‏ Psalms 113

1Израилиин Египедһээ,
Яковай бүлын хариин зонһоо гаран ошоходо,
2Иуда Тэрэнэй нангин зүйл,
Израиль Тэрэнэй эзэмшэл болоо бэлэй.
3Далай тэдэниие хараад тэрьелбэ,
Иордан һөөргөө урдаба.
4Хаданууд хуса мэтэ һүрэлдэн,
толгойнууд хурьгад мэтэ собхоролдоо.
5Далай, юундэ тэрьедэбэш?
Иордан, юундэ һөөргөө урдабаш?
6Хаданууд, таанар хуса мэтэ юундэ харайгаабта?
Толгойнууд, таанар хурьгад мэтэ юундэ собхоролдообта?
7Газар дэлхэй, Эзэнэй урда,
Яковай Бурханай урда шэшэрээрэй!
8Тэрэ хабсагайе уһата нуур,
хатуу шулууешье уһата булаг болгонол.
9Эзэн, гансал Танда, гансал Танда,
бидэндэ бэшэ, магтаал дуун зорюулагдаха ёһотой.
Юуб гэбэл, энэрэл хайратнай, үнэн зүбтнай хэтын!
10Үндэһэтэд юундэ «Тэдэнэй Бурхан хаана гээшэб?» гэжэ хэлэхэ ёһотойб?
11Бурхамнай тэнгэридэ оршодог,
Өөрынгөө хүсэһэн юумыел хэдэг.
12Харин тэдэнэй онгонууд хадаа мүнгэн ба алтан,
хүнэй гараар дархалһан юумэд:
13аматай аад, дуугардаггүй,
нюдэтэй аад, харадаггүй;
14шэхэтэй аад, дууладаггүй,
хамартай аад, үнэр ойлгодоггүй.
15Гартай байбашье, барижа шададаггүй;
хүлтэй байбашье, ябажа шададаггүй.
Хоолойнь нэгэшье абяа гаргадаггүй.
16Тэдэниие бүтээгшэд, тэдээндэ этигэгшэд бултадаа
тэдээн шэнги болог лэ!

17Израиль, Эзэндэ этигэ!
Тэрэ хадаа манай туһа болон бамбай мүн.
18Аһарооной бүлэ, Эзэндэ этигэ!
Тэрэ хадаа манай туһа ба бамбай мүн.
19Эзэнһээ түбэгшөөгшэд! Эзэндэ этигэгты!
Тэрэ хадаа манай туһа ба бамбай мүн.
20Эзэн маанадые мартаагүй, юрөөжэ байна:
Израилиин бүлэ юрөөнэ,
Аһарооной бүлэ юрөөнэ.
21Өөрһөөнь түбэгшөөгшэдые Тэрэ юрөөнэ –
ехэ, багагүй бултыень.
22Эзэн таанарыешье, үри һадаһадыетнайшье
үнэр үдхэн болгог лэ.
23Таанар тэнгэри, газар бүтээгшэ Эзэнээр юрөөгдэжэ байнат.

24Тэнгэри болбол Эзэнэй тэнгэри,
харин газар дэлхэйе Тэрэ хүнэй хүбүүдтэ үгөө.
25Үхэгшэд, шэмээгүй байдал руу доошоо орогшод бултадаа
Эзэниие магтадаггүй,
26харин бидэ Эзэниие энэ сагһаа эхилэн хэтэ мүнхэдөө
магтан дуулан байнабди.
Эзэндэ магтаал үргэгты!