‏ Psalms 77

1[Ирагуу үгэнүүд. Асаапай зохёоһон.]
Арад зомни! Минии һургаалые анхарыт!
Аманһаам гараһан үгэнүүдые дуулыт.
2Амаа нээхэдээ һургаалта үгэнүүдые хэлэхэб,
эртэ урдын нюусануудые дуугархаб.
3Тэдэниие бидэ дуулаһан, мэдэһэн,
эсэгэнэрнай бидэндэ хөөрэһэн юм.
4Бидэ тэдэниие хүүгэдһээнь нюухагүйбди,
Эзэнэй алдарта, хүсэ шадалтайе,
хэһэн гайхамшагта үйлэ хэрэгүүдыень
ерэхэ үеынхидтэ тунхаглахабди.
5Юуб гэбэл, Тэрэ Яковтай хэлсээ баталжа,
Израильда һургаал хуули тогтооһон юм.
Тэдэниие үхи хүүгэдтээ заагаарай гэжэ
Тэрэ манай үбгэ эсэгэнэртэ захяа бэлэй.
6Иигэжэ ерэхэ үеынхидэй мэдэхын,
үхибүүдтэй болоод, тэдээндээ хөөрэхын тула.
7Бурханда этигэжэ, үйлэ хэрэгүүдынь мартангүй,
захяа заабаринуудыень сахихын тула.
8Үсэд болон буһалгааша,
Бурхантай хамта үнэнхэ зүрхэнһөө байгаагүй,
Тэрээндэ үнэн сэхэ байгаагүй
үбгэ эсэгэнэртээ адли байхагүйн тула.

9Эпрааимай хүбүүд һурша номоор зэбсэгжэһэн харбаашад бэлэй,
гэбэшье тэдэшье байлдаанай үдэр тэрьедэхэ баатай болоо һэн.
10Тэдэ Бурхантай баталһан хэлсээгээ эбдээ,
һургаал хуулииень сахяагүй.
11Хэһэн хэрэгүүдынь, харуулһан гайхамшагта үйлэнүүдынь тэдэ мартаа.

12Тэрэ элинсэг хулинсагайнь хараһаар байтар
Египедэй газар дайдада Цооһанда
гайхамшагта үйлэнүүдые хээ бэлэй:
13далайе хубаагаад, дундуурнь тэдэниие хүтэлэн гаргаа,
ехэ уһые хана мэтээр зогсоогоо;
14үдэртөө урдуурнь үүлээр,
һүниндөө галай гэрэлээр хүтэлэн ябаа;
15Тэрэ сүл губида хабсагай хахалан, уһа гаргажа,
агууехэ гүнһөө мэтээр тэдэниие ундалуулаа;
16хабсагайһаа урасхал гаргаа,
тэрэнь гол мэтээр урдаа.
17Харин үбгэ эсэгэнэр урдань баһа нүгэл хээ,
сүл губида Дээдэ Эзэнэй урдаһаа эсэргүүсээ.
18Эдеэ хоол эрин, Бурханиие туршахаа һанаа.
19Бурханда эсэргүүсэжэ, иигэжэ хэлээ:
«Бурхан сүл губида эдеэнэй шэрээ бэлдэжэ шадаха гү?
20Тэрэ хабсагайе хахалжа, уһан урдаа, горход зурыгаа.
Хилээмэ үгэжэ шадаха аалам?
Арад түмэнөө мяхаар хооллуулха гү?».
21Эзэн дуулажа, уур хилэн болобо,
Яковта уурынь дүрэлзэбэ,
Израильда сухалынь бушаганаба.
22Тэдэ Бурханда этигээгүй,
абарха гэжэ найдаагүй бшуу.
23Тэрэ дээрэ байһан үүлэдтэ захиржа,
тэнгэриин үүдэнүүдые онгойлгобо.
24Тэдээн дээрэ будаа бороо шэнгеэр оруулаа,
эдихыень тэнгэриин хоол үгөө.
25Зон Бурханай Эльгээмэлнүүдэй эдеэ,
Тэрэ садатарынь эдеэлүүлээ.
26Тэнгэридэ зүүн зүгэй һалхи үлеэлгэбэ,
урда зүгэй һалхи Өөрын хүсэ шадалаар туун асарба.
27Тэдээн дээрэ мяха тооһон мэтээр,
шубуудые далайн элһэн мэтээр буулгаба.
28Шубуудые хото хүреэнэй дунда, майхангуудай хажууда унагааба.
29Тэдэ эдижэ садаа,
хүсэһэн юумыень Тэрэ тэдээндэ үгөө.
30Гэбэшье хүсэһэн юумэеэ хүсэд эдлэжэ үрдеэгүй байхадань,
эдеэ хоолойнь амандань байхада,
31Бурханай уур сухал тэдээн дээр буужа,
хүсэтэйень алаба, Израилиин эрэшүүлые сохин унагааба.

32Иимэ байдалда тэдэ нүгэл үйлэдэһөөр лэ байгаа,
гайхамшагта хэрэгүүдтэнь этигээгүй бэлэй.
33Тэрэ наһыень богони болгобо,
айн-шэшэрэлдэн тэдэ ажаһуугаа һэн.
34Тэрэнэй тэдэниие алахада, тэдэ Өөртэнь бусадаг байгаа.
Бурханиие дахин бэдэржэ эхилдэг һэн.
35Бурхан тэдэнэй хорохо газар,
Дээдэ Бурхан Абарагшань гэжэ тэдэ һанадаг бэлэй.
36Урдань билдагуушалжа,
худалаар хэлэжэ байдаг һэн.
37Теэд зүрхэниинь Тэрээнтэй хамта бэшэ бэлэй,
тэдэ хэлсээе сахидаггүй һэн.
38Теэд Тэрэ нигүүлэсхы сэдьхэл үзүүлэн,
нүгэлынь хүлисэдэг, тэдэниие хюдадаггүй,
оло дахин уур хилэнгээ зайлуулдаг,
уураа номгоруулдаг байгаа.
39Тэрэ тэдэниие юрэдөө миин лэ мяхан бэе,
һалхилан ошоод дахин бусадаггүй һэбшээн гэжэ һанадаг һэн.

40Сүл губида тэдэ хэды дахин буһалгаалаа,
эзэгүй хооһон газарта хэды дахин сухалынь хүргөөгөө гээшэб!
41Бурханиие дахин-дахин туршажа,
Израилиин Арюуниие муулажа байгаа.
42Гарайнь хүсэ шадалтайе,
дайсанһаа абарһыень тэдэ һанаагүй.
43Египедтэ гайхамшагта үйлэ хэрэгүүдые хэһыень,
Цооһан талада тэмдэгүүдые харуулһыень;
44Египедэй бүхы гол горходые шуһаар урдахуулһыень,
тэндэһээ уһа уужа болохоор бэшэ байһые;
45Египедэй зониие хазахыень һононуудые.
Хосороохыень баха эльгэһыень;
46ургасыень хорхой шумуулда,
ажалайнь үрэ дүн – таршаада үгөө.
47Уһан үзэмэйнь мүшэрые мүндэртэ,
инжир мододые мүльһэн хюрууда сохюулаа.
48Малынь мүндэртэ,
һүрэгынь сахилгаанда сохюулаа.
49Тэдээн руу бушаганама уур сухалаа,
зэбүүрхэһэнээ, хилэнгээ, гай гасалан эльгээ,
усадхагша бүлэг Эльгээмэлнүүдээ ябуулаа.
50Уур сухалайнгаа зам тэгшэлээ,
ами наһынь хайрлаагүй,
малынь тарбаган тахалда хюдуулаа.
51Египедтэ ууган хүбүүдые,
Хаамай майхангуудта ууганиие усадхаа.

52Арад түмэнөө хонид мэтээр дахуулаа,
сүл губяар һүрэг шэнгеэр хүтэлөө.
53Тэдэнэй айхаар бэшээр, аюулгүйгөөр тэдэниие хүтэлөө,
харин дайсадынь далайн уһанда абтаа.
54Тэрэ тэдэниие арюун газартаа,
баруун гарайнгаа баряад байгааша тэрэ хадада асараа.
55Тэдэнэй хажууһаа арадуудые үлдэн намнаа,
уг залгамжалан эдлэхыень газарыень хубаажа үгөө,
Израилиин обогуудые майхангуудтань һуурижуулаа.

56Харин тэдэ Тэрэниие туршажа байгаа,
Дээдэ Бурханай урдаһаа эсэргүүсээ,
хэлсээгээ сахяагүй.
57Элинсэг хулинсагтаа адли, урбажа, мэхэлжэ,
Найдалгүй һурша номдол хазагайржа байгаа.
58Юуб гэбэл, тэдэ мүргэдэг обоонуудаараа уурынь,
онгонуудаараа хилэнгынь хүдэлгэжэ байгаа.
59Бурхан дуулажа, уур хилэнтэбэ,
Израильда үзэн ядатараа ехэ сухалдаба.
60Шилоодохи байраяа,
зоной дунда ажамидарһан майхангаа орхижо,
61Өөрын хүсэ шадалые баряанда абхуулба,
Өөрын алдарые дайсанда үгэбэ.
62Өөрын арад түмэниие һэлмээр сабшуулба,
Өөрын зөөридэ уурлаба.
63Гал дүлэндэ хүбүүдынь хосорбо,
басагадта хуримай дуу дуулажа үрдингүй.
64Санаартад һэлмээр сабшагдаа,
бэлбэһэн эхэнэрнүүд хүдөөлгэндэ уйлажашье шадаагүй.

65Гэбэшье нойрһоо һэриһэндэл Эзэн һэргэжэ,
архида һогтоод тэлэрһэн баатартал бодожо,
66дайсадаа хюдаба, намнаба,
хэтэ мүнхын эшхэбтэр байдалда оруулба.
67Иосифой майхан буруушаажа,
Эпрааимай обогые шэлэбэгүй,
68Иудын обог шэлэбэ,
Сион хадада дурлаба.
69Өөрын нангин газарые огторгойдол адляар байгуулба,
газартал адляар хэтэдээ баталба.
70Тэрэ Өөрын зараса Давидые шэлэжэ,
хониной хашааһаа абаба,
71хурьгатай хонидые дахан ябадаг тэрэниие Тэрэ
Өөрын арад түмэн болохо Яковые,
Өөрын угай зөөри Израилиие адуулуулхаар асарба.
72Иигэжэ Давид тэдэниие гүн сэдьхэлһээ оролдон адуулаа,
ухаатай уран гараараа тэдэниие ударидан ябаа.