‏ Psalms 43

1[Дуунай бүлэгэй хүтэлбэрилэгшэдэ: Коорахай уг удамай ирагуу үгэнүүд.]
2Бидэ үбгэ эсэгэнэрэймнай үедэ, тэрэ холын сагта,
Танай юу хэһые эсэгэнэрһээ өөрын шэхээр дуулаа бэлэйлди.
3Ондоо арадуудые Та Өөрын гараар усадхаат,
харин үбгэ эсэгэнэрымнай сэсэрлиг мэтээр һуулгаат,
бусад обогуудые һамна бута сохёот,
тэрэ газарһаа үлдөөт.
4Тэдэ һэлмээрээ газар нютаг эзэлээ бэшэ,
хүсэтэй байһань илалта туйлуулаа бэшэ,
харин Танай гар, хүсэ шадалтнай,
Танай шарайн гэрэл туяа!
Юуб гэбэл, Та тэдээндэ онсо һайнаар хандадаг бэлэйт.
5Бурхан, Та болбол минии Хаан!
Захиржа, Яковта абарал эльгыт!
6Тантай хамта бидэ, буханууд мэтэ, дайсадаа эбэрээрээ мүргэхэбди,
урдаһаамнай буһалгаалагшадые Танай нэрээр гэшхэхэбди.
7Өөрынгөө һурша номдо найданагүйб,
һэлмэмни намайе абархагүй,
8харин Та маанадые дайсадһаамнай абараат,
маанадые үзэн ядагшадые эшхэбтэр байдалда оруулаат.
9Бүхэлиин үдэр Бурханиие магтан байнабди,
хэтэ мүнхэдөө Танай нэрые алдаршуулнабди! [Хүгжэм]
10Гэбэшье юундэ Та маанадые орхижо,
эшхэбтэр байдалда оруулаад,
сэрэгтэймнай хамта дабхинагүйбта?
11Маанадые дайсадаймнай урда зугадуулаат,
маанадые үзэн ядагшад бидэниие дээрмэдэжэ байнал.
12Та бидэниие эдишын хонид мэтээр үгөөт,
маанадые улас үндэһэтэнүүдэй дунда тараагаат.
13Өөрын арадые үнэгүйгөөр худалдаат,
худалдаһанһаа ямаршье ашаг олзо олоогүйт.
14Та маанадые хүршэнүүдэймнай наадалал,
доромжолол, аашада дамжуулаат.
15Та маанадые улас үндэһэтэнүүдэй дунда хэлсэхэ зүйл болгоот,
бүхы арадууд маанад руу заажа байнал.
16Минии доромжолол бүхэли үдэрөө урдамни,
эшэһэмни нюуртам харагдана.
17Намайе буруушааха, зэмлэхэ абяан,
дайсанай болон үһөөгөө абагшын хараса!
18Эдэ бүгэдэ бидэнтэй тохёолдоһоншье һаань,
Таниие мартаагүйбди,
Тантай баталһан хэлсээгээ эбдээгүйбди.
19Гэдэргээ ябаагүйбди,
Танай замһаа хадуураагүйбди.
20Гэбэшье Та сүүбэн шонын газарта маанадые ниса дараат,
үхэлэй харанхыгаар бидэниие хушаат.
21Хэрбээ бидэ Бурханайнгаа нэрэ мартажа,
хариин бурханда зальбараа гээшэ һаамнай,
22энэ Бурханһаа нюуса байха юм аал?
Сэдьхэлдэ юу байһые Тэрэ мэдэнэ бшуу!

23Танай түлөө бидэниие үдэр бүри алана,
үүсэлэн гаргуулха хонид мэтэ болообди.
24Эзэн, бодыт! Юундэ унтажа байнабта!
Һэриит, маанадые хэтэ мүнхэ бү орхиит!
25Юундэ Та нюураа бүглэжэ,
бидэнэй зоболон, доройдолые харанагүйбта?
26Амидаралнай тооһо шоройдо хаягданхай,
бэемнай газарта няалданхай.
27Бодыт, бидэндэ туһалыт!
Энэрэл хайраяа бидэндэ үзүүлжэ, абарыт!