Psalms 56
(Псал 107:2-6; 1 Хаан 22:1-2; 24)
1[Дуунай бүлэгэй хүтэлбэрилэгшэдэ: «Бү усадхыт» гэһэн аялга. Саулһаа тэрьедэжэ, агы руу гүйжэ ябахадаа Давидай зохёон бэшэһэн шүлэг.]2Намайе үршөөгыт, Бурхан, намайе үршөөгыт.
Юуб гэбэл, сэдьхэлни хорохо газараа Танай дотор лэ бэдэрдэг.
Тодхорой үнгэртэр Танайл дали доро хоргодогшоб.
3Дээдэ Бурханда,
намда һайе хэдэг Бурханда, хандан хашхарнаб.
4Тэрэ тэнгэриһээ намда туһа эльгээжэ, намайе абарха.
Тэрэ намайе залгихаа забдагшадые мохоохо! [Хүгжэм]
Бурхан хайра энэрэлээ болон үнэнөө эльгээхэл!
5Арьяатанай дунда ажаһуунаб.
Бэе бэеэ залгихаар бэлэн зоной дунда хэбтэнэб.
Тэдэнэй шүдэн жада ба годлинууд,
хэлэнь – хурса һэлмэ мүн.
6Бурхан, огторгойһоо дээгүүр үргэмжэлэгдыт,
бүхы дэлхэй дээгүүр алдар солотнай нэрьег лэ!
7Тэдэ хүлдэм урьха занга табяа,
сэдьхэлни гуниглаад байна.
Урдамни нүхэ малтаа,
харин өөһэдөө тэрээн руугаа унаа.
8Зүрхэмни Тандаал үнэн сэхэ, зүрхэмни Тандаал үнэн сэхэ.
Дуу дуулахаб, магтаал татахаб!
9Сэдьхэлни, һэрииш!
Ятага, морин хуур, һэриит!
Би үүрэй толониие һэреэхэб.
10Эзэн, арадуудай дунда Таниие алдаршуулхаб,
бүхы обогуудай дунда Таниие магтан байхаб.
11Юуб гэбэл, энэрэл хайратнай тэнгэри тулама агууехэ,
үнэн сэхэтнай – үүлэ тулама.
12Бурхан, тэнгэриһээ дээгүүр үргэмжэлүүлэгдыт!
Бүхы дэлхэйгээр алдар солотнай байг лэ!
Copyright information for
BxrBBL2024