‏ Psalms 36

1[Давидай зохёоһон.]
א Алээп Муу юумэ үйлэдэгшэдтэ бү атаарха,
буруу юумэ хэгшэдһээ боложо бү һанаа зобо.
2Юуб гэбэл, тэдэ удахагүй ногоон мэтэ сабшагдаха,
таряалангай ургамал мэтэ хагдарха.
ב Бээт 3Эзэндэ этигэжэ, һайе үйлэдэ,
газар дээр оршин һуужа, үнэн зүбые сахин байгаарай.
4Эзэндэ баярлан бай,
Тэрэ шамда хүсэһэн юумыеш үгэхэ.
ג Гиимэл 5Өөрын замые Эзэндэ даалга, Тэрээндэ этигэ,
Тиигэбэл, Тэрэ бэелүүлжэ үгэхэл.
6Тэрэ шинии зүб шударгые гэрэл мэтээр,
шударга хэрэгыеш үдын гэрэл мэтээр элирхэй болгохол.
ד Даалэт 7Эзэнэй урда абяагүй бай,
Тэрээндэ этигэн найда.
Амжалта туйлабашье,
хорон мууе түсэблэдэг зондо бү атаарха.
ה Һээ 8Уурлахаа боли, хилэнгээ марта,
бү атаарха, муу тээшэ шамайе энэ хүтэлхэл.
9Бузар муухай хэрэгүүдые үйлэдэгшэд усадхагдаха,
харин Эзэниие хүсэн хүлеэгшэд газар нютагые уг залгамжалха.
ו Ваав 10Мэнэ-мэнэ хорон һанаатан үгы болохонь.
Байгша газар руунь анхаран харахадаш, үгы болоод байхал.
11Газар үгытэй зондо үгтэхэл,
элбэг амгалан тайбан байдалаар тэдэ сэдьхэлээ ханан байхал.

ז Заайин 12Хорон муу хүн зүб шударга хүнэй урдаһаа
муу юумэ һанаашархана, шүдөө хабирна.
13Гэбэшье хэһээлтын үдэрынь ерэжэ байһые хараһандаа
Эзэн тэрээн дээрэ энеэнэ.
ח Хээт 14Үгытэй болон угаа ядууе унагаахын,
зүб сэхэ замаар ябагшадые алахын тула
хорон муу зон һэлмээ һугалаа,
һурша номоо хүбшэлөөл.
15Тэдэнэй һэлмэнь өөһэдынь зүрхэндэ зоогдог,
һурша номонь хухараг лэ!
ט Тээт 16Зүб шударга хүнэй багаханшье юумэнь
олон хорото зоной баялигһаа дээрэ.
17Юуб гэбэл, хорон һанаатанай гарынь хухалагдаха,
харин зүб шударга зониие Эзэн дэмжэдэг.
י Ёд 18Гэм зэмэгүй зоной амидарал Эзэнэй нюдэн доро,
тэдэнэй угайнь зөөри хэтэ мүнхэдөө юм.
19Гай тодхорой үедэ эшхэбтэр байдалда тэдэ орохогүй,
үлэсхэлэн хооһон байдалай сагта садхалан байхал.
כ Каап 20Харин хорон муу зон усадхагдаха,
Эзэнэй дайсад утаан мэтэ замхарха,
бэлшээриин ногоон мэтэ үгы болохо.

ל Лаамэд 21Хорон муу хүн зээлеэр абажа, һөөргэнь бусаадаггүй.
Харин зүб шударга хүн зээли элбэг үгэдэг.
22Бурханай юрөөлтэй зондо газар хүртэхэ,
харин Тэрэнэй хараалтай зон усадхагдаха.
מ Мээм 23Хүнэй алхамые Эзэн баталаа,
замынь аршалан байна.
24Бүдэрөөшье һаа, тэрэ унахагүй,
Эзэн гарһаань дүнгэхэ.

נ Нүүн 25Залуу байхаһаа үбгэртэрөө би
зүб шударга хүнэй хаяатай байхые,
уг удамайнь гуйраншалжа ябахые үзөөгүйб.
26Тэрэ хододоо элбэгээр зээли үгэдэг,
үри һадаһадынь юрөөлтэйл!
ס Саамэх 27Мууһаа зайлажа, һайе үйлэдэн бай,
тиигэбэл, хэтэ мүнхэдөө оршохош!
28Юуб гэбэл, Эзэн шударга ёһодо дуратай,
Өөртэнь үнэншэ зониие орхихогүй.

ע Аайин Тэдэ хэтэдээ хамгаалагдан байха,
харин хорон муу зоной уг удам усадхагдаха.
29Зүб шударга зон газарые эзэмдэхэ,
дээрэнь хэтэдээ ажаһуухал.
פ Пээ 30Зүб шударга хүнэй аманһаа сэсэн мэргэн,
хэлэнһээнь үнэн зүб үгэнүүд гарадаг.
31Бурханай һургаал ухаан бодолдонь,
буруу Тэрэ алхахагүй.
צ Цадээ 32Хорон муу хүн зүб шударга хүниие агнажа,
хорлон алаха аргаа бэдэржэ байна.
33Эзэн тэрээндэ зүб шударга хүниие дамжуулхагүй,
зарга шүүхын үедэ худалаар хардуулхагүй.

ק Кооп 34Эзэндэ этигэн бай,
замаарнь яба,
тиигэбэл, Тэрэ шамда газар эзэлүүлэн байлгаха,
хорон муу зоной усадхагдахые харахаш!
ר Рээш 35Һаглайжа, бүри һагсагар боложо байһан
модондол адли хорон муу, хэрзэгы хүниие хараа һэм.
36Теэд саг үнгэрөө, тэрэ үгы болоо.
Бэдэрнэб, тэрэниие олоногүйб.

ש Шиин 37Гэмгүй хүниие ажагла, үнэн сэдьхэлтэниие хара:
иимэ хүнэй ерээдүйнь амгалан тайбан мүн.
38Харин гэмтэй зон бултадаа үгы хэгдэхэ,
хорон муу зондо ерээдүй байхагүй.
ת Таав 39Зүб шударга зон Эзэнһээ абаралда хүртэхэ,
гай тодхорой үедэ Тэрэ тэдээндэ туһалха.
40Эзэн тэдэндэ туһалха, сүлөөрүүлхэ,
хорон муу зонһоо сүлөө болгон абарха,
юуб гэбэл, тэдэ Тэрээнһээ аршалалта гуйгаа бшуу.