‏ Psalms 105

1Эзэниие магтагты!
Эзэндэ магтаал үргэгты, юуб гэбэл, Тэрэ һайн,
энэрэл хайрань хэтэ мүнхэдөө!
2Эзэнэй баатар хүсые хэн хэлэхэб,
магтаалынь дуулгахаб?
3Шударга ёһые хадагалагшад,
ямаршье сагта зүб шударга хэрэг хэгшэд юрөөлтэйл!
4Арад түмэндөө һайе хэхэдээ, нам тушаа һаныт, Эзэн!
Абаралаа абаад, нам руу ерыт!
5Танай шэлэһэн зоной жаргалые харахым тула,
Танай арад түмэнтэй хүхилдэхын,
Танай уг залгамжатай хамта Таниие магтахын тула!

6Бидэ үбгэ эсэгэнэртээ адли нүгэл үйлэдөөбди,
гэм хээбди, хорото муу хэрэг ябуулаабди.
7Үбгэ эсэгэнэрнай Египедтэ
Танай гайхамшагта хэрэгүүдые ойлгоогүй,
Танай хэгшэ угаа олон һайн юумэ һанаагүй,
Хулһата далайн хажууда буһалгаалан байгаа.
8Харин Эзэн Өөрын нэрын түлөө,
Өөрын хүсэ шадал харуулхын түлөө тэдэниие абараа.
9Иигэжэ Тэрэ Хулһата далайда занаба – тэрэ шэргэбэ,
хуурай газараар мэтэ тэдэниие гүн далайгаар хүтэлэн гаргаа,
10үзэн ядагшадһаа абараа,
дайсадһаа зайлуулаа.
11Дайсадынь уһанда абтаба,
нэгэньшье амиды үлөөгүй.
12Тиихэдэл тэдэ үгэнүүдтэнь этигэжэ эхилээ,
Тэрээндэ магтаал үргэн дуулаа.
13Гэбэшье юу хэһыень удалгүй мартаа,
зүбшэлынь хүлеэгөөгүй.
14Сүл губида угаа шунахайраа,
хооһон газарта Бурханиие туршаа.
15Тиимэһээ Тэрэ гуйлтынь дүүргээшье хадаа
тэдээн руу үбшэ эльгээгээ.

16Хотон хүреэндэ байхадаа тэдэ
Моисейдэ болон Эзэнэй гэгээн хүн Аһароондо атаархаа.
17Газар хахаржа, Датааниие залгяа,
Абираамай бүлэгые дараа.
18Бүлэгтэнь гал дүрэлзэжэ,
гал дүлэн хорото муу зониие шатаагаа.

19Тэдэ Хорээбтэ онгон бүтээжэ,
шудхаһан хүрэгтэ мүргэжэ эхилээ.
20Иигэжэ тэдэ алдараа – Бурханаа
ногоо зулгаагша үхэрэй дүрсөөр андалдаа болоно.
21Египедтэ агууехэ үйлэ хэрэг хэгшэ
Абарагша Бурханаа тэдэ мартаа.
22Бурхан Хаамай газар нютагта гайхамшагта хэрэгүүдые,
Хулһата далайн хажууда аймшагуудые харуулаа бэлэй.
23Тэрэ «Тэдэниие усадхахам!» гэжэ айладхаа,
гэбэшье Өөрынь шэлэгшэ Моисей бодожо,
уур хилэнгэйнь адхарха нүхые бүглэн зогсоо.
24Тэдэ хүсэмөөр һайхан газарые буруушааба,
үгэдэнь этигэбэгүй.
25Тэдэ майхан соогоо дурагүйлхэн гэмэрэлдэбэ,
Эзэниие дуулабагүй.
26Сүл губида хосорхынь тула Тэрэ гараа далайгаа –
27уг удамынь хариин газарта унажа,
арадуудай дунда шэнгэжэ үгы болохын тула.

28Тэдэ Пэһоорой Баалтай ниилэжэ,
үхэгшэдтэ үргэгшэ тахилнуудые эдеэ.
29Бурханиие хэрэгүүдээрээ уурлуулба,
иигэжэ дундань тахал үбшэн тараба.
30Тиихэдэ Пинэһаас бодожо, зарга гүйсэдхэбэ,
тахал үбшэн тогтобо.
31Энэ хадаа үеһөө үедэ тэрэниие магтаха
хэтэ мүнхын габьяань болоо бэлэй.

32Тэдэ Мэрибаагай уһанай дэргэдэ Бурханиие уурлуулаа,
тэдээнһээ боложо Моисей хохидоо.
33Тэдэ тэрэниие угаа зобоогоо,
тиимэһээ тэрэ һайса бодонгүй үгэ хэлээ бэлэй.

34Эзэнэй захирһанай ёһоор тэдэ арадуудые усадхаха байгаа,
гэбэшье энээниие дүүргэбэгүй.
35Бусад үндэһэтэдтэй холилдон гэрлэжэ,
тэдэнэй хэрэгүүдые хэжэ һураба.
36Тэдэнэй онгонуудта мүргэжэ һураба,
тэдэ онгонууд урьхань болобо.
37Тэдэ хүбүүд, басагадаа шүдхэрнүүдтэ үргэл болгон үргэдэг байгаа.
38Ямаршье гэмгүй зоной шуһа урасхуулжа,
хүбүүд, басагадайнгаа шуһа урасхуулжа,
Ханаһаанай онгонуудта тахил болгон үргэдэг байгаа.
Иигэжэ газарай хүрьһэн тэрэ шуһанһаа боложо бузартаба.
39Тэдэ хэрэгүүдээрээ өөрыгөө бузарлаба,
бүхы хэрэг ябадалынь – зальхай ябадал бэлэй.
40Эзэн арад түмэндөө уурлаба,
уг залгамжалан дамжуулха Өөрын юумэнһээ жэрхэжэжэ эхилбэ.
41Тэдэниие үндэһэтэдэй гарта дамжуулба,
дайсадынь тэдэниие зонхилжо эхилбэ.
42Дайсадынь тэдэниие дарлан-даран байгаа,
тэдээндэ тэдэ захирагдадаг һэн.
43Эзэн оло дахин тэдэниие абараа юумэл!
Харин тэдэ урдаһаань һөөргэдэхые шэлээ,
гэм зэмынгээ түлөө доромжолуулагдан байгаа.
44Харин Тэрэ гай гасалангынь харахадаа,
хашхарааень дуулахадаа,
45тэдээнтэй хэһэн хэлсээгээ һанажа,
энэрэл хайраар баян Тэрэ хайрлажа эхилдэг бэлэй.
46Олзолһон дайсадыеньшье тэдэниие хайрлахыень баадхадаг һэн.
47Эзэн Бурхамнай, маанадые абарыт,
хариин арадуудһаа бидэниие суглуулыт,
Танай нангин нэрые магтаха боломжо бидэндэ үгыт,
Таниие алдаршуулһандаа магтагдахыемнай!
48Израилиин Эзэн Бурхан хэтын хэтэдэ магтагдахань болтогой!
Бүхы зон «Болтогой!» гэжэ хэлээ!
Эзэниие магтаа!