Psalms 35
1[Дуунай бүлэгэй хүтэлбэрилэгшэдэ: Эзэнэй зараса Давид зохёогоо.]2Муу хүн нүгэлдэ дуратай,
тэрэнь – зүрхэн соонь,
харин Бурханһаа айха гээшэ тэрээндэ байхагүй.
3Юуб гэхэдэ, өөрын гэм бэдэрэн,
үзэн ядан байһан мэтээр тэрэ
өөрөө өөртөө худалаар хэлэжэ байна.
4Аманһаань гараһан үгэнүүд – хорон муу болон худал,
Тэрэ сэсэн ухаан болон һайн үйлэ хэрэгүүд руу эрмэлзэдэггүй.
5Тэрэ орондоо ороод, муу муухай хэрэг түсэблэдэг,
буруу зам руу хадууран, бузар муухай хэрэгүүдһээ жэгшэдэггүй.
6Эзэн, энэрэл хайратнай тэнгэри хүрэтэр,
үнэншэ этигэлтнай огторгой хүрэтэр лэ!
7Танай зүб шударга агууехэ хада ууланууд мэтэ,
Танай үнэн шиидхэбэринүүд гүнзэгы далай мэтэ.
Эзэн, Та хүн болон амитадые абаран байнат.
8Бурхан, Танай энэрэл хайра хэды үнэтэй гээшэб!
Зон Танай жэгүүрэй һүүдэр доро хородог.
9Тэдэ үргөөгэйтнай баян хэшэгээр садхалан байдаг,
тэдэниие Өөрын тааламжатай голһоо ундалуулнат.
10Юуб гэбэл, амидаралай эхин Танда бии,
Танай гэрэл дорол гэгээн гэрэл үзэдэгбди.
11Таниие танидаг зондо энэрэл хайраа үршөөгыт,
үнэн сэхэ сэдьхэлтэйшүүлдэ зүб шударгаа хүртүүлыт!
12Бардамшалха гээшэ намтай бү тохёолдог,
муу хүнэй гараар намайе бү зайлуулыт!
13Хорото хэрэгүүдые үйлэдэгшэд тэндэ унаа!
Газарта унаад, бодожо шаданагүй.
Copyright information for
BxrBBL2024