‏ Psalms 106

1Эзэндэ магтаал үргэгты! Юуб гэбэл, Тэрэ һайн.
Юуб гэбэл, энэрэл хайрань хэтэ мүнхын.

2Иигэжэ хэд хэлэхэб гэбэл, Эзэнэй сүлөө болгоһон,
дайсадай һабарһаа зайлуулһан зон хэлэхэл.
3Үрнэ, умара зүгүүдһээ болон далайн талаһаа
Тэрэнэй суглуулһан бүхы зон иигэжэ хэлэхэл.

4Тэдэ хооһон сүл губяар тэнэжэ ябаа,
зоной байдаг нютаг руу харгы зам төөреэд,
5тэдэ гэдэһээ үлдэжэ, ангажа ябаа,
үхэхэ туйлдаа хүрөөд байгаа.
6Теэд тэдэ зобожо-тулижа Эзэниие дуудаба,
тиихэдэнь Тэрэ гай гамшагһаа зайлуулба,
7зоной байдаг нютаг руу зүб харгы заажа үгөө.
8Энэрэл хайрынь, зоной аша туһада
Тэрэнэй хэдэг гайхамшагта хэрэгэй түлөө
зон Эзэниие магтан байха болтогой!
9Юуб гэбэл, Тэрэ ангаһан зониие ундалуулаа,
туража үхэжэ байгшадые эдеэлүүлээ.

10Харин бусад зон харанхыда, бүрэг-барагта оршон байгаа,
түмэр гэнжэдэ зобожо һуугаа.
11Юуб гэбэл, Эзэнэй үгэ тоогоогүй,
Дээдэ Бурханай зарлигые сахяагүй.
12Тэдэ хүндэ ажалда зобоо,
унабалынь хэншье туһалхагүй.
13Теэд тэдэ зобожо-тулижа Эзэниие дуудаба,
тиихэдэнь Тэрэ гай гамшагһаа абарба,
14харанхы, бүрэг-барагһаа тэдэниие гаргаба,
гэнжэ хүлилгынь бута сохибо.
15Энэрэл хайрынь, зоной аша туһада
Тэрэнэй хэдэг гайхамшагта хэрэгэй түлөө
зон Эзэниие магтан байха болтогой!
16Юуб гэбэл, Тэрэ зэд хаалгануудые үгы хээ,
түмэр суургануудые бута сохёо.

17Буруу юумэ хэдэг байһаниинь өөһэдынь зобоогоо,
иигэжэ тэдэ гэмэйнгээ түлөө зобоо.
18Ямаршье эдеэ хоолһоо тэдэ буруу харадаг байгаа,
үхэлэй аманда орохоёо байгаа.
19Теэд тэдэ зобожо-тулижа Эзэниие дуудаба,
тиихэдэнь Тэрэ гай гамшагһаа абарба.
20Тэрэ үгэеэ эльгэжэ, тэдэниие аргалаа,
хүүрһээ зайлуулаа.
21Энэрэл хайрынь, зоной аша туһада
Тэрэнэй хэдэг гайхамшагта хэрэгэй түлөө
зон Эзэниие магтан байха болтогой!
22Баяр хүргэһэнэй үргэл тэдэ хэнэ,
Тэрэнэй хэһэн юумэ баяртай тунхаглана.

23Онгосоор далайгаар тамарагшад,
хизааргүй ехэ уһан дээр зам татагшад
24Эзэнэй хэрэгүүдые харана,
гүн уһан дундуур үйлэдэгшэ гайхамшагта хэрэгүүдынь үзэнэ.
25Тэрэ үгэ айладхаа – һалхин үлеэбэ,
далайн долгинуудые дабалгатуулаба.
26Тэнгэридэ тулама, гүндэ унама тэдэ байгаа,
сэдьхэлынь зобоһондоо хайлан байгаа.
27Тэдэ архиншадал эрьелдэн, найгалзан байгаа,
бүхы сэсэн мэргэн тэдээндэ хэрэгтэй бэшэ.
28Теэд тэдэ зобожо-тулижа Эзэниие дуудаба,
тиихэдэнь Тэрэ гай гамшагһаа гаргаба.
29Тэрэ шуурга номгоруулжа, нам гүм болобо,
долгинууд шааяхаа болибо.
30Шуурганай замхаһанда тэдэ баярлаа.
Тэрэ тэдэниие хүсэгшэ газартань асараа.
31Энэрэл хайрынь, зоной аша туһада
Тэрэнэй хэдэг гайхамшагта хэрэгэй түлөө
зон Эзэниие магтан байха болтогой!
32Арадай суглаан дээр Тэрэниие магтана,
ахамадуудай дунда алдаршуулна.

33Голой урдажа байгаа газар сүл губи болгоо,
булагай дэлбэржэ байгаа газар хуурай болоо.
34Ажаһуудаг зонойнь нүгэлэй түлөө
Тэрэ үрэжэлтэй газарые хужар болгоо,
35Харин сүл губиин орондо нуур сөөрэм байгуулаа,
хуурай газарай һуурида булаг дэлбэрээ.
36Гэдэһээ үлдэжэ ябагша зониие Тэрэ хүтэлэн тэндэ асарна,
тэдэ тосхонуудые барина, тэндээ ажаһууна.
37Тэдэ үзэмэй сэсэрлиг һуулгана,
иигэжэ угаа ехэ ургаса суглуулна.
38Тэрэ тэдэниие юрөөнэ, иигэжэ тэдэ угаа олон болоно,
малайнь тоошье бага бэшэ.

39Харин бусад үсөөн болоно,
дарлалтаһаа, гай тодхорһоо, зоболонһоо муудана.

40Түшэмэлнүүдые эшхэбтэр байдалда оруулна,
сүл губи руу абаашана, замһаань хадууруулна.
41Харин ядуу зониие үргэжэ, зоболонһоонь татан гаргана,
һүрэг хонид мэтэ үнэр бүлэтэй тэдэ болоно.

42Зүб шударга зон хаража, хүхилдэнэ,
харин зүб бэшэ ябадалтай хүн амаашье ангайха эрхэгүй.
43Сэсэн мэргэн ухаатай хүн анхаралтай энээниие обёоржо,
Эзэнэй энэрэл хайрые ойлгог лэ.