‏ Psalms 103

1Сэдьхэлни, Эзэниие магтан дуула!

Эзэн Бурхамни! Та агууехэт!
Алдар соло болон һүр жабхалан – Танай хубсаһан.
2Хубсаһа үмдэдэгтэл адляар Та Өөрөө гэрэл нэмэрээт,
тэнгэриие хүшэгэ шэнгеэр татаат.
3Ордонойнгоо тулгуур баханануудые уһан соо шаагаат,
үүлэдые Өөрынгөө тэргэ болгон хүлэглөөт,
һалхинай жэгүүрээр ябанат.
4Та һалхиие Өөрын Эльгээмэл, галай дүлэ Өөрын зараса болгонот.
5Хэтын хэтэдэ һууриһаа хүдэлхэгүйн тула
Та газар дэлхэйе бата һуури дээрэ табин тогтоогоот.
6Тэрэниие хубсаһаар халхалһантай адли гүн уһаар бүрхөөгөөт,
ехэ уһан хада уула дээгүүр байнал.
7Танай захиран хашхархада тэдэ гүйлдэбэ,
тэнгэриин дуунһаатнай хорон зайлана,
8хада уулаар гүйлдэжэ, нюруу тала газар руу бууба,
Танай захирһан газарта тэдэ суглаба.
9Газарые бүрхөөхэгүйн тула, халихагүйн тула
Та ехэ уһанай хизаар тогтоогоот.

10Та тала нюрууда булагуудые орьёлуулнат,
хада уулануудай дундуур тэдэ урдана.
11Тэдэ хээрэ талын ан гүрөөл ундалуулна,
хулангууд ангаагаа гаргана.
12Тэдээн дээгүүр огторгойн шубууд байрлажа,
мүшэрэй дунда дуулан жэргэнэ.
13Дээдэ ордонһоо хада уулануудые норгонот,
ажал хэрэгүүдэйтнай дүнгөөр газар дэлхэй хооллоно.
14Мал һүрэгтэ гэжэ үбһэ ногоо,
зоной аша туһада, хүдэлмэриинь түлөө гэжэ ногоо ургуулнат.
15Иигэжэ эдэ бүгэдэ хүнэй зүрхые үзэмэй дараһан архиин баясуулхын,
нюурынь тоһонһоо яларан байхын тула,
хүндэ тэнхээ оруулдаг хоол хүнэһэнэй тула юм.
16Эзэнэй модод, Өөрынь һуулгаһан Ливаанай хуша модод,
элбэгээр ундалдаг юм.
17Шубууд тэндэ уурхайлдаг,
аист нарһан соо байрладаг.
18Үндэр хада ууланууд – янгирай байра,
хабсагайнууд – доргоной хорохо газар.

19Тэрэ саг харуулан байхын тула һара бүтээгээ,
наранайшье шэнгэхэ саг тодорхойлоо.
20Харанхые дэлгэхэдэтнай һүни болодог,
тиихэдэ ой соогуур арьяатан ябажа байдаг.
21Арсалангууд хүнэһэ бэдэрэн архирдаг,
Бурханһаа хоол гуйдаг.
22Наранай мандахада, тэдэ харижа,
нүхэндөө ошожо хэбтэдэг.
23Хүн ажал хэхэеэ, үдэшэ болотор хүдэлхэеэ гарадаг.
24Эзэн, Танай хэрэгүүд хэды олон бэ!
Сэсэн мэргэн ухаагаар Та тэдэниие бүтээгээт.
Газар дэлхэй Танай бүтээлээр дүүрэн.
25Агууехэ үргэн далай бии.
Тэндэ тоо томшогүй олон мүлхигшэд,
бага, жэжэ амитад байдаг.
26Тэндэ далайн онгосонууд тамардаг,
тэндэ наадажа байхаар Танай бүтээһэн Левиатаншье бии.
27Хэрэгтэй сагтань хоол хүнэһэ үгэхынтнай түлөө
Тэдэ Тан руу эрьенэ.
28Танай тэдээндэ үгэхэдэ, тэдэ тодожо абадаг,
Танай гараа һарбайхада, тэдэ һайн һайханаар садан ханадаг.
29Танай буруу харабал, тэдэ хүлгэдэг,
амисхалынь Танай абахада, тэдэ үхэжэ, шорой хүрьһэндөө бусадаг.
30Һүлдэеэ эльгэхэдэтнай, тэдэ бүтээгдэдэг,
иигэжэ Та газар дэлхэйн үнгэ зүһые шэнэлнэт.

31Эзэнэй алдар хэтэ мүнхэдөө байхань болтогой!
Эзэн Өөрын бүтээлнүүдтэ баярлахань болтогой!
32Газар дэлхэй руу харахадань, газар шэшэрдэг,
хада уулануудта хүрэхэдэнь, тэдэ утаа гаргадаг.
33Амидарха бүхы сагтаа Эзэндэ магтаал дуулахаб,
амиды байхадаа Эзэндэ дуу үргэхэб.
34Дуумни Тэрээндэ һайшаагдахань болтогой!
Эзэндэ би баясанаб.

35Нүгэлтэн газар дэлхэйһээ үгы болог,
хорото муу зон зайлуулагдаг!

Сэдьхэлни, Эзэниие магтан дуула!
Эзэндэ магтаал үргэе!