‏ Psalms 58

(1 Хаан 19:11-18)

1[Дуунай бүлэгэй хүтэлбэрилэгшэдэ: «Бү усадхыт» гэдэг аялга. Гэрыень һахин гэтэжэ, өөрыень алахаар зониие Саулай эльгээхэ үедэ Давидай бэшэһэн шүлэг.]
2Бурхамни! Дайсадһаамни намайе абарыт!
Урдаһаам һөөргэдэн бодогшодһоо намайе аршалыт!
3Гэм бурууе хэгшэдһээ намайе зайлуулыт!
Алууршадһаа абарыт!
4Үзыт, тэдэ минии ами хороохоор отожо байна.
Хүсэтэй дайсад урдаһаам сугларжа байна.
Харин би ямаршье гэмгүй, нүгэлгүйб, Эзэн!

5Ямаршье гэмгүй намда тэдэ гүйжэ ерэн, урдаһаам добтолхо һанаатайл!
Намда туһалхаяа бодыт, харыт!
6Түмэн Сэрэгтэ Эзэн Бурхан, Израилиин Бурхан,
бүхы үндэһэтэнүүдые шиидхэхээр бодыт!
Гэм буруутай зоной нэгыньшье бү хайрлыт! [Хүгжэм]
7Үдэшэ болоходо, тэдэ һөөргөө бусажа, нохой мэтэ архиржа,
хотые тойрон ябана.
8Тэдэ үгэ хэлэхэдээ, һэлмэ аманһаа гаргаһан мэтэ,
«Хэн бидэниие шагнахаб даа?» гэжэ һанана.
9Харин Та, Эзэн, тэдэниие наада барижа энеэхэт.
Бүхы үндэһэтэдые шоо наадан болгохот.
10Минии Хүсэ шадал! Би Тан руу харанаб.
Юуб гэбэл, Бурхан минии хорохо газар мүн.
11Минии Бурхан Өөрын энэрэл хайраар намайе угтан абаха,
дайсадайм нюдэ руу
айнгүй хараха боломжо намда үгэхэ.

12Минии арад түмэнэй мартахагүйн тула
тэдэниие бү усадхаарайт.
Манай бамбай болохо Эзэн,
хүсэ шадалаараа тэдэниие тараагыт, доройхон болгыт.

13Аманһаань нүгэл үгэ гарадаг мүн.
Хараал шэрээл, худалайнгаа түлөө тэдэ
бардамлахынгаа зангада орожо баригдаг лэ!
14Уурлан тэдэниие усадхыт!
Тэдэнэй үгы болотор усадхыт!
Бурхан Яковые газар дэлхэйн хизаар хүрэтэр
зонхилдогые бүгэдэдэ танюулыт! [Хүгжэм]
15Дайсад үдэшэ бусажа, нохой мэтэ архиржа,
хотые тойрон ябана.
16Тэдэ эдеэ хоол бэдэржэ зайна,
садангүй бүхэли һүни архирна.

17Харин би Танай хүсые магтан дууланаб,
эртэ үглөөнһөө энэрэл хайра тухайтнай баяртайгаар тунхаглахаб,
юуб гэбэл, Та минии хорохо газар,
гай зоболонгойм үдэр аршалалтам байгаа бэлэйт.
18Минии Хүсэн! Таниие магтан дуулахаб:
«Бурхан – хорохо газарни, Бурхамни намда
энэрэл хайрал үзүүлдэг юм»!