‏ Psalms 76

1[Дуунай бүлэгэй хүтэлбэрилэгшэдэ: Едүтүүнэй аялга. Асаапай псалма.]
2Бурханда ханданаб,
Бурханиие дууданаб, Тэрэ намайе дуулана.
3Зобожо байһан үдэртөө Эзэниие бэдэрээб,
бүхэли һүниндөө гараа үргэн наманшалааб,
сэдьхэлни амараагүй.
4Бурханиие һанаад, зобон шаналан байхаб,
хээли алдан иигэжэ хэлэхэб: [Хүгжэм]
5«Нюдыем анюулнагүйт,
угаа ехэ сохилто абаад, дуугаржа шадахаа болёод байнам».
6Эртэ урдын саг тушаа,
үнгэрһэн жэлнүүд тухай бодоноб.
7Һүниндөө дуунуудаа һананаб,
зүрхэнтэеэ хөөрэлдэнэб,
һүнэһэм харюу бэдэрнэ.

8Эзэн хэтэ мүнхэдөө буруу хараа юм гү?
Саашадаа Тэрэ нигүүлэсхыгээр хандахагүй юм гү?
9Тэрэнэй энэрэл хайра хэтэдээ барагдаа юм гү?
Үгэниинь хэтэ мүнхэдөө дуулдахаа болёо юм гү?
10Бурхан хайрлахаа мартаа юм гү?
Уурлан, үршөөлөө хуряагаа гээшэ гү? [Хүгжэм]
11Би иигэжэ хэлээб: «Дээдэ Бурханай
баруун гарай ондоо болоһониинь
минии уйдхар гашуудал мүн».
12Эзэнэй хэрэгүүдые һанахаб,
эртэ урда сагта Танай түхөөһэн
гайхамшагта хэрэгүүдые һанахаб.
13Танай хэрэгүүдые бултыень ойлгон,
Танай агууехэ хэрэгүүд тушаа бодохоб.

14Бурхан, замтнай арюун.
Бурхандал адли иимэ агууехэ бурхан үшөө бии юм гү?
15Та гайхамшагта үйлэ хэрэгүүдые хэдэг Бурханта.
Та арадуудта Өөрын хүсэ шадал харуулаат.
16Шанга гараараа Та Өөрын арад түмэниие –
Яковай болон Иосифой уг удамые абараат. [Хүгжэм]
17Бурхан! Таниие ехэ уһан хараад, айгаа,
гүн шэшэрээ.
18Үүлэнһөө аадар адхараа,
туулган үүлэнһөө дуун гараа,
годлинуудтай эшхэрэн ниидээл.
19Тэнгэриин дуунтнай хуй һалхин дунда,
сахилгаан түби дэлхэйе гэрэлтүүлээ.
Газар дэлхэй һалганан, шэшэрэн байгаа.
20Замтнай далайгаар,
харгытнай агууехэ уһан дунда,
хэншье Танай хайшаа шэглэһые мэдэхэгүй.
21Та Өөрын арад түмэниие хонин һүрэг мэтээр
Моисей болон Аһарооной гараар хүтэлэн ябаат.