Psalms 83
1[Дуунай бүлэгэй хүтэлбэрилэгшэдэ: гиттит гэжэ хүбшэргэйтэ зэр зэмсэгэй дууряалга доро. Коорахай уг удамай зохёоһон.]2Түмэн Сэрэгтэ Эзэн!
Танай оршодог газар хэды зохид һайхан бэ!
3Эзэнэй нангин үргөөгэй хашаа руу орохоо хэды ехэ һананабиб!
Зүрхэмни, бэемни Амиды Бурханай урда баясан дуулана.
4Минии Хаан! Минии Бурхан!
Түмэн Сэрэгтэ Эзэн!
Танай үргэлэй шэрээндэ шубууншье оршохо газараа,
хараасгайшье ангаахайнуудаа хэхэ уурхай олодог.
5Танай нангин үргөө соо оршогшод угаа ехэ юрөөлтэй!
Тэдэ хододоо Таниие магтан байхал.
6Хүсэниинь Танай дотор,
зүрхэндэнь Тан руу замууд байгааша хүн юрөөлтэй!
7Нулимсын нюруугаар гарахадаа,
тэдэ тэрэниие булаг болгодог,
бороо тэрэниие нуураар дүүргэдэг.
8Тэдэ хүсэ нэмээн ябана,
Сиондо Бурханай урда ерэнэ.
9Түмэн Сэрэгтэ Эзэн! Зальбаралым соносыт!
Яковай Бурхан! Намайе шагныт! [Хүгжэм]
10Маанадта аршалагша бамбай болоһон Бурхан!
Өөрын шэлэһэн хүниие харыт, анхарыт.
11Юуб гэхэдэ, Танай нангин үргөөгэй хашаа соо
нэгэ үдэр байха гээшэ мянган үдэрһөө дээрэ!
Хорото муухай зоной майхангуудта байнхаар
Бурханайнгаа нангин үргөөгэй богоһо дээрэ зогсоһон дээрэ!
12Ушарынь гэбэл, Эзэн Бурхан наран болон бамбай мүн!
Эзэн нигүүлэл болон алдар соло үршөөдэг.
Зүб замаар ябагшадые тэрэ юугээршье дутагдуулдаггүй.
13Түмэн Сэрэгтэ Эзэн!
Танда этигэдэг хүн юрөөлтэй!
Copyright information for
BxrBBL2024