Psa 44 | BxrBBL2024 | STEP | [Дуунай бүлэгые хүтэлбэрилэгшэдэ: «Сараана» гэдэг аялга. Коорахай уг удамай ирагуу үгэнүүд, инаг дуранай дуун.]

‏ Psalms 44

1 [Дуунай бүлэгые хүтэлбэрилэгшэдэ: «Сараана» гэдэг аялга. Коорахай уг удамай ирагуу үгэнүүд, инаг дуранай дуун.]
2 Гоё һайхан үгэнүүд досоомни дүүрэн байна,
дуугаа хаанда зорюулнаб.
Минии хэлэн шадамар зохёолшын гуурһан мэтэ.
3 Зоной дундаһаа ши эгээл гоё һайханши,
нигүүлэсхы үгэнүүдые хэлэдэгши.
Тиимэһээ Бурхан хэтэ мүнхэдөө шамайе үреэгөө.
4 Хүсэтэ хаан, һэлмэеэ ташаандаа зүүгыш,
алдар солотойш, һүр жабхалантайш.

5 Үнэн зүбэй, номхоной, зүб шударгын түлөө мордожо,
урагшаа соёрыш!
Гаршни илалта туйлахал!
6 Годлинуудшни хурса,
урдашни арадууд унан һүгэдэхэл,
хаанай дайсад зоригоо мохохо.
7 Хан шэрээшни Бурханай шэрээ мэтэ,
хэтэ мүнхэдөө оршохо.
Хаанта баягшни –
зүб шударга ёһын баяг.
8 Ши үнэн зүбтэ дуратайш,
муу юумэ үзэн яданаш. Энээнэй түлөө Бурхан, шинии Бурхан,
хажуудашни байгаа хэнииешье баярай тоһоор тоһодоогүй,
харин гансал шамайе тоһодон ёһолоол!

9 Бүхы хубсаһаншни гүгэл,
зуун наһатын болон кассиягай үнэртэй.
Заанай яһан ордонһоо гарагша
хүбшэргэйтэ зэмсэгүүдэй хүгжэм шамайе баясуулна.

10 Хаашуулай басагад шинии хүреэлэнгэй дунда.
Баруун гар таладашни
Опиирой эрхим алтаар шэмэглэгдэнхэй хатан зогсоно.
11 Шагнаарай, охин, харан, анхаралтай соносоорой,
өөрын арад түмэниие болон
эсэгынгээ гэрые мартаарай.
12 Шинии гоо һайханда хаан татагдаха,
тэрэ шинии эзэн мүн,
тиимэһээ тэрээндэ һүгэдэн байгаарай.
13 Тиир хотын зон танда бэлэг асарха,
эгээл баян зон танай хайра хэшэг гуйн байха.
14 Хаанай басаган ордон соогоо сог жабхалантай,
хубсаһа хунарынь алтаар шэмэглэгдэнхэй.
15 Хээтэй хубсаһа үмдэһэн тэрэниие
хаанда дүтэлүүлэн асарна,
тэрээнэй нүхэд басагадые
хойноһоонь дахуулан хаанда абаашана.
16 Тэдэ баяр баясхалантайгаар дүтэлжэ, хаанай ордондо ороно.
17 Уг удамтнай элинсэгүүдэйнгээ һуури эзэлхэ,
бүхы дэлхэйдэ ноёдоор тэдэниие табихаш.
18 Нэрыешни үеын үедэ дурдан, һануулан байхаб.
Тиимэһээ арадууд хэтэ мүнхэдөө шамда магтаал үргэн байха.