ, тиимэ, бидэ бүгэдые хараабди!» гэжэ гүжэрдэнэ.

22Эзэн, Та энээниие хараа бэлэйт,
аниргүй бү байгыт!
Эзэн, намһаа бү холодыт!
23Бурхамни, Эзэмни, бодыт, һэриит,
зарга хэрэгыем шиидхыт!
24Минии Эзэн Бурхан, Өөрын зүб шударгыгаар
намайе шүүгыт,
намда дээрэлхэн дайсадни бү баясаг.
25Тэдэ «Зай, хүсэлнай бэелээ!» гэжэ бү һанаг лэ.
Тэдэ «Зай, тэрэниие залгяабди!» гэжэ бү хэлэг лэ.

26Минии зоболондо баясагшад бултадаа
эшхэбтэр аягүй байдалда орог!
Өөһэдыгөө минии дээгүүр үргэгшэд
эшхэбтэр муухай байдалда унаг!
27Харин намда һайе һанагшад
баясажа, хүхилдэжэ байг лэ!
«Өөрын зарасада һайн һайханиие хүсэгшэ Эзэн
агууехэ!» гэжэ таһалгаряагүй хэлэн байг лэ!

28Танай зүб шударгые хэлэмни тунхаглажа,
бүхэли үдэрын туршада Танда магтаал үргэхэл!