‏ Psalms 117

1Эзэндэ магтаал соло дуудагты! Юуб гэбэл, Тэрэ һайн,
хайра энэрэлынь хэтэ мүнхын юм.
2«Тэрэнэй хайра энэрэлынь хэтэ мүнхэ»
гэжэ израильшууд хэлэг лэ.
3«Тэрэнэй хайра энэрэлынь хэтэ мүнхэ»
гэжэ Аһарооной бүлэ хэлэг.
4«Тэрэнэй хайра энэрэлынь хэтэ мүнхэ»
гэжэ Эзэниие хүндэлэгшэд хэлэг лэ.
5Зоболондо ороод байхадаа Би Эзэниие дуудааб.
Эзэн намда харюусажа, уужам газарта гаргаа юм.
6Эзэн минии талада, би айхагүйб.
Хүн намда юу хэжэ шадахаб?
7Эзэн намда туһална.
Дайсадаа харахадаа, би айнагүйб.
8Хүндэ этигэхэһээ
Эзэндэ найдажа байбал, дээрэ.
9Ноёдто этигэхэһээ
Эзэндэ найдажа байбал, дээрэ.
10Бүхы үндэһэ яһатан намайе хүреэлөө.
Теэд Эзэнэй нэрээр би тэдээнһээ сүлөөрөөб.
11Тэдэ намайе бүһэлөө, бүһэлөө,
Эзэнэй нэрээр би тэдээнһээ сүлөөрөөб.
12Тэдэ намайе зүгынүүд мэтэ хүреэлөө,
адаалхай һөөгүүд соо гал мэтэ тэдэ аһаа.
Теэд би Эзэнэй нэрээр тэдээнһээ сүлөөрөөб.
13Намайе унагаахаяа тэдэ хүсэтэйгөөр түлхеэ һэн,
теэд Эзэн намайе дүнгөө.
14Эзэн болбол минии хүсэн ба хамгаалалтам.
Тэрэ – минии абарал мүн!
15Зүб шударга зоной майхан соо – баярай, абарагдаһанай хашхараан.
Эзэнэй баруун гар хүсэеэ харуулаа!
16Эзэнэй баруун гар дээшээ үргэгдөөтэй.
Эзэнэй баруун гар хүсэеэ харуулаа!
17Би хосорхогүйб, амиды мэндэ байхаб.
Эзэнэй үйлэ хэрэгүүдые тунхаглан байхаб.
18Эзэн намайе шанга хэһээгээ,
теэд намайе үхэлдэ хүргөөгүй.
19Намда зүб шударгын бартаануудые нээгыт!
Би тэрээгээр орожо, Эзэндэ магтаал соло дуудахаб.
20Эзэнэй бартаанууд энэ юм.
Зүб шударга зон тиишээ орохо.
21Намайе дуулажа, харюусажа,
абарһандатнай би Танда магтаал соло дууданаб!
22Хэрэгсээнгүй барилгашадай голожо хаяһан шулуун гэрэй гол шухала тулга шулуун болоо.
23Энээниие Эзэн бүтээгээ.
Манай нюдэндэ гайхалтай юумэн болоо.
24Энэ үдэр Эзэн иимэ юумэ үйлэдөө!
Энэ үдэр баясан, сэнгэн байял!
25Гуйналди, Эзэн, абарыт!
Гуйнабди, Эзэн, амжалта туйлуулыт!
26Эзэнэй нэрээр заларан Ерэгшэ үреэл магтаалда хүртэһэй!
Бидэ Эзэнэй нангин үргөөһөө таниие юрөөнэбди.
27Эзэн болбол Бурхан. Тэрэ бидэндэ гэрэл үршөөгөө.
Үргэлэй шэрээгэй эбэртэ тахил уягты!
28Та – минии Бурхан мүн, Би Танда һайе хүргэн байхаб.
Та – минии Бурхан, Танда магтаал үргэн байхаб!
29Бурханда магтаал соло дуудагты! Юуб гэбэл, Тэрэ һайн,
энэрэл хайрань хэтэ мүнхын юм.