Psalms 45
1[Дуунай бүлэгэй хүтэлбэрилэгшэдэ: залуу эхэнэрнүүдэй нарин хоолойгоор, Коорахай уг удамай дуун.]2Бурхан хадаа манай хорохо газар, хүсэн,
ямаршье гай тодхорто туһалагшамнай мүн.
3Тиимэһээ газарай хүдэлхэдэшье,
далайн гүн руу хада уулануудай хэмхэржэ унахадашье айхагүйбди.
4Уһан хүнхинэжэ, шааяна,
һүртэйдэнь хада ууланууд айн доһолно. [Хүгжэм]
5Бурханай хото гү, али Дээдэ Эзэнэй нангин оршолые
баясуулдаг урасхалтай гол бии юм.
6Бурхан тэрэ хотын дунда оршоно, хото доһолхогүй,
Бурхан тэрээндэ үүр сайхаһаа эхилээд туһалха.
7Үндэһэтэнүүд шууялдажа, хан түрэнүүд һалганан байна.
Бурханай дуугархада, газар хайлана.
8Түмэн Сэрэгтэ Эзэн бидэнтэй хамта,
Яковай Бурхан хадаа манай Хамгаалагша мүн! [Хүгжэм]
9Ерээд, Эзэнэй юу хэһые харагты.
Тэрэ газарые хооһон губи болгоо,
10дэлхэйн бүхы булангууд хүрэтэр
дайн дажар зогсоогоо,
һурша ном, жада хухалаа,
дайшалхы тэргэнүүдые галдан шатаагаа.
11Аалидагты, Намайе Бурхан гэжэ мэдэгты.
Үндэһэтэдэй дунда, газар дэлхэй дээрэ үргэмжэлэгдэхэб!
12Түмэн Сэрэгтэ Эзэн маанадтай хамта,
Хамгаалагшамнай – Яковай Бурхан!
Copyright information for
BxrBBL2024